Norðurslóð - 26.03.2002, Blaðsíða 2
2 - Norðurslóð
Norðurslóð
Útgefandi: Rimar ehf.
Ritstjórar og ábyrgðarmenn: Hjörleifur Hjartarson, Lauga-
steini, 621 Dalvík, sími: 466 3370. Netfang: hjhj@ismennt.is
Jóhann Antonsson, Dalvík. Netfang: ja@radgjafar.is
Framkvæmdastjóri: Sigríður Hafstað, Tjöm. Sími: 466 1555.
Umbrot: Þröstur Haraldsson. Netfang: throsth@isholf.is
Hcimasíða: www.Nordurslod.is
Prentvinnsla: Alprcnt, Glerárgötu 24, Akureyri, sími: 462 2844.
Fólk þarf að
borða
Vorjafndægur er að baki og héðan í frá verður nóttin
styttri en dagurinn þar til einn allsherjar dagur ríkir
hér hjá okkur á hinum norðlægu beltum jarðar. Svarf-
dælski marsinn ómar enn í eyrum okkar og páskarnir
eru á næsta leiti með tilheyrandi útivist, fjölskyldu-
boðum og páskaeggjaáti. Strax að loknum síðustu
páskaeggjunum hefst svo skíðalandsmót íslands hér á
Dalvík og hjá samherjum okkar og grönnum á Ólafs-
firði. Það verður mikil hátíð og sem snöggvast mun
athygli þjóðarinnar beinast að okkur en það þykir
okkur jafnan þægilegt ástand. Skíðasvæðið í Böggvis-
staðafjalli hefur svo sannarlega mikla þýðingu fyrir
sveitarfélagið og möguleika þess til að koma sér á
kortið hjá ferðafólki í nútíð og framtíð.
Á dögunum henti það undirritaðan að þrjár stúlk-
ur úr Reykjavík sem voru hér í skíðaferð þáðu af hon-
um bílfar ofan úr fjalli og niður í bæ. Þær létu afar vel
af öllum aðstæðum í fjallinu og höfðu átt yndislegan
dag í sól og heilnæmu fjallaloftinu en spurðu nú hvar
hægt væri að setjast inn til að kaupa sér hressingu.
Komu þá vöflur á mig því skyndilega rann upp fyrir
mér að ekkert veitingahús var lengur starfrækt sem
því nafni gæti nefnst, ekkert kaffihús opið eftir venju-
legan verslunartíma, barinn Böggver kannski ekki
rétti staðurinn fyrir þessar stúlkur og önnur af þeim
tveim sjoppum sem lengst af voru starfræktar í bæn-
um var lokuð. Til allrar guðs lukku var hin sjoppan
opin og bjargaði því sem bjargað varð. En óneitan-
lega var sú uppgötvun æði þungbær að í þessu há-
menningarlega bæjarfélagi ættu svangir ferðalangar
ekki í önnur hús að venda en eina sjoppu með sína
hefðbundnu hamborgara, pylsur og gos. Á þeirri
stundu varð mér ljóst um hvað næsti leiðari Norður-
slóðar myndi fjalla. Síðan hefur landið tekið að rísa
hér aftur sem betur fer. Önnur sjoppa var aftur opnuð
og þar af leiðandi hægt að kaupa pylsur á helmingi
fleiri stöðum en áður. Síðan bárust þær gleðifregnir
um bæjarfélagið að nýtt veitingahús yrði opnað í
gamla Sogni innan tíðar. Og mikill var fögnuður und-
irritaðs því annars hefði leiðarinn sá arna orðið nær
óslitinn harmagrátur. Og hér kemur ferfalt húrra fyrir
Línu.
Allir leiðarar verða að hafa móral og mórallinn í
þessum er e.t.v. sá að það er ekki nóg að eiga hér gott
skíðasvæði eða fallegan dal til að sýna ferðamönnum
eða yndislegustu sundlaug landsins. Fólk verður að
borða og það á við um ferðafólk eins og aðra. Og það
sem meira er: góð veitingahús skipta meira máli en
flest annað í ferðaþjónustu. Rannsóknir sýna að það
sem ferðafólk innan lands og utan setur efst á lista
hvað varðar afþreyingu í ferðalögum eru góð veit-
ingahús. Þess vegna verður Dalvíkurbyggð aldrei
ferðamannastaður sem svo gæti talist á meðan veit-
ingahúsaflóran einskorðast við grillmat í sjoppum og
heimsendar pizzur með fullri virðingu fyrir hvoru-
tveggja.
Hinn mórallinn í leiðaranum er raunar leiddur af
þeim fyrri. Hann er sá að Dalvíkurbyggð verður
aldrei ferðamannastaður að neinu marki nema þeir
sem standa í ferðaþjónustu, hverju nafni sem hún
nefnist, vinni saman og sjái til þess í sameiningu að
ferðafólki standi hér til boða öll sú afþreying og þjón-
usta sem það þarf.
Nú fer í hönd páskavertíðin á skíðasvæðinu með
fjölda gesta hvaðanæva að og svo tekur við skíða-
landsmót íslands. En því miður er enn ekkert veit-
ingahús opið í bænum til að taka við þessum svöngu
gestum okkar. En þeir borða þá bara einhvers staðar
annars staðar.
hjhj
Ólafur Kjartan, Helga Bryndís, Kári Gestsson og Kór Svarfdœla sunnan heiða í Dalvíkurkirkju.
Svarfdælskur mars
haldinn að Rimum í annað sinn - og örugglega ekki það síðasta!
Að áliðnunt pálmasunnudegi
voru síðustu sporin stigin í
Svarfdælskuni mars, menningar-
hátíð Svarfdæla sem haldin var í
annað sinn dagana 22. og 23.
mars. Undirtektir við þessa há-
tíð eru slíkar að öruggt má telja
að hún eigi langt líf framundan.
Hátíðin hófst að Rimum á
föstudagskvöld með heimsmeist-
arakeppninni í brús. Að þessu
sinni var spilað í tveimur flokk-
um. I meistaraflokki kepptu 30
pör sem er 50% fjölgun frá því í
fyrra. Meðal keppenda í þessum
flokki voru nokkur pör frá
Grenivík þannig að brúsinn á sér
greinilega leynd óðöl utan Svarf-
aðardals. í hinum flokknum voru
þeir sem skemmra eru á veg
komnir í íþróttinni og var þar
ekki um formlega keppni að
ræða heldur þjálfun. Mátti þar
sjá góð tilþrif sem lofa góðu fyrir
framtíðina. Alls voru þátttak-
endur því hartnær eitt hundrað
talsins en við það má bæta fjöl-
mennum hópi áhorfenda.
Eftir harða keppni stóðu þau
uppi sem sigurvegarar og heims-
meistarar í brús árið 2002 frænd-
systkinin Jón Þórarinsson og
Ásrún Ingvadóttir sem ættuð
eru frá Bakka. Þau fengu til
varðveislu fram að næsta móti
að ári glæsilegan farandgrip,
Gullkambinn, sem nú var af-
hentur í fyrsta sinn. í öðru sæti
voru tengdafeðgarnir á Urðunr,
Einar Hallgrímsson og Hafliði
Ólafsson en Halldór Guðmunds-
son og Ingvar Kristinsson höfn-
uðu í þriðja sæti.
Veitt voru sérstök verðlaun
þeim sem flestar klórningar
fengu og hlutu þau Þór á Bakka
og Hallgrímur á Urðum svo og
Þórarinn og Margrét á Tjörn.
Málþing um tónlistarlíf
Upp úr hádegi á laugardag var
hátíðinni haldið áfram en þá var
komin röðin að málþingi sem
haldið var í Dalvíkurskóla. Þar
flulti Þórarinn Hjartarson sagn-
fræðingur á Tjörn ítarlegan
fyrirlestur um tónlistarlíf í Svarf-
aðardal fyrr og nú. Með þessum
fyrirlestri hefur Þórarinn unnið
þarft og gott verk sem er að taka
saman heillega sögu tónlistarlífs
hér í dalnum. Norðurslóð hefur
falast eftir því við Þórarin að
fyrirlesturinn verði búinn til
prentunar og mun hann birtast
hér á næstunni.
I blaðinu verður þó ekki hægt
að birta viðtal sem fléttað var
inn í fyrirlesturinn þar sem
Gunnar Dal rithöfundur sagði
frá upplifun sinni á tónlistarlífi
dalsins þegar hann bjó á Ytra-
Hvarfi á fjórða áratug síðustu
aldar.
Það var spilaður brús á 15 borðutn t meistaraflokki og 4-6 borðum í
byrjendaflokki að Rimum.
Þórarinn Hjartarson flytur er-
indi um svarfdœlskt tónlistarlíf.
Það bar til tíðinda á málþing-
inu að svar fékkst við fyrirspurn
sem varpað var fram á baksíðu
síðasta tölublaðs Norðurslóðar
um höfund stemmunnar sem
Steindór Andersen kvæðamað-
ur flytur með hljómsveitinni
Sigur Rós og fer nú sigurför um
heiminn. Vitað var að hún var
eftir Stefán Árnason en ekki um
frekari deili á honum. Kom fram
á málþinginu að Stefán var
bóndi á Kóngsstöðum snemma á
öldinni sem leið en bjó síðar í
Lækjarbakka og Holtinu á Dal-
vík.
Góðir tónlcikar
Að loknu málþinginu var efnt til
tónleika í Dalvíkurkirkju. Þar
sungu tveir kórar: Kór Svarfdæla
sunnan heiða undir stjórn Kára
Gestssonar og Karlakór Dalvíkur
undir stjórn Guðmundar Óla
Gunnarssonar. Helga Bryndís
Magnúsdóttir lék undir með báð-
um kórum og síðast en ekki síst
söng Ólafur Kjartan Sigurðsson
óperusöngvari með kórunum og
einn með undirleik Helgu Bryn-
dísar. Er skemmst frá því að segja
að þessir tónleikar tókust af-
bragðsvel, kirkjan þéttsetin tón-
leikagestum sem klöppuðu söng-
fólkinu lof í lófa. Á engan er hall-
að þegar fullyrt er að Ólafur
Kjartan hafi verið stjarna tónleik-
anna. Hann lagði salinn að fótum
sér með frábærum söng, húmor
og persónutöfrum. Var ekki frítt
við að sumir þeir sem eiga til
frændskapar við þennan son dals-
ins að telja væru dálítið stoltir og
ánægðir með sinn mann.
Marsinn tekinn
Hátíðinni lauk svo eins og vera
ber með því að stiginn var svarf-
dælskur mars að Rimum. Enn
var aðsóknin með ólíkindum og
telst fróðum mönnum til að
sennilega hafi ekki áður verið
tekinn fjölmennari mars hér í
dalnum. Tæplega fimmtíu pör
dönsuðu langt fram á nótt undir
stjórn feðginanna Hallgríms
Hreinssonar frá Klaufabrekkum
og Ingu Möggu dóttur hans en
hún er menntaður danskennari.
Fór vel á því að þessir afkom-
endur eins þekktasta marsafor-
ingja Svarfaðardals á síðustu öld
skyldu leiða dansinn.
Undir dansinum lék hljóm-
sveit sem skipuð var fimm harm-
onikkuleikurum, gítar, bassa og
trommum en hljómsveitarstjór-
ar voru Magnús G. Gunnarsson
sóknarprestur og Friðrik Frið-
riksson sparisjóðsstjóri.
Ánægjan skein úr hverju and-
liti á þessari hátíð og greinilegt
að hún hefur fest sig í sessi sem
árlegur stórviðburður í menn-
ingarlífi dalsins. JA/-ÞH