Fréttablaðið - 25.02.2022, Blaðsíða 11

Guðmundur
Steingrímsson
n Í dag
Aðalfundur Sýnar hf.
Aðalfundur Sýnar hf. verður haldinn föstudaginn 18. mars 2022 kl. 15:00. Fundurinn verður rafrænn og honum
streymt frá Suðurlandsbraut 8, 108 Reykjavík, en hluthafar sem það kjósa eru jafnframt velkomnir á fundarstað.
Upplýsingar fyrir hluthafa:
Heildarfjöldi hluta í félaginu hinn 18. febrúar 2022 er 296.441.474
hlutir og jafnmörg atkvæði.
Aðrar upplýsingar:
Stjórn Sýnar hf. hefur ákveðið að aðalfundurinn verði rafrænn, þ.e.
hluthafar munu taka þátt í fundinum með rafrænum hætti gegnum
aðalfundarkerfi Lumi AGM. Rafræn þátttaka mun því jafngilda
mætingu á fundinn og veita þátttöku í honum að öðru leyti.
Hluthafar eða umboðsmenn hluthafa sem hafa hug á að sækja
fundinn, hvort sem þeir ætla að mæta á fundarstað eða fylgjast
með fundinum í vefstreymi, þurfa að skrá sig til að nálgast
aðgangsupplýsingar á vefsvæðinu: lumiconnect.com/meeting/syn
Skráning fer eingöngu fram með þessum rafræna hætti. Hluthafar
eru beðnir um að skrá sig tímanlega á fundinn og eigi síðar en kl.
18:00 þann 17. mars 2022, daginn fyrir fundardag, þar sem ekki er
hægt að tryggja aðgang að fundinum berist skráning eftir þann tíma.
Þeir sem skrá sig til fundar með rafrænum hætti fá aðgang að streymi
af fundinum, geta kosið rafrænt og borið upp skriflegar spurningar.
Atkvæðagreiðsla á fundinum mun eingöngu fara fram í gegnum
aðalfundakerfi Lumi AGM. Allir hluthafar, hvort sem þeir mæta til
fundarins á fundarstað eða taka þátt með rafrænum hætti, geta greitt
atkvæði í gegnum vefslóð Lumi AGM á tölvu eða spjaldtölvu. Nánari
upplýsingar um skráningu á fundinn og rafræna þátttöku verður að
finna á heimasíðu félagsins: syn.is/fjarfestatengsl/adalfundur
Hluthafi getur látið umboðsmann sækja hluthafafund fyrir sína hönd.
Umboðsmaður skal leggja fram skriflegt eða rafrænt umboð og skal
það dagsett. Umboðum skal skila við skráningu á fundinn á slóðinni:
lumiconnect.com/meeting/syn
Óski hluthafi eftir að koma máli eða tillögu á dagskrá aðalfundar skal slík
beiðni koma fram eigi síðar en tveimur vikum fyrir aðalfund, eða fyrir kl. 15:00
föstudaginn 4. mars 2022.
Skjöl og tillögur sem lagðar verða fyrir aðalfund verður að finna á vefsíðu
félagsins syn.is/fjarfestatengsl/adalfundur. Fundurinn fer fram á íslensku
og verða fundargögn jafnframt að mestu leyti á íslensku.
Endanleg dagskrá og tillögur verða birtar tveimur vikum fyrir fundinn.
Sérstök tilnefningarnefnd hefur verið að störfum í samræmi við starfsreglur
stjórnar og tilnefningarnefndar. Hluthafar og aðrir sem óska eftir tilnefningu
nefndarinnar til framboðs til stjórnar að aðalfundi félagsins hafa átt
þess kost að koma áhuga sínum og eftir atvikum framboði á framfæri
við nefndina. Skýrsla tilnefningarnefndar er send kauphöll samhliða
fundarboði þessu. Tveir stjórnarmanna, Sigríður Vala Halldórsdóttir og
Tanya Zharov, hafa ákveðið að gefa ekki kost á sér til áframhaldandi
stjórnarsetu. Með fyrirvara um að stjórn staðfesti lögmæti hlutaðeigandi
framboða leggur tilnefningarnefnd til að eftirfarandi frambjóðendur, í
stafrófsröð, verði kosnir í aðalstjórn félagsins á aðalfundi: Hjörleifur Pálsson,
Magnús Geir Þórðarson, Páll Gíslason, Petrea Ingileif Guðmundsdóttir og
Sesselía Birgisdóttir. Jafnframt leggur nefndin til að þau Óli Rúnar Jónsson
og Salóme Guðmundsdóttir verði kjörin til setu í varastjórn.
Eftir sem áður er unnt að tilkynna um framboð til stjórnar skriflega
minnst fimm sólarhringum fyrir aðalfund, sbr. 63. gr. a. hlutafélagalaga
nr. 2/1995 eða fyrir kl. 15 mánudaginn 14. mars 2022. Framboð
skulu berast á netfangið: tilnefningarnefnd@syn.is
Í samræmi við starfsreglur stjórnar og starfsreglur
tilnefningarnefndar gefst hluthöfum tækifæri til að kjósa tvo
af þremur fulltrúum í tilnefningarnefnd. Framboðsfrestur til
tilnefningarnefndar er til kl. 15 mánudaginn 14. mars 2021 og ber
að skila framboðum á netfangið: tilnefningarnefnd@syn.is
Reglur um stjórnarkjör gilda eftir því sem við getur átt um kosningu
tilnefningarnefndarfulltrúanna.
Endanlegar upplýsingar um frambjóðendur til stjórnar verða birtar
eigi síðar en tveimur dögum fyrir aðalfund.
Allar nánari upplýsingar verður að fi nna á heimasíðu félagsins
syn.is/fjarfestatengsl/adalfundur. Aðalfundur og helstu
fundargögn verða á íslensku.
Stjórn Sýnar hf.
Dagskrá fundarins:
1. Skýrsla stjórnar félagsins um starfsemi þess á liðnu starfsári.
2. Ársreikningur félagsins fyrir liðið starfsár lagður fram til staðfestingar.
3. Ákvörðun um hvernig skuli fara með afkomu félagsins á reikningsárinu 2021
4. Tillaga um lækkun hlutafjár vegna kaupa á eigin hlutum
5. Tillaga um breytingar á samþykktum félagsins, sem felur í sér:
a) Að lækka hlutafé félagsins vegna kaupa á eigin hlutum
b) Að heimila félaginu kaup á eigin hlutum, sem verður viðauki við samþykktirnar.
6. Tillaga um stefnu um arðgreiðslur og/eða endurkaup eigin hluta.
7. Tillaga um starfskjarastefnu félagsins.
8. Ákvörðun um þóknun til stjórnarmanna fyrir komandi starfsár.
9. Kosning stjórnar félagsins.
10. Kosning tveggja fulltrúa í tilnefningarnefnd félagsins í samræmi við starfsreglur stjórnar
og starfsreglur tilnefningarnefndar.
11. Kosning endurskoðenda félagsins.
12. Önnur mál löglega upp borin.
Sýn hf. Suðurlandsbraut 8 108 Reykjavík Sími 599 9000 Kennitala: 470905-1740
Krossgötur. Það orð kom fyrst upp
í hugann í gærmorgun. Veðrið
var loksins þokkalegt á milli
tveggja storma. Heiðskír himinn
yfir snævi þakinni jörð. Í kjölfar
frétta af afléttingum sóttvarna­
ráðstafana vafraði hugurinn yfir
kaffibollanum til baka tvö ár, til
febrúarloka árið 2020, þegar fyrsta
smitið greindist á Íslandi og blaða­
mannafundur var haldinn sem
þróaðist fljótt upp í einhvers konar
útgáfu af samkvæmisleiknum
„Hver er maðurinn?“. Ég man að
mér fannst það smá spaugilegt,
þótt tíðindin hafi verið uggvænleg.
Og ég hugsaði líka til baka til fyrir­
sagnarinnar í bresku götublaði
sem ég rak augun í á ferðalagi um
London þá nokkru fyrr, í janúar­
lok, um að „Killer virus“ væri
kominn til Bretlands. Ég man að
mér fannst það svolítið æsifrétta­
legt.
En svo tóku við tvö undarleg
ár. Fordæmalausir tímar, var jú
sagt, svolítið oft. Minningarnar
eru enn í úrvinnslubakkanum í
heilabúinu. Maður er enn að melta
þetta, giska vankaður; allar þessar
nýju aðstæður sem tóku við og
hafa verið hluti af daglegu lífi í
þessi tvö ár. Maður að tala við vin á
förnum vegi í roki og passa sig á að
fara ekki nær honum en tvo metra.
Maður að tala við fólk af svölunum
í sjálfskipaðri sóttkví í fyrstu
bylgju. Maður í jólabúbblu. Maður
að ferðast innanhúss um páskana,
að kaupa mat fyrir smitaða vini
og setja á útidyratröppurnar, að
gúggla muninn á KN95­grímum
og FFP2­grímum, að uppgötva með
sjálfum sér nýyrðið cóviti á sama
tíma og allir aðrir. Að hætta við
matarboð út af því að samkomu­
takmarkanir fóru niður í 10. Að
horfa á upplýsingafund.
Krossgötur. Í þeirri sömu andrá
og hugurinn vafrar ljúfsár en von­
góður um þessi furðulegu tvö ár
sem liðin eru í heimsfaraldri — á
þessum ánægjulegu tímamótum
afléttinga — kallar annað óneitan­
lega á athyglina líka á þessari
stundu, svo tilfinningarnar eru æði
blendnar. Það er erfitt að átta sig á í
hvorn fótinn eigi að stíga, tilfinn­
ingalega. Er bjartsýni viðeigandi?
Svartsýni? Von eða böl?
Pútín þurfti semsagt endilega að
ráðast inn í Úkraínu. Hann þurfti
að fara í stríð. Heimsfaraldrar og
stormviðvaranir koma og fara en
vænisjúkir einræðisherrar virðist
alltaf vera hluti af tilvistinni, með
tilheyrandi kvalræði og óskunda.
Mikið væri gott ef hægt væri að
aflétta þeim líka með minnisblaði.
Í þessu tvíþætta tilfinninga­
ástandi á tímamótum, milli vonar
og ótta, rennur vissulega að manni
sá grunur að krossgöturnar séu
ekki einungis sálarlegar í hugar­
fylgsnum einstakra manneskja
heldur séu þær beinlínis veraldar­
sögulegar. Getur verið að heims­
myndin sé að þróast beint fyrir
framan nefið á okkur og tímarnir
sem við lifum séu örlagaríkari
en maður hefur gert sér í hugar­
lund? Upp úr heimsfaraldri rís
vönkuð veröld en að mörgu leyti
sameinaðri en nokkru sinni fyrr,
eftir viðureign við sameiginlegan
fjanda. Á meðan á því stóð hrikti
vissulega í alls konar stoðum, en
Evrópusamstarfið til dæmis stóðst
raunina og Bandaríkin liðuðust
heldur ekki í sundur. Langt er
síðan vestrænar þjóðir hafa talað
svo einróma, birst svo sameinaðar,
eins og nú gagnvart innrásar­
tíðindum vikunnar.
Á sama tíma berast fregnir af
því að almenningur í Rússlandi
skilji hvorki upp né niður í leiðtoga
sínum. Þrátt fyrir allt hafi Pútín
verið talinn raunsær, varfærinn
og klókur og því ekki í takti við
ímynd hans heima fyrir að efna
til væringa gagnvart friðsamri
frændþjóð, allsherjarstyrjaldar
með loftárásum, skriðdrekabrölti
og dauðsföllum. Á fólk að senda
börn sín á víglínu út af þessu? Og
til hvers? Markmiðið er óljóst. Fólk
er ringlað. Hvað hyggst Pútín fyrir
með Úkraínu að þessu loknu?
Kemur þá ekki á daginn, við
frekari lestur fregna, að hvíslað
hefur verið um það undanfarið að
hinn mikli leiðtogi, svokallaði, hafi
í heimsfaraldrinum einangrað sig
meira en góðu hófi gegnir. Hann
hafi þróað með sér alls kyns rang­
hugmyndir og fjarstæðukenndar
söguskýringar í sóttkví. Auðvitað
bara kenning, en kannski ekki
ólíkleg. Fáir skilja hvað býr að baki
þessum stríðsrekstri. Að skilja
þennan harmleik virðist snúast
um að skilja Pútín. Og kannski
bara gekk hann sem sagt af göfl­
unum í heimsfaraldri.
Þá leyfist manni að vona.
Kannski mun almenningur í Rúss­
landi loksins rísa upp og steypa
yfirboðara sínum af stóli. Þetta
eru möguleikarnir: Mun upp úr
þessum væringum rísa mannkyn
sem vill fagna árangri af samstíga
viðureignum við sameiginlegar
hættur – og ekki mun þær skorta á
21. öldinni – eða mun rísa upp úr
þessu brölti einhvers konar skot­
grafa kraðak, þar sem þjóðir stinga
augun hver úr annarri í vitfirrings­
legu styrjaldarbrölti af engum
augljósum ástæðum og með ekkert
að markmiði nema tómið?
Ég held hið fyrra, en óvissan er
megn. Því, krossgötur. n
Hvað gerist?
Í þessu tvíþætta tilfinn-
ingaástandi á tíma-
mótum, milli vonar og
ótta, rennur vissulega
að manni sá grunur
að krossgöturnar séu
ekki einungis sálar-
legar í hugarfylgsnum
einstakra manneskja
heldur séu þær bein-
línis veraldarsögulegar.
FÖSTUDAGUR 25. febrúar 2022 Skoðun 11FRÉTTABLAÐIÐ