Fréttablaðið - 07.12.2013, Side 92

7. desember 2013 LAUGARDAGUR| MENNING | 92
„Þetta hefur gríðarlega mikla
þýðingu fyrir verkefnið og það er
mikil viðurkenning fyrir myndina
að vera frumsýnd á einni stærstu
kvikmyndahátíð heims,“ segir
Ragnar Agnarsson, framleiðandi
hjá framleiðslufyrirtækinu Saga-
film. Norska sombímyndin Dead
Snow 2, sem heitir á frummál-
inu Død snø 2, verður frumsýnd
á bandarísku kvikmyndahátíðinni
Sundance í janúar en Sagafilm er
meðframleiðandi myndarinnar.
Myndin var tekin upp á Íslandi í
sumar og er framhald myndarinn-
ar Dead Snow, Død snø, frá árinu
2009 sem sló rækilega í gegn og
hefur verið seld til 73 landa. Vel-
gengnin kom leikstjóra myndanna,
Tommy Wirkola, á kortið og leik-
stýrði hann meðal annars Holly-
wood-myndinni Hansel & Gretel:
Witch Hunters.
Ragnar og teymið hjá Sagafilm
unnu náið með framleiðendum
myndarinnar, norska fyrirtækinu
Tappeluft, og útilokar Ragnar ekki
nánara samstarf með fyrirtækinu.
„Það á eftir að koma í ljós hvort
við vinnum meira saman. Við
höfum hent hugmyndum á milli
og rætt nánustu framtíð en það er
ekkert sem ég get staðfest að svo
stöddu.“
- lkg
Norsk sombímynd á
Sundance-hátíðina
Dead Snow 2 verður frumsýnd á Sun dance í janúar.
Sagafi lm er meðframleiðandi myndarinnar.
STOLTUR Ragnar Agnarsson segir þetta
mikla viðurkenningu fyrir myndina.
„Þetta er fyrsta kaffihúsið í Þor-
lákshöfn og ég myndi segja að
þetta sé rómantískasta kaffihús á
Íslandi,“ segir Dagný Magnúsdótt-
ir glerlistakona og eigandi kaffi-
hússins og listasmiðjunnar Handa
í Höfn. Hún hefur starfrækt lista-
smiðju í um þrjú ár og gekk sú
starfsemi svo vel að út frá henni
varð kaffihúsið til. „Kveikjan að
kaffihúsinu var að ég vildi þjóna
viðskiptavinum mínum betur,“
útskýrir Dagný.
Aðdragandi opnunarinnar var
þó langur en Dagný stundaði nám
á sóknarbraut Nýsköpunarmið-
stöðvar fyrir nokkrum árum og
nýtti sér þá hugmyndina að kaffi-
húsi samhliða Höndum í Höfn við
nám- og verkefnavinnuna þar en
Nýsköpunarmiðstöðin hvatti hana
til dáða við framkvæmdina. Einn-
ig hefur hún sótt ýmis námskeið
varðandi markaðs- og kynning-
armál sem hafa komið að góðum
notum við þessa vinnu.
„Ég hef ávallt haft mikla ástríðu
fyrir matargerð og bakstri.“
Dagný tók þátt í sjónvarpsþætt-
inum Masterchef síðastliðið haust
og setti sér það markmið að ef
hún næði upp í 25 manna úrtöku-
hóp léti hún drauminn um kaffi-
hús í Þorlákshöfn rætast. „Ég stóð
við stóru orðin og lét slag standa.“
segir Dagný létt í lundu.
Innviðir kaffihússins eiga það
sameiginlegt að vera komnir til ára
sinna en hafa fengið upplyftingu
og nýtt hlutverk. Í Höndum í Höfn
má meðal annars kaupa ýmsa gler-
vöru og lífsstílstengdar matvörur
frá Nicolas Vahé. „Ég notast við
ösku úr Eyjafjallajökli og sand úr
nálægri fjöru í glermunina mína.“
Dagný hefur mikinn metnað til
matargerðar og leggur mikið upp
úr því að nota ávallt úrvalshráefni.
„Hráefnið kemur að mestu leyti
beint frá býli og veitingarnar eru
lagaðar frá grunni á staðnum.“
Þá hefur staðurinn einnig verið
virkur í tónleikahaldi og hafa
ýmsir listamenn komið þar fram
að undanförnu.
Hendur í Höfn er opið frá
fimmtudegi til sunnudags en opið
er fyrir hópa utan opnunartíma.
- glp
Fyrsta kaffi húsið
í sögu bæjarins
Rómantíska kaffi húsið Hendur í Höfn í Þorlákshöfn
er eina kaffi hús bæjarins. Eigandinn er ástríðu-
kokkur og notar hráefni sem kemur beint frá býli.
KRÚTTLEGT OG KÓSÍ Hendur í Höfn er krúttlegasta kaffihús landsins að sögn
Dagnýjar. MYND/DAVÍÐ ÞÓR GUÐLAUGSSON
STÓÐ VIÐ STÓRU ORÐIN Dagný
Magnúsdóttir, eigandi eina kaffihússins
í Þorlákshöfn, Handa í Höfn. MYND/HJALTI
VIGFÚSSON