Morgunblaðið - 05.12.2018, Blaðsíða 11

manna þingflokkanna í gær [fyrra-
dag]. En ég er hætt að vera hrædd
við að gráta. Það er alltaf ætlast til
þess að fólk fari allt á hnefanum og
sýni hvorki tilfinningar né veik-
leikamerki. Af hverju má ekki sýna
tilfinningar?“
Baktal ekki daglegt brauð
Haft hefur verið eftir Sigmundi
Davíð, formanni Miðflokksins, að
baktal og fúkyrði séu hluti af dag-
legum störfum Alþingis. Er það þín
upplifun? „Nei, ekki almennt. Það
kemur fyrir, en er ekki hluti af dag-
legum störfum þingsins. en ég veit
til þess og það sem ég er að tala um
eru samkvæmi og slíkt. Ég hef
heyrt sögur, því miður, um þing-
menn við slíkar aðstæður. En ég er
tiltölulega ný á þingi og hef ekki
upplifað það sem betur fer. En ég
hef þó heyrt hvernig fólk talar við
slíkar aðstæður. Þingmenn tjá sig
oft frjálslega á opinberum vett-
vangi, m.a. á facebook og oft eru það
orð og ummæli um persónur sem
sýna mætti meiri nærgætni.
Kannski er þetta svona í tilteknum
hópum. Að mínu mati einkennast
dagleg störf Alþingis af heilindum
og ég hef fundið það undanfarna
daga að fólk er sérlega elskulegt
hvað við annað. Það eru þó und-
antekningar þar á, ein þeirra er að
Þórunn Egilsdóttir, þingmaður
Framsóknarflokksins, hefur gengið
hart fram um og talað fyrir því að
ég fari frá sem formaður Jafnréttis-
sjóðs. Það er eitt sem þarf að hafa í
huga varðandi þessi ummæli Sig-
mundar Davíðs og það er að hann
hefur verið talsvert lengur á þingi
en ég, og hefur líklega upplifað
ýmislegt og ekki allt jákvætt.“
Þú segir að þú upplifir vinnu-
menninguna á Alþingi ekki með
þessum hætti. En er það daglegt
orðfæri þessa hóps sem þú sast með
á Klaustri að kalla konur kuntur og
tíkur og raða þeim á lista eftir útliti?
„Nei. Ég hef aldrei upplifað það í
þessum hópi. Aldrei.“
Var allt það sem greint hefur
verið frá í fréttum sagt þarna um
kvöldið? Var eitthvað af því slitið úr
samhengi? „Ég hef ekki heyrt upp-
tökurnar í heild sinni og get ekki
fullyrt neitt um það. Ég get því
heldur ekki sett hluti í samhengi, þó
það gæti hugsanlega skýrt stöðu
annarra sem þarna voru.“
Órög við að biðjast afsökunar
Meðal þeirra ummæla sem vakið
hafa athygli eru orð Gunnars Braga
um sendiherraskipan og að hann
telji sig eiga inni greiða hjá Sjálf-
stæðisflokknum vegna skipunar
Geirs H. Haarde í embætti sendi-
herra Íslands í Bandaríkjunum.
Spurð hvort slíkar embættisfærslur
fari að öllu jöfnu fram eins og hann
lýsti þeim segist Anna Kolbrún ekki
getað svarað því. „Ég hef einfald-
lega ekki hugmynd um það.“
Heldurðu að þeir Gunnar Bragi
og Bergþór eigi afturkvæmt á þing?
„Ég veit það ekki. Það er ekki mitt
að segja til um það. Þeir eru að
vinna í sínum málum og ég vil gefa
þeim svigrúm til þess.“
Í upphafi þingfundar á mánudag-
inn bað Steingrímur J. Sigfússon,
forseti Alþingis, þjóðina afsökunar
á framferði þingmannanna sex fyrir
hönd þingsins. Spurð hvort ekki
væri nær að sexmenningarnir
gerðu það sjálfir segir Anna Kol-
brún að það hafi hún þegar gert.
Bæði í sjónvarpsviðtali á RÚV og í
samtölum sínum við allflesta þeirra
sem um var rætt í téðu samtali.
„Ég er búin að segja að ég sjái
mjög mikið eftir því sem þarna fór
fram. Ég er ekki rög við að biðjast
afsökunar og ég skil alla þá sem líð-
ur illa yfir því sem sagt var á
Klaustri.“
Umdeilt selahljóð
Talsvert hefur verið fjallað um
hljóð, sem líkist hljóði sels, sem
heyrist á upptökunni þegar verið
var að ræða um Freyju Haralds-
dóttur, sem barist hefur fyrir rétt-
indum fatlaðs fólks. Sigmundur
Davíð sagði í viðtali á Stöð 2 í fyrra-
kvöld að um væri að ræða eitthvert
umhverfishljóð, annaðhvort væri
verið að draga til stól eða hugsan-
lega hefði reiðhjól bremsað fyrir ut-
an glugga Klausturs og sagðist
ekki kannast við að neinn við-
staddra hefði vísvitandi gefið frá
sér selahljóð.
Anna Kolbrún tekur undir þetta:
„Hverjum datt í hug að velta fyrir
sér hugtakinu selur og tengja það
við Freyju Haraldsdóttur? Hvaða
fordómum býr sá yfir sem skrifaði
fyrstu fréttina um það?“ spyr hún.
Kom þetta hljóð úr barka ein-
hvers ykkar þingmannanna? „Nei,
ég veit ekki til þess.“
Var sögð þroskaþjálfi
Fram kom í fréttum í gær að
Þroskaþjálfafélag Íslands hefði til-
kynnt til Embættis landlæknis að
Anna Kolbrún væri sögð þroska-
þjálfi í ferilskrá sinni á vefsíðu Al-
þingis, en hún hefur ekki slíka
menntun.Einnig var greint frá því í
fréttum að hún væri á sömu síðu
sögð hafa verið ritstjóri Glæða, sem
er fagtímarit sérkennara, en hið
rétta er að hún sat í ritnefnd tíma-
ritsins. Síðar um daginn tilkynnti
forseti Alþingis að ekki væri við
Önnu Kolbrúnu að sakast, heldur
hefði skrifstofa Alþingis skráð inn
rangar upplýsingar.
Þegar Anna Kolbrún bauð sig
fram fyrir Framsóknarflokkinn í
Norðausturkjördæmi fyrir alþing-
iskosningarnar 2007 var hún sögð
vera þroskaþjálfi á framboðslist-
anum. Spurð hverju það sæti segir
hún að það hafi líklega verið vegna
þess að hún hafi sinnt slíku starfi í
Síðuskóla á Akureyri. Sjálf hafi hún
aldrei haldið því fram að hún sé
þroskaþjálfi. En hvernig stendur þá
á þessu? „Frambjóðendur þurftu að
tiltaka við hvað þeir störfuðu og í
mínu tilviki var ég ráðin í stöður
þroskaþjálfa og fagstjóra sér-
kennslu yngsta stigs í grunnskóla.“
Tekur ekki skellinn fyrir aðra
Könnun sýnir að 74% landsmanna
vilja að þú segir af þér þing-
mennsku, um síðustu helgi var hald-
inn fundur á Austurvelli þar sem þú
og hinir fimm voruð hvött til að
stíga til hliðar. Viltu vera þingmaður
áfram á þessum forsendum? „Ég er
mannleg og geri mistök. Ég þarf að
lifa með því og ætla mér að læra af
þeim mistökum, en ég tek mig jafn-
framt hafa margt fram að færa. Og
ég er ekki tilbúin til að taka á mig
skellinn fyrir ummæli annarra.“
Siðanefnd Alþingis hefur fengið
málið til meðferðar og hefur kallað
eftir upptökunum. Verði úrskurður
nefndarinnar sá að þú hafir brotið
siðareglur Alþingis - hvað ætlarðu
þá að gera? „Þá kemur upp ný staða
sem ég þarf að takast á við.“
Fylgið hrynur
Miðflokkurinn mældist þriðji
stærsti flokkur landsins fyrir rúm-
um hálfum mánuði. Síðan fréttir
bárust af Klausturmálinu hefur fylgi
flokksins hrunið, tveir þingmenn
farnir í ótímabundið leyfi og nýir
þingmenn komnir inn í staðinn.
Hvernig líður ykkur í þingflokki
Miðflokksins með þetta? „Stemn-
ingin hefur vissulega verið erfið og
örugglega erfitt fyrir nýtt fólk að
koma inn við þessar aðstæður. Það
er vel skiljanlegt. Það sem mestu
skiptir er þó að hafin hefur verið
vinna innan hópsins til að byggja
upp traust að nýju. Við höfum öll
fengið aðstoð og hjálp fagfólks sem
mun vinna með okkur áfram.“
Er komin að niðurstöðu
Fyrstu fréttir af málinu birtust
fyrir um viku síðan, miðvikudaginn
28. nóvember. Síðan þá hefurðu
sagst vera að hugsa þinn gang og
raunar gengið lengst í því að gang-
ast við ábyrgð af ykkur sex. Er
þetta ekki orðinn býsna langur um-
hugsunartími? „Það, að ég hafi verið
að hugsa minn gang, þýðir ekki að
ég hafi verið að hugsa um að segja
af mér, heldur var ég að hugsa um
hvernig mér gæti liðið með þetta
allt saman. En auðvitað hef ég íhug-
að að segja af mér.“
Ertu komin að niðurstöðu? „Já.“
Ætlarðu að segja af þér? „Nei.“
FRÉTTIR 11Innlent
MORGUNBLAÐIÐ MIÐVIKUDAGUR 5. DESEMBER 2018
Opið virka daga 10.00 - 18.15 laugardaga 11.00 - 14.00 | Gnoðarvogi 44, 104 Reykjavík | sími: 588 8686
JÓLAHUMARINN ER KOMINN
Gómsætir og girnilegir réttir í fiskborði beint í ofninn
N FRÁ
STÓR KANADÍSKUR HUMARGLÆNÝ LÚÐA
ÞORSKHNAKKAR
NÝLÖGUÐ HUMARSÚPA
SALTFISKHNAKKAR
LÖNGUNAKKAR
Í JAPÖNSKUM RASPI
Anna Kolbrún greindist með krabbamein í brjósti árið 2011 og hefur verið
í meðferðum við því, með hléum, síðan þá. Síðan þá hefur það dreift sér
„um allt“ eins og hún kemst sjálf að orði; í kringum hjarta, í eitla, kviðar-
hol og í lífhimnu. Hún er nýbyrjuð í meðferð og hyggst nýta jólafríið til
þess.
„Ég er með 4. stigs krabbamein. En ég tala aldrei um það, mér finnst
það í sjálfu sér ekki koma þessu máli neitt við. Ég vil bara fá að vera
manneskja; ég er kona með krabbamein en ég er ekki krabbameinið,“
segir Anna Kolbrún.
„Ég er ekki krabbameinið“
ANNA KOLBRÚN HEFUR BARIST VIÐ ILLVÍGT MEIN Í SJÖ ÁR