Árbók Reykjavíkurborgar - 01.10.1986, Blaðsíða 13
FORMÁLI
Árbók Reykjavíkur kemur nú út í fjórtánda sinn síðan útgáfa hennar var
endurvakin árið 1973. Árbókin var upphaflega gefin út í 300 eintökum
en kemur nú út í 600 eintökum.
Árbók Reykjavíkur kom raunar fyrst út árið 1941 undir ritstjórn
dr. Björns Björnssonar, þáverandi hagfræðings bæjarins. Tvær árbækur
til viðbótar voru gefnar út að tilhlutan dr. Björns, Árbók
Reykjavíkurbæjar 1945 og Árbók Reykjavíkurbæjar 1950-1951, og hann var
langt kominn með fjórðu árbókina, þegar hann féll frá í ársbyrjun
1956.
Sögu Reykjavíkur verða gerð rækileg skil í ræðu og riti á afmælisárinu
1986 og er það að vonum, en hvað árbókina snertir verða menn að hafa í
huga, að hún geymir lítið af frumheimildum. Henni er fyrst og fremst
ætlað að vera handbólc fyrir þá, sem láta sig málefni borgarinnar varða
í dagsins önn. Höfuðáhersla er lögð á að birta sem nýjastar
upplýsingar um það, sem talið er skipta mestu máli í borgarrekstrinum,
og tölur eru að mestu leyti látnar tala sínu máli án texta. Þetta
takmarkar að sjálfsögðu gildi þessarar útgáfu fyrir þá, sem unna
sögulegum fróðleik, en samanburður á þeim upplýsingum, sem birst hafa
í árbókunum frá upphafi, myndi þó væntanlega gefa ýmislegt til kynna
um þær breytingar, sem átt hafa sér stað í Reykjavík, einkum frá
stríðslokum.
Hilmar Biering deildarfulltrúi í Fjármála- og hagsýsludeild hefur haft
allan veg og vanda af útgáfu þessarar bókar,, en hann var um langt
skeið náinn samstarfsmaður Sigurðar Sigmundssonar aðalfrumkvöðuls
þess, að útgáfa árbókarinnar var endurvakin. Hilmar hefur í tilefni
af 200 ára afmæli borgarinnar séð til þess, að þessi bók verður ekki
jafnsnauð af sögulegum fróðleik og fyrri bækur í þessari ritröð. Hann
hefur tekið saman yfirlit yfir ýmsa merkissatburði í sögu
kaupstaðarins og borgarinnar Reykjavíkur, sem hér er birt aftast í
bókinni, og eru honum hér með færðar sérstakar þakkir fyrir.
Annað efni í bókinni er í öllum meginatriðum með svipuðu sniði og
verið hefur. Þó er rétt að vekja sérstaka athygli á nýjum sveitar-
stjórnarlögum, sem hér eru birt, en þau tóku gildi fyrr á þessu ári.