Morgunblaðið - 28.12.2004, Blaðsíða 15

MORGUNBLAÐIÐ ÞRIÐJUDAGUR 28. DESEMBER 2004 15
ÚR VERINU
MIKIL vinna hefur verið í land-
vinnslunni hjá HB Granda á árinu.
Ákveðinnar sérhæfingar gætir við
vinnslu á hráefninu, þorskur og ýsa
eru að mestu unnin í vinnslunni á
Akranesi og karfi og ufsi eru unnin
í Norðurgarði í Reykjavík. Nánast
allur afli sem unninn er kemur frá
eigin skipum.
Frá þessu er greint á heimasíðu
félagsins. Í Norðurgarði var um
miðjan desember búið að vinna úr
alls 16.146 tonnum af afla frá ísfisk-
togurunum það sem af er árinu og
hafa farið að jafnaði um 350 tonn af
hráefni á viku í gegnum vinnsluna.
Mikil sérhæfing hefur átt sér stað
við vinnslu á ufsa og er t.d. búið að
vinna ufsaafurðir úr tæplega 9.000
tonna afla sem er töluverð aukning
á milli ára. Vinnutíminn er að öllu
jöfnu frá kl. 8 til 19 og á löngum
tímabilum á árinu hefur einnig ver-
ið unnið á næturvöktum frá kl. 24
til 8. Um 130–140 manns starfa að
jafnaði við vinnsluna í Norðurgarði.
Fyrr á árinu var sett upp og tekin
í notkun ný vinnslulína á Akranesi.
Vinnslulínan er hönnuð og smíðuð
hjá Skaganum hf. og er sérstaklega
hönnuð fyrir vinnslu á þorski og
ýsu. Eftir nokkra erfiðleika í byrj-
un sem aðallega voru tæknilegs eðl-
is hefur vinnslan gengið vel nú í
haust og hafa afurðirnar líkað vel
hjá viðskiptavinum fyrirtækisins en
stór hluti afurðanna er fluttur út
ferskur með flugi.
Mikil samvinna hefur verið við
Tanga á Vopnafirði, en nú er unnið
að samruna fyrirtækjanna, og hef-
ur komið mikið af þorski þaðan til
vinnslu á Akranesi á meðan síld-
arvinnslan var á fullu fyrir austan í
haust. Unnið er að öllu jöfnu frá kl.
7 til 19 á Akranesi á tveimur vökt-
um virka daga og starfa að jafnaði
milli 70–80 manns við vinnsluna.
„Vel hefur gengið að selja og af-
setja framleiðsluna og hefur af-
urðaverð heldur stigið þegar liðið
hefur á árið eftir töluverða lækkun
undanfarin ár. Reksturinn hefur
farið batnandi en vissulega setur
hátt gengi íslensku krónunnar strik
í afkomu landvinnslunnar og gerir
reksturinn erfiðari en ella,“ segir á
heimasíðunni.
Morgunblaðið/Þorkell
Landvinnsla Mikil vinna hefur verið í fiskinum hjá HB Granda að undan-
förnu. Hér er verið að vinna ufsa í fiskiðjuveri félagsins við Norðurgarð.
Mikil vinna hjá HB Granda
FRAMKVÆMDASTJÓRI Íslands-
sögu ehf. á Suðureyri segir bæjarráð
Ísafjarðarbæjar hunsa fyrirmæli
bæjarstjórnar með því að setja ekki
reglur um úthlutun byggðakvóta sem
í hlut bæjarins kom á dögunum.
Hann segist ekki trúa öðru en bæj-
arráð endurskoði afstöðu sína og
sendi sjávarútvegsráðuneytinu regl-
ur fyrir áramót. Ísafjarðarbær fékk
úthlutað samtals 210 þorskígildis-
tonna byggðakvóta. Frá þessu er
greint á fréttavef Bæjarins bezta á
Ísafirði.
Bæjarráð hefur ákveðið að setja
ekki reglur um úthlutunina heldur
óska þess að sjávarútvegsráðuneytið
sjái um það. Skoðanir bæjarfulltrúa
hafa tekið nokkrum breytingum frá
því að málið kom fyrst til umræðu á
bæjarráðsfundi þann 13. desember.
Á þeim fundi var bæjarstjóra falið
„að vinna tillögur Ísafjarðarbæjar að
skiptingu ofangreindra aflaheimilda
og leggja fyrir bæjarráð“, eins og
sagði í bókun bæjarráðs.
Málið tók síðan breytingum á fundi
bæjarstjórnar þann 16. desember. Þá
samþykkti bæjarstjórn svohljóðandi
tillögu: „Bæjarstjórn gefur bæjarráði
fulla heimild til að ganga frá tillögu
varðandi úthlutun byggðakvóta þar
sem tillögur þurfa að berast sjávarút-
vegsráðuneytinu fyrir 1. janúar
2005.“
Á fundi bæjarráðs þann 20. desem-
ber tók málið svo enn breytingum. Þá
var áðurnefnd tillaga bæjarstjórnar
til afgreiðslu á bæjarráðsfundinum.
Þar var samþykkt eftirfarandi til-
laga: „Bæjarráð Ísafjarðarbæjar tel-
ur farsælast að sjávarútvegsráðu-
neytið úthluti sjálft þeim
byggðakvóta er féll í hlut Ísafjarð-
arbæjar. Ætla verður að ráðuneytið
hafi lagt til grundvallar hlutlægt mat
við heildarúthlutun og því eðlilegt að
einstaka úthlutanir byggi á sömu for-
sendum.“
Leggi sveitarfélögin sjálf ekki
fram reglur þá úthlutar Fiskistofa
kvótanum í hlutfalli við kvótaeign
hvers skips í sveitarfélaginu.
Magnús Reynir Guðmundsson,
bæjarfulltrúi Frjálslyndra og óháðra,
óskaði svohljóðandi bókunar: „Er
þeirrar skoðunar, þrátt fyrir flóknar
og að mörgu leyti illskiljanlegar for-
sendur sjávarútvegsráðuneytisins
við úthlutun byggðakvóta til Ísafjarð-
arbæjar, að bæjarráði beri að reyna
að ná fram tillögu um sanngjarna út-
hlutun á þeim 210 þorskígildis-
tonnum sem til ráðstöfunar eru að
þessu sinni.“
Óðinn Gestsson, framkvæmda-
stjóri Fiskvinnslunnar Íslandssögu,
segist mjög hissa á ákvörðun bæjar-
ráðs í síðustu viku. „Það er ljóst í mín-
um huga að bæjarráð er að hunsa
ákvörðun bæjarstjórnar. Bæjar-
stjórn fól bæjarráði að móta tillögur
um úthlutun og það ber bæjarráði að
gera. Bæjarráð getur ekki breytt
ákvörðun bæjarstjórnar og því hlýtur
ráðið að endurskoða afstöðu sína og
senda tillögur til sjávarútvegsráðu-
neytisins fyrir áramót. Önnur niður-
staða getur ekki orðið breyti bæjar-
stjórn ekki fyrirmælum sínum,“ segir
Óðinn í samtali við Bæjarins bezta.
Deilt um byggða-
kvóta í Ísafjarðarbæ
Morgunblaðið/RAX
Byggðakvóti Bæjarráð Ísafjarðarbæjar hefur ákveðið að móta ekki reglur
um úthlutun byggðakvóta heldur láta Fiskistofu um það.