Bæjarins besta - 27.11.2002, Blaðsíða 3

MIÐVIKUDAGUR 27. NÓVEMBER 2002 3
Byggðasafn Vestfjarða í Neðstakaupstað á Ísafirði
Jón Þ. Þór flytur erindi
um Ásgeirsverslun
– elstu símtæki landsins jafnframt tekin fram til sýningar
„Ásgeirsverslun og sjálf-
stæðisbaráttan“ er heiti á er-
indi sem Jón Þ. Þór sagn-
fræðingur flytur í Tjöruhús-
inu á Ísafirði á laugardag.
Þetta verður þriðji og síðasti
viðburðurinn sem Byggða-
safn Vesfjarða stendur fyrir
til að minnast þess að 150
ár eru liðin frá stofnun Ás-
geirsverslunar, hins sögu-
fræga og umsvifamikla fyr-
irtækis á Ísafirði. Ásgeir
kaupmaður Ásgeirsson eldri
var stuðningsmaður og vel-
gjörðamaður Jóns Sigurðs-
sonar og þótti það nokkur
kaldhæðni þegar Ásgeirs-
verslun var lögð niður 30.
nóvember 1918, daginn áður
en Ísland varð fullvalda ríki.
Jón Þ. Þór er höfundur stór-
virkisins Saga Ísafjarðar og
Eyrarhrepps hins forna, sem
Sögufélag Ísfirðinga gaf út í
fjórum bindum á sínum tíma.
Í erindi sínu sem hefst kl. 16 á
laugardag fjallar hann um
tengsl Ásgeirsverslunar við
Jón Sigurðsson og sjálfstæðis-
baráttuna á 19. öld. Léttar veit-
ingar verða á borðum fyrir þá
sem þess óska.
Við þetta tækifæri verða
jafnframt tekin til sýningar hin
gömlu talsímatæki Ásgeirs-
verslunar. Árið 1889 lét fyrir-
tækið leggja fyrstu símalínu á
Íslandi og náði hún frá Fakt-
orshúsinu í Neðstakaupstað
upp í verslunarhúsið að Að-
alstræti 15. Verk þetta vann
Guðmundur Pálsson beykir
á Ísafirði. Hann var einnig
að verki þremur árum síðar,
þegar sýslunefnd Ísafjarðar-
sýslu lét að frumkvæði
Skúla Thoroddsens sýslu-
manns leggja talsímalínu
eða „málþráð“ milli Ísa-
fjarðar og Hnífsdals. Mætti
Guðmundur með réttu kall-
ast fyrsti íslenski símamað-
urinn, þótt ekki hafi hann
lært þau fræði sérstaklega.
Þess má geta, að Ísland mun
hafa verið eina landið þar
sem talsími kom til sög-
unnar á undan ritsíma.
Fyrsti íslenski símamaður-
inn, Guðmundur Pálsson
beykir á Ísafirði.
Akstur nemenda á Suðureyri til íþróttakennslu á Ísafirði
Peningunum betur varið í lag-
færingar á félagsheimilinu
„Að mati undirritaðra er fyr-
irhugaður akstur nemenda í
íþróttahús á Ísafirði til íþrótta-
kennslu óásættanlegur kostur,
bæði fyrir nemendur og for-
eldra. Stundaskrá nemenda
raskast allverulega, auk þess
sem tónlistarkennsla og ýmis
skipulögð félagsstörf þeirra
eru í uppnámi. Með lausn
þessara mála til lengri tíma
óskum við undirrituð eftir að
byggingu íþróttahúss á Suð-
ureyri verði hraðað“, segir í
bréfi sem bæjarráði Ísafjarðar-
bæjar barst frá forsvarsmanni
Foreldrafélags Grunnskólans
á Suðureyri og tveimur fulltrú-
um í foreldraráði skólans.
„Allverulegur kostnaður
hlýst af fyrirhugðum akstri.
Teljum við að fjármunum
þeim væri betur varið til lag-
færinga á félagsheimili Súg-
firðinga svo hægt sé að kenna
íþróttir þar til bráðabirgða,
þ.e.þar til nýtt hús rís. Þá fer
ýmis önnur starfsemi skólans
fram í félagsheimilinu, svo
sem diskótek, barnaskemmt-
un, leiksýningar, danskennsla,
öskudagsskemmtun o.fl. því
enginn salur er í skólanum.
Þá er rétt að minna á, að fé-
lagsheimilið er nýtt fyrir aðra
starfsemi ýmissa félaga og
hvers konar mannamót og þarf
því að vera í boðlegu standi.
Félagsheimilið er menningar-
hús og samkomustaður í
hjarta bæjarins“, segir í bréf-
inu.
Samkvæmt heimildum
blaðsins stóð foreldraráð
Grunnskólans á Suðureyri
ekki óskipt að þessu bréfi enda
munu skiptar skoðanir um
áherslur í þessum málum.
Bæjarráð Ísafjarðarbæjar vís-
aði erindi þessu til fræðslu-
nefndar bæjarins en tók ekki
afstöðu til þess.
Bikarkeppni Sundsambands Íslands
Vestri sigraði
í 2. deildinni
Sundfélagið Vestri sigraði
2. deild Bikarkeppni Sund-
sambands Íslands 2002 um
helgina eftir hörkukeppni við
Óðin á Akureyri og Ung-
mennafélag Laugdæla. Þar
með vann Vestri sig upp í
fyrstu deild á ný eftir langa
bið. Keppnin var geysilega
spennandi á lokasprettinum
og skiptust félögin þrjú á að
leiða síðari daginn. Sundfólk-
ið úr Vestra náði hins vegar
forystunni fyrir boðsundin og
lét hana ekki úr hendi eftir
það.
„Þetta er glæsilegur árangur
því að Vestri hefur ekki verið
í 1. deild frá því árið 1991.
Þetta var mjög hörð sund-
keppni alla helgina. Vestri vill
koma miklu þakklæti til allra
þeirra sem gerðu þennan sigur
að veruleika“, segir Ingi Þór
Ágústsson, yfirþjálfari hja
Sundfélaginu Vestra.
Lið frá fimmtán félögum
kepptu í annarri deildinni.
Sundfélagið Vestri fékk
19.370 stig, Óðinn varð í öðru
sæti með 18.793 stig og
Laugdælir urðu í því þriðja
með 18.590 stig. Í fyrra varð
Vestri í 2. sæti í 2. deild en
aðeins efsta liðið vinnur sig
upp um deild.
Húsfyllir var í Menningarmiðstöðinni Edinborg.
Bókmenntadagskráin Opin bók
Húsfyllir í Menningar-
miðstöðinni Edinborg
Opin bók, árleg bók-
menntavaka Edinborgar á
Ísafirði, var haldin á laugar-
dag. Fullur salur áhorfenda
fylgdist með upplestri séra
Arnar Bárðar Jónssonar, dr.
Más Jónssonar, Sigurbjarg-
ar Þrastardóttur, Andra
Snæs Magnasonar, Hörpu
Jónsdóttur og Þorsteins
Guðmundssonar. Að sögn
Margrétar Gunnarsdóttur
hjá Menningarmiðstöðinni
Edinborg voru gestir jafnt
sem fyrirlesarar ánægðir
með daginn. „Þetta gekk vel
og það var fullur salur af
fólki í Edinborgarhúsinu“,
segir Margrét.
Már Jónsson sagnfræð-
ingur flutti erindi og las upp
úr bók sinni Til merkis mitt
nafn. Sigurbjörg Þrastar-
dóttir las úr verðlaunabók
sinni Sólar sögu og séra Örn
Bárður úr smásagnasafninu
Íslensk fjallasala og fleiri
sögur. Þá las Andri Snær úr
nýrri bók sinni Lovestar,
Þorsteinn Guðmundsson
las úr Hundabókinni og
Harpa Jónsdóttir úr barna-
bókinni Ferðin til Samiraka,
en fyrir hana hlaut hún Ís-
lensku barnabókaverðlaun-
in í ár.
Nokkrir gestanna á bókmenntakynningunni.
Eignarnám húsa vegna snjóflóðavarna í Bolungarvík
Eigendum boðnir samningar með
fyrirvara um dómsniðurstöður
– Ofanflóðasjóður knýr bæinn til að fara með málið fyrir dómstóla
Bæjarstjórn Bolungarvíkur
býður þeim sem þurfa að sæta
eignarnámi íbúðarhúsa sinna
vegna fyrirhugaðra snjóflóða-
varna í Bolungarvík að ganga
til samninga á grundvelli mats
Tryggva Guðmundssonar og
Gunnars Torfasonar frá því í
fyrravor. Eigendum húsanna
er gert þetta boð „þar sem
ljóst er að enn um sinn mun
dragast að full málalok náist í
þessu viðkvæma máli“. Áður-
nefnt mat er mun lægra en
síðara mat sem matsnefnd
eignarnámsbóta gerði. Því
mati vill Ofanflóðasjóður ekki
una nema á það reyni fyrir
dómstólum.
Í bókun bæjarstjórnar segir
jafnframt, að hún sjái sig
knúna til að skjóta úrskurði
matsnefndarinnar til dóm-
stóla. Bæjarstjórnin gerir þann
fyrirvara við tilboð sitt um
samninga, að lokauppgjör fari
eftir dómsniðurstöðum, hverj-
ar sem þær verða.
Eins og áður hefur komið
fram hefur Ofanflóðasjóður
stillt bæjaryfirvöldum upp við
vegg í þessu máli. Sjóðurinn
hefur ákveðið að greiða lög-
bundna hlutdeild í lægra mat-
inu á móti Bolungarvíkur-
kaupstað en neitar að greiða
samkvæmt úrskurði mats-
nefndar eignarnámsbóta nema
málið fari fyrir dómstóla. Hér
veltur á nokkrum tugum millj-
óna fyrir Bolungarvík.