Fréttir - Eyjafréttir - 23.03.2023, Síða 12
12 | | 23. mars 2023
Fjöldi Eyjamanna lagði leið sína
í Laugardalshöllina um liðna
helgi og urðu vitni að tveggja
marka sigri Eyjakvenna, 31:29
í úrslitaleik Powerade-bikar
kvenna. Það mátti því gera ráð
fyrir spennandi leik þar sem
mættust tvö sterkustu kvenna lið
landsins um þessar mundir. Þá
hefur gengið á ýmsu milli þessara
liða í aðdraganda leiksins svo ekki
sé meira sagt.
Sóknarleikur ÍBV var frábær
frá upphafi til enda, ekki síst í
síðari hálfleik. Hrafnhildur Hanna
Þrastardóttir átti stórbrotinn leik
í sóknarleik ÍBV og skoraði tólf
mörk. Birna Berg sýndi mátt
sinn og megin í skyttunni og var
næst markahæst hjá Eyjakonum
með sjö mörk. ÍBV-liðið var heilt
yfir sterkara og verðskuldaði
svo sannarlega sigurinn.
Stuðningsmenn héldu uppi
stanslausu fjöri frá fyrstu mínútu
og langt fram yfir þá síðustu.
ÍBV varð síðast bikarmeistari
í kvennaflokki árið 2004,
þegar liðið lagði Hauka í
úrslitaleik 32:35 fyrir framan
rúmlega þúsund áhorfendur í
Laugardalshöll. Þá varð liðið
þrisvar sinnum bikarmeistari
á fjórum árum 2001, 2002 og
2004. Liðið gekk í gegnum
mikið gullaldarskeið á fyrstu
árum þessarar aldar og safnaði á
þessum árum einnig að sér fjórum
Íslandsmeistaratitlum.
Saga rauðu spjaldanna
í Höllinni
Eyjamenn hafa lengi þrifist
ágætlega í mótlæti það á við
sama hvort það gefur á bátinn í
bókstaflegri merkingu eða annars
staðar. Það er áhugavert að líta
yfrir þau rauðu spjöld sem ÍBV
hefur fengið dæmd á sig þegar
mikið liggur við í Laugardalshöll.
Afar umdeilt atvik átti sér
stað á 20. mínútu ný afstaðins
bikarúrslitaleiks þegar dómarar
leiksins, Sigurður Hjörtur
Þrastarson og Svavar Pétursson,
vísuðu markverði ÍBV, Mörtu
Wawrzykowska, af velli með rautt.
Hún hafði lent í samstuði við
Theu Imani eftir hraðaupphlaup
hjá Val og niðurstaðan rautt
spjald. Það er óhætt að segja
að varamannabekkur ÍBV hafi
verið afar ósáttur með dóminn
sem orkaði tvímælis svo ekki
sé meira sagt. Ólöf Maren
Bjarnadóttir kom sterk inn í
mark Eyjakvenna. Ólöf varði
sjö skot og nokkrum sinnum á
mikilvægum augnablikum og átti
stóran þátt í því að tryggja ÍBV
sigur í leiknum.
Árið 2015 lagði karlalið ÍBV
Hauka, 23:21, í undanúrslitum
Coca Cola-bikarsins í
handknattleik í Laugardalshöll. Á
16. mínútu tóku dómarar leiksins
stóra ákvörðun þegar þeir vísuðu
Grétari Þór Eyþórssyni af leikvelli
eftir að vítakast hans hafnaði
í höfði Giedrius Morkunas,
markvarðar Hauka.
Morkunas hreyfði sig þegar
kastið var tekið og því var
dómurinn rangur. Hákoni Daða
Styrmissyni var hent beint í
djúpu laugina þegar hann kom
inn á fyrir Grétar. Innkoma
Hákons átti eftir að reynast
Eyjamönnum dýrmæt þegar líða
fór á leikinn. Hann skoraði fjögur
mörk í leiknum, þar á meðal
jöfnunarmark í stöðunni 18:18.
Hann lék svo lykilhlutverk í því
að tryggja ÍBV bikarmeistaratitil
gegn FH í sveiflukenndum leik
daginn eftir.
Hann hefur oft verið rifjaður
upp bikarúrslitaleikurinn frá árinu
1991 þegar ÍBV lagði stjörnum
prýtt lið Víkings í bikarúrslitum.
Það blés ekki byrlega fyrir
Eyjamönnum í stöðunni 7-3 þegar
Sigurbjörn Óskarsson aðalskytta
liðsins fékk að líta rauða spjaldið
fyrir að mótmæla dómi. Það
hefði mátt ætla að í þessari stöðu
væri það nánast formsatriði fyrir
Víkinga að klára leikinn. En það
var nú aldeilis ekki. Þarna urðu
kaflaskil í leiknum, í stað þess
að brotna, tvíefldist ÍBV liðið og
tók leikinn nánast í sínar hendur.
Skoruðu þeir hvert markið á
fætur öðru og komust yfir 8:7.
Fór svo að lokum að ÍBV sigraði
26:22. Þar átti stórkostlega
innkomu sá sem fyllti skarð
Sigurbjörns en það var á ferðinni
ungur og óreyndur Guðfinnur
Kristmannsson sem skoraði sex
mörk og endaði markahæstur
Eyjamanna.
Það ætti því samkvæmt þessu
að vera óhætt að fyrir Eyjamenn
að halda ró sinni þó svo að
lykilleikmaður fái reisupassann
snemma leiks þegar mikið liggur
við. Það hefur oftar en ekki
verið faraheill. Þó vissulega séu
rólegir Eyjamenn á kappleikjum
sjaldséðir þegar á hólminn er
komið.
Frækinn bikarleikur Eyjakvenna Verðskuldaður sigur:
Bikarinn heim eftir nítján ára hlé
Stuðningsmenn héldu uppi stanslausu fjöri frá fyrstu mínútu og
langt fram yfir þá síðustu
Ljósmyndir frá HSÍ: Kristján Orri
TIL HAMINGJU
STELPUR
ÁFRAM ÍBV