Morgunblaðið - 21.11.2003, Blaðsíða 14

14 | FÓLKIÐ | FÖSTUDAGUR 21|11|2003 MORGUNBLAÐIÐ
EASTWOOD Á
ÓVENJULEGUM SLÓÐUM
Eastwood hefur hlotið einróma lof fyrir nýj-
ustu mynd sína, Mystic River. Hann fékk
óvenju gott næði til að vinna myndina og upp-
sker sem hann sáir. Á meðan framleiðendurnir
í Warner Bros. voru með hugann við gerð og
markaðssetningu stórmyndarinnar Matrix Rev-
olutions „gleymdist“ Eastwood og fékk tæki-
færi til að snurfusa „litlu“ myndina sína.
Frá fyrstu mínútu er ljóst að Eastwood er á
betur heppnuðum og vitsmunalegri nótum en
að undanförnu. Blood Work, Space Cowboys,
True Crime, Absolute Power eru ofur venjuleg-
ar afþreyingarmyndir með hversdagslegri róm-
antík og karlrembu. Það verður að fara 8 ár
aftur í tímann til að finna The Bridges of Mad-
ison County, síðasta stórvirki leikstjórans. Þar
lauk frjósamasta kaflanum á ferli eins magn-
aðasta kvikmyndagerðarmanns í Hollywood,
sem náði hápunkti fyrir sléttum áratug
með vestranum Unforgiven (sem hlaut
Óskarsverðlaunin sem besta mynd árs-
ins og færði Eastwood sömu verðlaun
fyrir leikstjórn.)
Satt að segja héldu flestir að
frægðarsól leikstjórans og leikarans
væri endanlega hnigin til viðar. Mað-
urinn búinn að skila miklu og far-
sælu dagsverki, kominn á áttræð-
isaldur. En lengi lifir í gömlum
glæðum. Eastwood sýnir í Mystic
River engin ellimörk í leikstjórn,
jafnvel orðinn enn fágaðri og þrosk-
aðri en nokkru sinni fyrr.
„Ég las bókina og keypti kvik-
myndaréttinn samstundis,“ segir
Eastwood. „Þetta er grípandi saga sem
býður upp á endalausa möguleika sem
kvikmynd. Persónurnar eru flóknar,
áhugaverðar og vel upp byggðar. Myndin
er um venjulegt fólk sem reynir að kom-
ast til botns í úr hverju það er gert undir
erfiðum kringumstæðum. Hún verður að
vera heiðarleg og trúverðug.
Morðgátur fjalla yfirleitt um uppljóstrun
glæpsins,“ bætir Eastwood við, „en í þessu
tilfelli er sýnt hvernig morðið breytir öllu lífi
sögupersónanna. Þær verða að standa
frammi fyrir eftirmálum hræðilegs glæps sem
framinn var fyrir aldarfjórðungi. Þá hefst þessi
átakanlega hringrás, allir þrír glíma við óuppgerð
mál, burðast með fortíðarvanda á bakinu.“
Nokkrir af virtustu leikurum Hollywood þyrptust til
Eastwoods um leið og verkefnið fór að kvisast út.
Sean Penn, Tim Robbins, Laurence Fishburne, Laura
Linney og síðast en ekki síst Marcia Gay Harden.
„Sagan nær til margra áhorfendahópa,“ telur
Eastwood. „Morðgátuunnendurnir fá nóg fyrir sinn
snúð, aðrir vilja skyggnast í bakgrunn persónanna
og lögregluþátturinn er mikilvægur í samhegi við
harmleikinn. Sagan er í mörgum lögum; þegar
eitt er fjarlægt kemur annað í ljós. Í hvert
skipti sem spurningu er svarað er önnur vak-
in.“
Gægst er undir efsta lagið í Mystic River í
hrikalegu upphafsatriði. Síðan heldur af-
hjúpunin áfram. Einn meginefnisþátturinn
er kynferðislegt ofbeldi gegn ungum
dreng en slíkir glæpir hafa ekki átt upp á
pallborðið í kvikmyndum. Ástæðan er
því miður ekki hve fá slík óhæfuverk
eru, öðru nær eru þau mun algengari
en nokkurn grunar og viðbjóðurinn sí-
fellt að gægjast upp á yfirborðið.
Hollywood hefur gert allnokkrar
myndir þar sem barnaníðingar koma
við sögu, skemmst að minnast The
Antwone Fisher Story (’02), fyrsta
leikstjórnarverkefnis Denzels
Washington sem leikstjóra og
frumsýnd var hérlendis í sumar á
myndbandi. Af öðrum, nýlegum og
athyglisverðum kvikmyndum þar
sem slíkir glæpir koma við sögu, má
nefna Priest, Happiness, Good Will
Hunting og A Time to Kill.
|saebjorn@mbl.is
KUNNA ÞAU FANGBRÖGÐ?
Það er erfitt að sjá hvar brellurnar enda og kunnáttan tek-
ur við í kvikmyndum, ekki síst í bardagaatriðum. Þrátt fyrir
straumlínulaga form Thurman og Jolie treystir maður kunn-
áttu þeirra mátulega. Sama máli gegnir með harðnaglana
Seagal eða Reeves. Svörtu beltin eru ekki auðfundin en ef
bakgrunnurinn er skoðaður, þá bendir það til að flestir vinni
heimavinnuna samviskusamlega.
BRUCE LEE: Álitinn fremstur í hópi bestu glímumanna 20.
aldarinnar. Þróaði bardagaaðferðina „Jeet Kune Do“ og var
lærimeistari James Coburn, Steve McQueen og körfubolta-
hetjunnar Kareems Abdul-Jabbar hjá LA Lakers, auk fjöl-
margra annarra kvikmynda- og íþróttastjarna.
JACKIE CHAN: Hámenntaður frá barnæsku í kung fu og
fleiri austurlenskum bardagaíþróttum. Hóf einnig nám í óp-
erusöng og dansi en slagsmálin urðu ofan á. Chan þarf ekki
að iðrast þess því hann er tekjuhæstur kvikmyndaleikara
heims sem ekki mæla á enska tungu.
JET LI: Nam frá níu ára aldri bardagalist að nafni wu shu og
er tvöfaldur heimsmeistari í kung fu. Næst vinsælasti kvik-
myndaleikari Asíu – á eftir Chan.
DAVID CARRADINE: Sjálfur Bill og eins lék hann Caine í
kung fu sjónvarpsþáttunum, sem þykja einstakir í sinni röð.
Alvöru slagsmálamaður, hefur stundað kínverskt shaolin kar-
ate frá blautu barnsbeini og náð efstu afreksstigum í listinni.
UMA THURMAN og aðrir Hollywood-leikarar í Kill Bill nutu
margra mánaða tilsagnar í kínverskri bardagalist og fornum,
japönskum samúræja sverðakúnstum, kenndum við
„koumi“. Kennararnir tóku til þess hversu Thurman var góður
nemandi og tók námið alvarlega.
STEVEN SEAGAL: Hin taglprúða grænmetisæta er ekki öll
þar sem hún er séð því Seagal varð fyrstur útlendinga til að
kenna sjálfsvarnaríþróttina aikido dojo í Japan. Heldur 7. dan
stigi í bardagalistinni, þannig að hann notar ekki varaskeifur.
CHRIS TUCKER: Fékk tilsögn hjá Jackie Chan, mótleik-
aranum í Rush Hour-myndunum, og segist vera farinn að
kenna meistaranum (sem „mótortúlinn“ segir svo stuttan í
annan endann að fæturnir sjáist á ökuskírteininu!).
KEANU REEVES: Lærði á þriðja hundrað glímubrögð áður
en tökur hófust á Matrix-þríleiknum. |saebjorn@mbl.is
Galdrar í Hong Kong
Í hasarmyndinni Medallion, eða Heillagrip,
leikur Jackie Chan lögregluþjóninn Eddie,
samviskusaman lögregluþjón í Hong Kong.
Dularfullur heiðurspeningur færir honum
hraða, vit og krafta, sem hann notar gegn
glæpaklíku Snáksins (Julian Sands). Leik-
stjóri er Gordon Chan og myndin frumsýnd í
Smárabíói um helgina. FRUMSÝNT
MORÐ og minningar
Í æsku voru Jimmy (Sean Penn), Dave (Tim Robbins)
og Sean (Kevin Bacon) bestu vinir í verkamannahverfi
í Boston. Þangað til Dave var neyddur í bílferð sem
breytti lífi þeirra allra. 25 árum síðar liggja leiðir þeirra
saman á ný. Aftur gerist atburður sem markar örlög
þeirra um aldur og ævi. Clint Eastwood leikstýrir Dulá
– Mystic River og Laurence Fishburne, Marcia Gay
Harden og Laura Linney eru í aukaleikarahópnum.
FRUMSÝNT