Fréttabréf Ættfræðifélagsins - 01.10.1991, Blaðsíða 3
3
Guðríður Oddsdóttir kona Ketils Bjarnasonar og móðir
Úlfheiðar var fædd 1757. Hún var dóttir Odds Gíslasonar er
bjó á Egilstöðum í Ölfusi 1783. Um konu hans móður Guðríðar
er mér ókunnugt.
Oddur Gíslason bóndi á Egilstöðum var fæddur 1724.
Foreldrar hans voru Gísli Oddsson bóndi í Ósgerði í Ölfusi
1729 og 1747 og kona hans Þorgerður Ásbjörnsdóttir sem sögð
er 39 ár í Manntali 1729 en mun talin þar tveimur árum of
gömul.
Foreldrar Gísla Oddssonar bónda í Ósgerði voru Oddur
Gunnarsson f. 1673 og kona hans Guðný Kjartansdóttir f.
1673. Þau bjuggu 1703 í Potti (Vestri-Kálfholtshjáleigu) í
Holtum, 1709 á Húsum í Holtum og 1729 í Jórvík í Flóa.
Þorgerður Ásbjörnsdóttir kona Gísla Oddssonar bónda í
Ósgerði er vafalítið sú sem var 11 ára 1703 í Gljúfurholti í
Ölfusi þó tveimur árum skakki um aldur hennar miðað við
manntalið 1729.
Foreldrar hennar voru Ásbjörn Þorvarðsson f. 1652 d.1727,
bóndi í Gljúfurholti 1703 en á Eystriþurá 1708, og fyrri
kona hans Þóra Tómasdóttir f. 1666.
Þeirra feðga Odds Gíslasonar á Egilstöðum og Gísla
Oddssonar í Ósgerði er getið í bókinni Ölfusingar en engin
grein gerð þar fyrir ættartengslum þessa fólks. Það sannar
þó á engan hátt að þessi ættfærsla sé röng hjá Hannesi
Þorsteinssyni því sú bók er meingallað rit og varla nema
hálfunnið verk.
Að síðustu vil ég geta þess, þó ekki komi
fyrirspurninni við, að Einar Einarsson bóndi á Jaðri, maður
Úlfheiðar Ketilsdóttur, var ekki sonur Einars Sveinssonar
bónda í Köldukinn eins og sagt er í Víkingslækjarætt.
(Gamla útgáfan bls. 323.) Foreldrar hans voru Einar Jónsson
f. 1747 d.6.febr.1811 bóndi í Kvíarholti í Holtum og fyrri
konu hans Guðrúnar Einarsdóttir f. 1750 d.25.ágúst 1785.
Ætt Einars Jónssonar í Kvíarholti er ókunn en foreldrar
Guðrúnar Einarsdóttur voru Einar Magnússon lögréttumaður í
Haga og síðar Stúfholti í Holtum f. 1681 enn á lífi 1762 og
þriðja kona hans Þuríður Jónsdóttir f. 1709 d.27.okt.1790.
Einar Einarsson fékk að erfðum úr móðurætt sinni lítinn
óbyggðan part úr Þykkvabænum og á þeim jarðarparti byggði
hann sér nýbýli 1815 og nefndi Jaðar.
Þingskálum á Rangárvöllum 18.júli 1991.
Valgeir Sigurðsson.
Konráð Bjarnason og Páll Lýðsson fá sérstakar þakkir fyrir
frábæra leiðsögn í Sumarferð Ættfræðifélagsins um Árnessýslu
þann 20 júlí síðastliðin. Eins þökkum við samferðafólki
okkar fyrir ánægjulega ferð.
Stjórnin