Árdís - 01.01.1953, Page 31

Ársrit Bandalags lúterskra kvenna
29
skiftis. Hún lézt á heimili Kristínar dóttur sinnar (Mrs. P. Stefáns-
son) í Steep Rock 5. apríl 1935.
Ég vildi sérstaklega minnast hér á einn þátt í ævistarfi Hólm-
fríðar, er það starf hennar sem Sunnudagaskólakennari. Mun hún
hafa verið ein af fyrstu kennurum við Sunnudagaskóla. er Dr.
Rúnólfur Marteinsson stofnaði á Gimli, er hann hóf starf sitt þar.
Var skólinn undir stjórn Benedikts sál. Frímannssonar. Því starfi
hélt hún áfram gegnum árin, sem hún átti heima á Gimli. Hún
hafði sérstaka kennarahæfilegleika. Eru þeir margir sem hafa
minst þess með djúpu þakklæti og virðingu hvernig hún hafði lag á
að útskýra hvaða lexíur sem var, og hve þau hlökkuðu til að koma
til hennar á Sunnudagaskóla. Tók ég eftir því í æfiminningu föður
hennar, sem mér hefir verið send til aflestrar, að hann er barna-
kennari á Islandi í 20 ár og er talinn að hafa haft sérstaka hæfi-
leika á því sviði. Tók Hólmfríður þá eiginleika í arf.
Á síðastliðnu vori var ég stödd stund úr degi á Gimli. Hópur
manna var þar að verki við að rífa niður byggingu. Var það lúterska
kirkjan, sem var byggð árið 1907. Komu þá í hugann margar
endurminningar og margar myndir af þeim, sem mest lögðu á sig
til að koma upp því Guðshúsi og báru byrðina af starfinu í síðustu
40 ár. Þeim, sem störfuðu þar með prestunum, er þar þjónuðu, og
engu síður þau tímabil sem prestlaust var á staðnum. Ein í þeirra
hópi var Hólmfríður Brynjólfsson, ábyggileg, ósérhlífin, opinská
og einlæg. Ég gladdist við þá hugsun að flestir af þeim stóra hóp
hafa verið leiddir úr hinni stríðandi kirkju hér á jörð inn í hina
sigrandi kirkju. — 1 borginni þöglu, norðanvert við Gimli-bæ, hvíla
líkamsleifar þeirra flestra.
Guð blessi minningu Hólmfríðar Brynjólfsson og launi henni
störfin öll, sem ef til vill gleymdist að þakka meðan hún var enn
á veginum með okkur.
Ingibjörg J. Ólafsson
Bœnin má aldrei bresta þig,
búin er freisting ýmisleg;
þá líf og sál er lúð og þjáð,
lykill er hún að Drottins náð.
—H. P.