Víkurfréttir - 07.04.2004, Blaðsíða 17

Hvort eru 70, 44 eða 20 á biðlista?
Að undanförnu hafa ýmsar tölur komið fram um fjölda þeirra sem bíða eftir vistun í einhvers konar rými á vegum ríkis eða sveitarfélaga.
Misskilnings gætir greinilega í túlkun fyrirliggjandi vistunarskrár og er því ekki annað fært en útskýra hvað skráin sýnir og hvað tölurnar
þýða. Fyrst er rétt að gera grein fyrir því að til að komast á vistunarskrá þarf einstaklingur að gangast undir svonefnt vistunarmat. Við matið
er tekið tillit til fjölda þátta; andlegra, félagslegra og líkamlegra. Að því loknu kemur í ljós hvort einstaklingurinn telst vera í þörf, brýnni þörf
eða mjög brýnni þörf fyrir vistun. Vistunarmat er gert með tvö þjónustustig í huga, annars vegar þjónusturými og hins vegar hjúkrunarrými.
Hver er munurinn á hjúkrunarrými og þjónusturými?
Í hjúkrunarrými nýtur einstaklingurinn hjúkrunarþjónustu, læknisþjónustu og annarra þjónustu fagfólks. Dæmi um hjúkrunarrými er Víðihlíð. Í
þjónusturými er aðeins boðið upp á aðstoð við einstakling sem ekki er fær um eigið heimilishald. Dæmi um þjónusturými er Hlévangur.
Hvað eru raunverulega margir á biðlista?
Þann 1. apríl 2004 voru 30 manns á biðlista eftir hjúkrunarrými. Þar af voru 20 í mjög brýnni þörf. Þeir njóta flest allir góðrar þjónustu
heimahjúkrunar og fá auk þess heimilishjálp frá Félagsþjónustunni. Tveir einstaklingar hafa þegar afþakkað hjúkrunarrými og það er mat
heimahjúkrunar að aðeins þrír myndu þiggja hjúkrunarrýmið strax ef það væri í boði.
Þann 1. apríl 2004 voru 38 manns á biðlista eftir þjónusturými. Þar af voru 12 í mjög brýnni þörf. Þessir einstaklingar njóta jafnframt flestir
þjónustu heimahjúkrunar og Félagsþjónustunnar.
Þekking á málefnum aldraðra er skilyrði
Nú orðið má segja að vistunarskráin gefi ranga mynd af ástandinu. Ástæðan er sú að vistunarmatið tekur ekki tillit til þeirrar nútímakröfu að
öldruðum sé frekar tryggt að búa lengur heima heldur en að leggjast inn á stofnun. Glórulaust er að gjörólíkar tölur vistunarskrárinnar séu
lagðar saman. Jafnframt er mjög slæmt að menn leggi að jöfnu þörf, brýn þörf eða mjög brýn þörf”. Það er lykilatriði að allir sem fjalla um
málefni aldraðra þekki málaflokkinn, nútíma vinnubrögð og lög um málefni aldraðra.
WWW.HSS.IS
• Starfsemi HSS
• Fréttir
• Upplýsingar
• Fyrirspurnir
WWW.HSS.IS
15. tbl. 2004 umbrot 6.4.2004 13:02 Page 17