Víkurfréttir - 07.04.2004, Page 18
HEILBRIGÐISSTOFNUN SUÐURNESJA • SKÓLAVEGI 6 • 230 REYKJANESBÆ • WWW.HSS.IS • HSS@HSS.IS
Heilbrigðisstofnun Suðurnesja er í góðum höndum!
Heilbrigðisstofnun Suðurnesja er í góðum höndum!
Yfirlýsing frá stjórn Suðurnesjadeildar Félags íslenskra hjúkrunar-
fræðinga:
“Í kjölfar fjölmiðlaumfjöllunar síðustu vikna viljum við í stjórn
Suðurnesjadeildar hjúkrunarfræðinga lýsa fullum stuðningi og trausti til
stjórnenda HSS. Sú uppbygging sem átt hefur sér stað undanfarin
misseri, með tilkomu nýs framkvæmdastjóra, er unnin af heilum hug,
mikilli fagmennsku og þekkingu á heilbrigðismálum. Þar er tekið mið af
heildarhagsmunum íbúa svæðisins.
Í þeirri umræðu sem átt hefur sér stað er aldrei talað um hvert hlutverk
sjúkrahússins sé í heild sinni, heldur einungis einblínt á langlegudeild
fyrir aldraða. Við sem fagaðilar vitum að til að reka sjúkrahús þarf að
sinna breiðum hópi fólks en ekki einungis horfa bara á einn þátt.
Við biðjum því Suðurnesjabúa að staldra við og kynna sér málin til hlítar
áður en þeir mynda sér skoðun á þessu máli.”
Stjórn Suðurnesjadeildar hjúkrunarfræðinga:
Ástríður Vigdís Vigfúsdóttir.
Bryndís Sævarsdóttir.
Sveinbjörg Sigríður Ólafsdóttir.
Þórunn Agnes Einarsdóttir.
Ályktun læknaráðs 5. apríl 2004
Vegna fjölmiðlaumræðu undanfarna daga um öldrunarþjónustu á
Suðurnesjum ályktar læknaráð HSS eftirfarandi:
"Framkvæmdastjórn HSS framfylgir stefnu sem mörkuð var af fagaðilum
stofnunarinnar í samráði við heilbrigðisyfirvöld og miðar að því að veita
þá bestu þjónustu sem fjárlagarammi gerir kleift með sérstaka áherslu á
að auka þjónustu í heimabyggð við Suðurnesjamenn.
Hluti þeirrar stefnu er nútímaleg öldrunarþjónusta sem leitast við að gera
öldruðum kleift að eiga áhyggjulaust ævikvöld á heimilum sínum með
öflugri heimahjúkrun, endurhæfingu og skammtímainnlögnum þegar
sjúkdómar herja á.
Sjúkrarými stofnunarinnar er nýtt með þeim hætti sem læknar telja að
komi að sem bestum notum fyrir heildarhag sjúkra á Suðurnesjum. Mikil
efling bráðaþjónustu hefur valdið því að á hverjum tíma eru 15-20
Suðurnesjamenn inniliggjandi á HSS, sem annars hefðu þurft að liggja á
Landspítala með tilheyrandi óhagræði fyrir þá og aðstandendur þeirra.
Þessir sjúklingar eru á öllum aldri en flestir aldraðir.
Læknaráð lýsir óskoruðum stuðningi við framkvæmdastjórn HSS í
áframhaldandi uppbyggingu öflugrar heilbrigðisþjónustu á Suðurnesjum
og hvetur til samráðs við fulltrúa almennings."
Millistjórnendur HSS lýsa yfir stuðningi
Á fundi millistjórnenda Heilbrigðisstofnunar Suðurnesja með
framkvæmdastjórn stofnunarinnar 2. apríl var farið yfir fjölmiðlaum-
ræðu síðustu daga varðandi ráðstöfun sjúkrarúma í D-álmu og
heilsugæsluþjónustu. Fundurinn vill af þessu tilefni koma með
eftirfarandi ályktun:
“Fundur millistjórnenda HSS lýsir yfir fullum stuðningi við
framkvæmdastjórn HSS og Sigríði Snæbjörnsdóttur framkvæmdastjóra
í þeirri orrahríð sem nú stendur yfir. Á einu ári hefur tekist að manna
sex læknisstöður á heilsugæslunni og sjúkrahúsþjónusta hefur verið
stórefld. Þjónusta við aldraða hefur aldrei verið meiri og fjölbreyttari en
nú er og stefna stofnunarinnar er að sú þjónusta verði enn öflugri og í
takt við kröfur nútímans. Fundurinn vonar að umræðan verði málefna-
legri en verið hefur og friður skapist til þess að finna framtíðarlausn á
ágreiningsefnum”.
Sjúkraliðar styðja stefnu og stjórnun HSS
“Við starfandi sjúkraliðar á HSS lýsum yfir fullum stuðningi við stefnu og
stjórnun framkvæmdarstjóra og stjórnar HSS. Við vitum að í dag er
öldruðum sjúkum á svæðinu veitt þjónusta sem er með þeirri bestu á
landinu. Hér eru 2 hlýlegar og góðar hjúkrunar og langlegudeildir
Garðvangur og Víðihlíð, einnig mjög öflug heimahjúkrun. Á 5 daga deild
HSS og sjúkradeild D- álmu sinnum við margfalt fleirum öldruðum
sjúkum en hægt væri ef deildin væri eingöngu fyrir langlegusjúklinga og
það sem gleður okkur mest er að það er orðin undantekning sem áður
var regla að senda þurfi aldraða sjúka til Reykjavíkur.
Hér er að byggjast upp mjög öflugt sjúkrahús með fjölda faglærðra
starfsmanna auk sérfræðinga á ýmsum sviðum, sem lætur sér annt um
alla íbúa svæðisins.
Suðurnesjamenn staldrið við og íhugið málið, við viljum ekki afturhvarf
til þess tíma er svæðið var þjónustulaust.
Margt breytist á 25 árum og í ljósi þess biðjum við þá sem stóðu í því að
hrinda af stað byggingu D- álmu að líta frekar með stolti á stofnunina
eins og hún er rekin í dag en ekki sem pólitískt bitbein, því þið lögðuð
grunn að ekki eingöngu margfalt betri þjónustu við aldraða heldur allra
íbúa svæðisins. Með kveðju, sjúkraliðar HSS.”
15. tbl. 2004 umbrot 6.4.2004 13:02 Page 18