Víkurfréttir - 07.04.2004, Side 16

Heimahjúkrun – nútímaleg öldrunarþjónusta
Umfang
Heilsugæsla HSS í Reykjanesbæ og Grindavík sinna heimahjúkrun fyrir öll Suðurnes. Þar starfa hjúkrunarfræðingar,
sjúkraliðar og aðstoðarfólk við umönnun fólks í heimahúsum. Um 85% skjólstæðinga heimahjúkrunar eru 67 ára
og eldri. Að minnsta kosti 100 einstaklingar njóta heimahjúkrunar að staðaldri. Innlitin geta verið frá einu sinni í
viku til oft á dag, en um 20% skjólstæðinga fá svo tíðar heimsóknir. Vaktir eru til klukkan 22:00 á kvöldin og um
helgar en heimahjúkrun hefur bakvakt þegar sérstaklega stendur á.
Að vera heima sem lengst
Á undanförnum árum hefur starfsfólk heimahjúkrunar orðið vart við eindregnar óskir fólks um að dvelja heima hjá
sér sem allra lengst. Markmið þjónustunnar er að verða við þessum beiðnum, enda kveða lög um málefni aldraðra
á um skýlausan rétt fólks til þess. Ef upp koma veikindi eða slys hjá skjólstæðingum heimahjúkrunar eru hæg
heimatökin að fá fólkið lagt inn í D-álmuna, þar sem það fær fjölbreytta heilbrigðisþjónustu. Ef heimaþjónusta með
viðkomu á sjúkrahúsi HSS dugar ekki til þá er sótt um í heimilislegu úrræði, t.d. í Víðihlíð eða á Garðvangi.
Fjölbreytt úrræði
Með tilkomu 5 daga endurhæfingardeildar hefur úrræðum fyrir skjólstæðinga heimahjúkrunar enn fjölgað. Með því að dvelja virka daga í
nokkrar vikur í senn á endurhæfingardeild er stuðlað að betri heilsu og auknu þreki ásamt félagslegri örvun. Þeir skjólstæðingar
heimahjúkrunar sem nýta sér þessa þjónustu ættu að vera betur í stakk búnir en ella til að dvelja heima sem lengst. Dagdvöl aldraðra er
annað úrræði sem heimahjúkrun er í góðum tengslum við. Þar dvelur fólk á daginn og fær heimahjúkrun á kvöldin og um helgar. Þessu til
viðbótar er unnið að opnun á göngudeild fyrir aldraða á heilsugæslunni.
Hjúkrunarrými – síðasta úrræðið
Skjólstæðingar heimahjúkrunar teljast margir hverjir vera í mjög brýnni þörf fyrir vistun í hjúkrunarrými. Samt eru einungis örfáir þeirra sem
myndu vilja þiggja slíkt pláss. Það segir okkur að vistunarmatið er ekki í takt við tímann og nauðsynlegt er að endurskoða það með tilliti til
breyttra áherslna í öldrunarþjónustunni.
Mikið ríður á að heimahjúkrun og heimaþjónusta standi styrkum fótum því það eru lykilúrræði til að geta uppfyllt eindregnar óskir fjölmargra
aldraðra um að dvelja heima hjá sér eins lengi og stætt er.
Bryndís Guðbrandsdóttir,
deildarstjóri heimahjúkrunar
Ýmsar staðreyndir um Heilbrigðisstofnun Suðurnesja
• D-álman er vel búin sjúkradeild. 85% af sjúklingum sem liggja á legudeildum HSS eru eldri en 67 ára
• Ferðum sjúkra aldraðra til Reykjavíkur hefur fækkað mikið. Nú er sjúklingum sem þurfa á meðferð að halda vegna ýmissa algengra
sjúkdóma eins og t.d. lungnabólgu, sykursýki og sýkinga af ýmsu tagi sinnt á HSS.
• Dagdeild HSS tók til starfa 1. október og 5 daga deild 1. febrúar síðastliðinn. Þar eru nær allir sjúklingar 67 ára og eldri. Þeir fá þar
endurhæfingu og aðra meðferð virka daga vikunnar en fara heim til sín um helgar.
• Heimahjúkrun hefur verið styrkt verulega og nú eru vaktir þar allan sólarhringinn. Þannig eiga fleiri kost á því að dvelja lengur veikir heima
og jafnvel eiga síðustu stundir lífs síns í faðmi fjölskyldunnar. Meira en 90% þeirra sem þessarar þjónustu njóta eru 67 ára og eldri.
• Með tilkomu nýrrar legudeildar HSS og aukinnar sérfræðiþjónustu lækna og hjúkrunarfræðinga hefur þjónusta við aldraða Suðurnesjamenn
stóraukist og unnt er að sinna mun veikari einstaklingum í heimabyggð. Nýting deildarinnar hefur verið meiri en 100% frá opnun hennar.
• Framkvæmdastjórn HSS vill efla og auka nýtingu heilsugæsluselja HSS í Sandgerði, Garði og Vogum og þannig veita öllum
Suðurnesjamönnum enn betri þjónustu.
• Mikilvægt er að byggja upp öfluga almenna sjúkrahússtarfsemi auk heilsugæslu á HSS. Samhliða þeirri uppbyggingu er nauðsynlegt að
huga að byggingu hjúkrunarheimilis í Reykjanesbæ
• Gott og vaxandi þjónustusjúkrahús eykur verulega starfsmöguleika þeirra einstaklinga sem á Suðurnesjum búa og vöxtur þess og viðgangur
ætti því að vera sjálfsagður hluti byggðastefnu alls svæðisins.
WWW.HSS.IS
15. tbl. 2004 umbrot 6.4.2004 13:02 Page 16