Reykjanes - 17.12.2015, Side 4

4 17. Desember 2015
Jólafundur
Norræna
félagsins
Nýlega hélt Norræna félagið í Reykjanesbæ jólafund sinn. Myndirnar eru frá vel
heppnuðum fundi, önnur mynd er af
gestum fundarins og hin af stjórn fé-
lagsins. Formaður Norræna félagsins
er Viðar Már Aðalsteinsson.
Ragnheiður Elín Árnadóttir iðnaðar-og viðskiptaráðherra:
Þrífst best þegar allt er á fullu
Ragnheiður Elín Árnadóttir iðnaðar-og viðskiptaráðherra hefur haft mörg
mikilvæg mál á sinni könnu að undanförnu. Ragnheiður Elín hefur um
nokkurt skeið verið í forystusveit Sjálfstæðisflokksins og er oddviti flokks-
ins í Suðurkjördæmi. Reykjanes heyrði aðeins hljóðið í Ragnheiði Elínu.
- Hvenær fékkst þú áhuga á pólitík?
„Það má segja að ég hafi alltaf haft
áhuga á stjórnmálum og á þjóðmálum
almennt. Ég er stjórnmálafræðingur að
mennt með mastersgráðu í alþjóða-
pólitík, en ég ætlaði mér samt aldrei
að starfa á vettvangi stjórnmálanna.
Það var eiginlega óvart sem ég leiddist
inni í stjórnmál. Geir H. Haarde, þá
nýlega orðinn fjármálaráðherra árið
1998 hafði samband við mig og bauð
mér starf aðstoðarmanns. Það kom
mér algerlega á óvart enda þekkti ég
hann lítið sem ekkert. En ég sló til og
naut þess mjög að starfa með honum
í samtals 9 ár, í fjármálaráðuneytinu,
utanríkisráðuneytinu og síðast í for-
sætisráðuneytinu. Þá var bakterían
komin þannig að ég sló til og tók þátt
í prófkjöri í Suðvesturkjördæmi fyrir
kosningarnar 2007, þá búsett ásamt
fjölskyldu minni í Garðabæ. Ég náði
ætluðum árangri í prófkjörinu og tók
sæti á Alþingi um vorið en færði mig
síðan yfir í Suðurkjördæmi vorið 2009
og hef verið þar síðan – er komin heim
aftur.“
- Hefur þú ánægju af því að starfa í
stjórnmálum?
„Já ég hef notið þess frá fyrsta degi,
bæði sem þingmaður og nú sem ráð-
herra. Á þessu er töluverður munur
og skyldurnar að sumu leyti ólíkar þó
að þingstörfin séu auðvitað þau sömu
í grunninn. Það er mikið annríki og
oft margir boltar á lofti í einu, en það
á mjög vel við mig. Ég verð löt þegar
lítið er að gera og þrífst best þegar allt
er á fullu. Ég hef alltaf sagt að þann dag
sem ég hætti að hafa ánægju af því að
starfa í stjórnmálum verði kominn tími
á að afhenda keflið öðrum.“
- Almenningur fær oft þá mynd af starfi
Alþingis að þar fari fram tilgangslitlar
umræður, endalaust þras. Hvað finnst
þér um þessa mynd sem dregin er upp
af störfum þingsins?
„Því miður er ýmislegt rétt við þá
mynd sem almenningur hefur og margt
sem betur mætti fara. Ræðupúltið er
það tæki sem stjórnarandstaðan á
hverjum tíma notfærir sér til að vekja
athygli á sér og sínum sjónarmiðum.
Ég held að við sem sitjum á Alþingi
viljum öll sjá bætt vinnubrögð. Eftir
að hafa setið bæði í stjórn og stjórnar-
andstöðu held ég að eina leiðin til að
ná fram róttækum breytingum sé að
menn komi sér saman um breyttar leik-
reglur, en láti þær taka gildi að loknum
kosningum. Þá hugsa menn út fyrir
þau hlutverk sem þeir gegna á þeim
tíma þar sem engin veit hver örlög sín
verða eftir kosningar. Ég vona að við
náum að gera umbætur á þingsköp-
unum á þessu kjörtímabili þannig að
meiri friður verði í störfum Alþingis
en þó þannig að þingmenn geti áfram
tjáð sig um þau mál sem eru í gangi
hverju sinni og réttur minnihlutans
sé tryggður.“
- Á síðustu árum hefur Sjálfstæðis-
flokknum ekki tekist að halda sínu fylgi
eins og áður. Sérstaklega er útkoman
slæm meðal ungra kjósenda og í Reykja-
vík. Er hægt að snúa þessari þróun við?
„Það er vissulega hægt að snúa
þessari þróun við. Ég held að flokkar
verði á endanum metnir af verkum
sínum og við erum með verkum okkar
og þeim árangri sem við höfum náð á
kjörtímabilinu að sýna að það skiptir
máli að Sjálfstæðisflokkurinn sé í
ríkisstjórn. Okkur hefur tekist vel til
við ríkisreksturinn. Um leið og við
erum að forgangsraða í þágu grunn-
þjónustunnar hefur okkur tekist, frá
því við tókum við, að skila fjárlögum
með afgangi og stöðva skuldasöfnun
ríkissjóðs. Þessi staða gefur okkur
mikil tækifæri á næstu árum. Um leið
erum við að lækka skatta og einfalda
skattkerfið og bæta. Við höfum einnig
sett húsnæðismálin í forgrunn og þau
mál skipta ungt fólk miklu máli. Þá var
síðasti Landsfundur okkur afar mik-
ilvægur en áherslur ungra sjálfstæð-
ismanna náðu þar gríðarlega vel inn í
stefnumörkun flokksins. Þá kusum við
Áslaugu Örnu Sigurbjörnsdóttur ritara
flokksins en hún er 25 ára gömul og
frábær fulltrúi ungu kynslóðarinnar.
Ég tel okkur eiga mikið inni og vona
að ungt fólk muni á ný finna samleið
með Sjálfstæðisflokknum.“
- Hver er þín skýring á hina mikla fylgi
sem Píratar virðast njóta?
„Það er erfitt að leggja mat á það –
en þeir eru með einhverjum hætti að
ná að svara kalli ákveðins hóps fólks,
ef marka má kannanir. Þau hafa sýnt
ákveðinn ferskleika og nálgast mál
með öðrum hætti. Mér finnst skorta
að ég viti í raun hvað þau standa fyrir
í mörgum mikilvægum málum og
hver stefna þeirra væri ef þau væru við
stjórnvölin. Við höfum séð það bæði í
kosningunum 2009 og 2013 að það er
stór hluti kjósenda leitandi og Píratar
hafa a.m.k. núna „náð“ þeim hópi til
sín. Ég hef þá trú að þegar nær dregur
kosningum fari kjósendur meira að
kalla eftir skýrri stefnu flokkanna í
mikilvægum málum og að litið verði
til árangurs kjörtímabilsins. Ég kvíði
ekki þeirri niðurstöðu.“
- Fjárhagsstaða Reykjanesbæjar og
Reykjaneshafnar er mjög slæm. Eru
einhverjar líkur til þess að bærinn ná
að bæta sína stöðu?
„Já, auðvitað eru líkur til þess og ég
vona sannarlega að það takist. Það er
mikilvægt að finna lausn á málefnum
Reykjaneshafnar og að iðnaðarsvæðið
í Helguvík byggist hratt upp eins og
unnið hefur verið að í mörg ár og nú
sér loks fyrir endann á. Þar skapast
traustur tekjugrunnur fyrir höfn-
ina og sveitarfélagið sem bæta mun
reksturinn til muna. Ríkið er ekki í
hópi lánadrottna hafnarinnar en fylgist
náið með framvindu málsins að sjálf-
sögðu og hefur gefið skýr skilaboð um
að það komi að innviðauppbygginu í
höfninni með sambærilegum hætti og
annars staðar. Ég trúi því að það takist
að semja við lánardrottna sveitarfélags-
ins, enda öllum til hagsbóta að það ger-
ist, og að kjörnir fulltrúar munu gera
allt sem í þeirra valdi stendur til að
vinna að því. Það er ástæða til bjartsýni
þegar litið er til atvinnuuppbyggingu
og tækifæra í sveitarfélaginu með vexti
í ferðaþjónustu, stækkun flugstöðv-
arinnar og uppbyggingu í umhverfi-
svænum orkutengdum iðnaði eins og
Auðlindagarðurinn á Reykjanesi er
frábært dæmi um og ég er sannfærð
um að við komum okkur í sameiningu
í gegnum þennan skafl.“
Hvers vegna eiga eldri borgarar
ekki að fá sömu afturvirkni á launa-
greiðslum og aðrir í þjóðfélaginu?
„Það er mikilvægt að öllum stað-
reyndum sé haldið til haga í þessari
flóknu umræðu sem þróun bóta al-
mannatrygginga er. Um þær gilda
sérstök lög og þær taka hækkanir
samkvæmt lögum ólíkt því sem gerist
um launagreiðslur sem samið er um
á milli launþega og launagreiðenda.
Í lögum um almannatryggingar er
kveðið á um að bætur almanna-
trygginga breytist árlega í takt við
fjárlög hverju sinni. Af því leiðir að
bætur almannatrygginga hækki einu
sinni á ári og hefur venjan verið að þær
hækki frá 1. janúar ár hvert en ekki frá
miðju ári þótt gerðir hafa verið kjara-
samningar í millitíðinni. Þannig fengu
eldri borgarar 3% hækkun bóta um
síðustu áramót, nokkrum mánuðum
áður en launþegar fengu sínar hækk-
anir í þeim samningum sem gerðir
voru í sumar og haust. Nú um ára-
mótin munu bætur almannatrygginga
hækka um 9,7% sem tekur bæði tillit til
þeirra launahækkana sem orðið hafa
á síðasta ári og spár um næsta ár, auk
verðbólguþróunar. Það má alltaf deila
um hvort nóg sé að gert, en það verður
ekki litið framhjá þeirri staðreynd að
frá því að þessi ríkisstjórn tók við
hefur skerðingum þeim sem síðasta
ríkisstjórn kom á verið aflétt og bætur
hækkaðar meira en nokkru sinni hefur
verið gert. Kaupmáttur bóta hefur
aldrei verið hærri, gera má ráð fyrir að
uppsöfnuð hækkun bóta lífeyrisþega
verði 17,1% á árabilinu 2014-2016,
sem er umtalsvert hærra en nemur
uppsafnaðri hækkun verðlags á sama
tíma, sem er áætluð 7,1%. Munurinn
er nálægt 10% og því útlit fyrir að
kaupmáttur lífeyrisþega muni aukast
verulega á þessum tveimur árum. Við
höldum því mikilvæga verkefni, sem er
að bæta hag lífeyrisþega, að sjálfsögðu
áfram, enda lýkur því aldrei.“
- Hver hafa verið þín mestu vonbrigði
í starfi?
„Ég get svo sem ekki nefnt neitt
eitt atriði sem hefur valdið mér von-
brigðum. Ætli það sé ekki frekar
þannig að það veldur mér vonbrigðum
þegar menn viðhafa ómálefnalega
gagnrýni og fara í „manninn en ekki
boltann“. Það getur verið lýjandi að
standa í slíkum rökræðum en auðvitað
er það því miður partur af pólitíkinni.
Ég held nú samt að flest okkar, hvar
í flokki sem við erum, séum í þessu
af hugsjón og til þess að láta gott af
okkur leiða.“
- Hvað er það ánægjulegasta sem gerst
hefur í þínu starfi?
„Eitt það ánægjulegasta er að fá tæki-
færi til kynnast öllu því dásamlega fólki
sem maður kynnist í gegnum starfið.
Ég lít á það sem helber forréttindi að
fá að fara um landið, kynna mér það
fjölbreytta og stórkostlega starf sem
unnið er í öllum þeim ótal atvinnu-
greinum sem ég hef um að segja í mínu
ráðuneyti. Hvort sem það eru nýsköp-
unarmálin, hönnun, ferðaþjónustan,
orkumál, tónlistar- og kvikmynda-
iðnaðurinn, annar iðnaður stór og
smár. . . alls staðar er fólk að vinna af
dugnaði og krafti að uppbyggingu og
verðmætasköpun. Það er sannarlega
gefandi að sjá afrakstur samstarfs okkar
í stjórnsýslunni við atvinnulífið t.d.
við bætta lagaumgjörð verða til þess
að ný fyrirtæki verða til eða að hagur
samfélagsins verði betri. Þá verður öll
vinnan svo sannarlega þess virði. Sem
Suðurnesjamaður er ég auðvitað stolt af
aðkomu minni að atvinnuuppbyggingu
hér á svæðinu, við höfum reynt að
greiða fyrir henni eins og mögulegt
er með því að gæta þess að greitt sé
hratt og örugglega úr því sem á okkar
borði lendir. Afraksturinn er sýnilegur,
fjárfestingasamningar sem þegar hafa
leitt til nýrra verkefna og tækifæra í
fjölbreyttum atvinnugreinum sem við
eigum öll vonandi eftir að njóta ágóð-
ans af í framtíðinni.“
- Og svona að lokum. Ætlar þú að lesa
einhverjar bækur í jólafríinu?
„Já, stefnan er að þær verði nokkrar
lesnar í fríinu. Við fjölskyldan erum
yfirleitt mjög værukær í jólafríum og
stefnan er að taka eins marga nátt-
fatadaga og við mögulega komumst upp
með. Við hjónin pössum alltaf upp á
að gefa hvort öðru bók til að tryggja
að þær komi nú örugglega í hús. Mér
finnst mjög notalegt að gleyma mér yfir
góðum krimma og eru Arnaldur, Yrsa,
Ragnar Jónasson o.fl. í uppáhaldi. Mig
langar líka að lesa nýjustu bók vinkonu
minnar Lilju Sigurðardóttur, Gildran,
sem fengið hefur mjög góða dóma.
Ég vona að Reyknesingar eigi gleðileg
jól og ég þakka innilega frábært sam-
starf og samveru á árinu sem er að líða.“