Feykir - 23.10.2019, Síða 3
Grunnskólinn austan Vatna
Fjölbreytt vinna með
áhugasviðsþema
Dagana 7. – 10. október voru þemadagar í
Grunnskólanum austan Vatna. Í þemanu var
lögð áhersla á að vinna út frá áhugasviði
nemenda en samhliða vinnu við
áhugasviðsverkefni voru nemendur í
danskennslu. Þetta er annað árið í röð sem
unnið er með áhugasviðsþema í skólanum.
Til viðbótar við þemavinnu- og danskennslu
sátu nemendur 9. og 10. bekkjar
skyndihjálparnámskeið í boði Rauða krossins
í Skagafirði og var námskeiðið í umsjón Karls
Lúðvíkssonar.
Í þemavinnunni er lögð áhersla á
skapandi og gagnrýna hugsun, nýtingu
miðla og upplýsinga, tjáningu og miðlun,
sjálfstæði og samvinnu sem og ábyrgð á eigin
námi. Þar sem því er viðkomið er reynt að
efla tengsl skólans við atvinnulífið á svæðinu.
Að þessu sinni voru nemendur meðal annars
í samstarfi við bændur, hestamenn,
bifvélavirkja og hárgreiðslukonu.
Nemendur velja sér viðfangsefni út frá
eigin áhugasviði og síðan skila þeir af sér
verkefnum með mismunandi hætti, allt eftir
áhugasviði, færni og hæfileikum hvers og
eins. Unnið er út frá ákveðnu vinnuferli þar
sem nemendur skilgreina verkefnin sín,
ígrunda hvernig þeir geta nýtt bak-
grunnsþekkingu sína ásamt því að velta fyrir
sér hvers konar og hvaða upplýsinga þeir
þurfa að afla. Nemendur þurfa einnig að
gera grein fyrir því í upphafi vinnunnar
hvers konar afrakstri þeir ætla að skila eftir
vikuna. Í lokin meta bæði kennarar og
nemendur vinnuna með sjálfsmati og eftir
hæfniviðmiðum skólans.
Nemendur skiluðu mjög fjölbreyttum og
skemmtilegum verkefnum. Sem dæmi um
verkefni sem nemendur unnu í vikunni eru
myndbönd um kökubakstur –og skreytingar,
gildrusmíðar, forritun, kennslumyndbönd í
hárgreiðslu, listmálun, stærðfræðiæfingar,
ýmis konar fræðsluefni um landbúnað,
tígrisdýr, hestamennsku, reykingar og vape,
vörubíla og fleira. /Sigurlaug Rún Brynleifsdóttir
Sóknaráætlun 2020-2024
Íbúar Norðurlands vestra
móta framtíð landshlutans
Ný Sóknaráætlun Norðurlands vestra fyrir árin
2020-2024 var samþykkt samhljóða á haustþingi
samtakanna sem fram fór þann 18. október sl. á
Sauðárkróki og hefur vinna við gerð áætlunarinnar
staðið yfir frá því á vordögum.
Á heimasíðu SSNV kemur fram að lögð afi verið rík
áhersla á víðtækt samráð við íbúa og aðra hagaðila og
mætti ætla að vel á fimmta hundrað manns hafi komið
að gerð áætlunarinnar með einum eða öðrum hætti.
Í áætluninni er unnið úr frá fjórum lykilmálaflokkum:
Atvinnuþróun og nýsköpun, menningarmálum,
umhverfismálum og að síðustu menntun og
lýðfræðilegri þróun. Í hverjum málaflokki eru sett
markmið og jafnframt tilgreind dæmi um aðgerðir.
Úthlutunarferli Uppbyggingarsjóðs fer af stað strax í
kjölfar samþykktarinnar og er frestur til að skila inn
umsóknum til 20. nóvember. Jafnframt verður farið í að
skilgreina áhersluverkefni til næstu ára út frá
áætluninni.
Unnur Valborg Hilmarsdóttir, framkvæmdastjóri
SSNV, segir nýja sóknaráætlun metnaðarfullt plagg
sem muni, ef vel er haldið á spöðum, skila
landshlutanum miklum ávinningi. „Það víðtæka
samráð sem viðhaft var gefur áætluninni aukið vægi
enda í henni áherslur íbúa í forgrunni,“ er haft eftir
Unni á ssnv.is en þar er hægt að fræðast nánar um
áætlunina. /PF
Landsfundur Vinstri grænna
Rúnar Gíslason
nýr gjaldkeri
Á landsfundi Vinstrihreyfingarinnar
– græns framboðs sem haldinn var
á Grand hóteli um helgina var kjörin
ný stjórn flokksins. Alls barst 21
framboð í stjórn en hún er skipuð
ellefu aðalmönnum og fjórum
varamönnum.
Rúnar Gíslason, lögreglumaður
á Norðurlandi vestra, var á meðal
frambjóðenda í gjaldkerastöðuna
og hlaut kosningu. „Ég hef haft
mikla ánægju af að starfa innan VG
til þessa og trúi að ég geti komið að
frekara gagni. Það er ástæðan fyrir
þessari framhleypni,“ sagði Rúnar í
framboðstilkynningu sinni. Bjarni
Jónsson, sveitarstjórnarfulltrúi Svf.
Skagafjarðar situr í varastjórn.
Katrín Jakobsdóttir var endurkjörin
formaður flokksins en hún hefur
verið formaður frá árinu 2013.
Guðmundur Ingi Guðbrandsson,
umhverfis- og auðlindaráðherra, er
nýr varaformaður. Katrín hlaut 187
atkvæði eða öll greidd atkvæði.
Guðmundur Ingi hlaut 187 atkvæði
af 192 greiddum atkvæðum. Fimm
skiluðu auðu.
Ingibjörg Þórðardóttir er nýr
ritari hreyfingarinnar. Ingibjörg
hlaut 119 atkvæði af 192. Una
Hildardóttir sem einnig var í
framboði hlaut 72 atkvæði. Einn
skilaði auðu.
Eins og áður segir er Rúnar
Gíslason nýr gjaldkeri hreyfingar-
innar. Rúnar hlaut 117 atkvæði af
192. Ragnar Auðun Árnason sem
einnig var í framboði hlaut 69
atkvæði. Sex skiluðu auðu. /PF
Rúnar Gíslason. MYND AF FACEBOOK
Líður að lokum sláturtíðar
Meðalfallþungi 16,6 kg hjá KS
Nú fer að líða að lokum sláturtíðar hjá Kjötafurðastöð
Kaupfélags Skagfirðinga líkt og hjá öðrum
sláturleyfishöfum og í kjölfarið hefast hrossa- og
folaldaslátrun.
Á heimasíðu KS kemur fram að sláturtíðin hafi
gengið vel það sem af er en fyrir síðustu helgi var búið
að slátra um 85 þúsund fjár þegar tvær vikur voru eftir
af vertíðinni. Meðalþyngd dilka er 16,6 kg, einkunn
fyrir gerð er 9,31 og 6,25 fyrir fitu. Í fyrra endaði
sláturtíðin í einkunn fyrir gerð 9,18 og 6,38 fyrir fitu og
meðalþyngdin í 16,7 kg.
Búið er að gefa út verðskrá fyrir hrossaafurðir og
fást 320 kr. fyrir kílóið af innlögðu folaldi og 120 kr. fyrir
fullorðið hross. Verðið getur svo hækkað í 140 kr/kg
fyrir þau hross sem veljast á Japansmarkað en þau eru
sérvalin, vöðvar vel fitusprengdir og er eingöngu slátrað
á mánudögum. /PF
40/2019 3