Bændablaðið - 18.10.2012, Blaðsíða 44

44 Bændablaðið | Fimmtudagur 18. október 2012
Íslensk hönnun
Ágústa Margrét Arnardóttir
er hugmyndasmiður og einn af
skipuleggjendum sýningarinnar
Fashion with Flavor, sem stendur
fyrir „tísku sem bragð er af“.
Ágústa telur þetta einu sýningu
sinnar tegundar í heiminum þar
sem fyrirsætur bera fram mat
klæddar fatnaði úr aukaafurðum
hráefnisins sem þær bera fram.
Hver er tilgangurinn
með sýningunni?
„Að kynna fullnýtingu náttúrulegra
hráefna á sem víðtækastan og
flottastan hátt; í mat, fatnaði,
fylgi hlutum, skóm, listmunum,
snyrtivörum og fleiru. Ég vil að
Fashion with Flavor sé viðburður,
og jafnvel samfélag, fyrir alla
sem nota náttúruleg hráefni eða
greinilegan innblástur frá íslenskri
náttúru.“
Hvernig hefur tekist
til?
„Það hefur tekist gríðarlega vel
til. Ég og kokkurinn Hinrik Carl
Ellertsson unnum mikið saman í
ár. Fyrst sendi ég honum mínar
hugmyndir um hálfgerð þema
hvers réttar. Laxinn léttur með
stuttum pilsum, þorskurinn suðrænn
og seiðandi með litríkum fötum,
lambakjötið átti að minna á íslenska
sumargrillveislu og svo framvegis.
Hinrik tók hugmyndir mínar og
margfaldaði allt sem ég vonaðist
eftir, til dæmis notaði hann eld,
þurrís, sprengiduft sem kurlast upp
í manni og alls konar aukahluti til
að gera matreiðsluna fjölbreytta og
ólíka flestu öðru þó að í grunninn
hafi maturinn náttúrlega verið
gerður úr íslenskum eðalhráefnum.
Við vorum líka svo heppin að fá
matvæli í styrk frá góðu fólki í
Vogafjósi, Skinney/Þinganesi,
Fjarðalaxi, Garðheimum, Spírunni,
Reykjavik Distillery og fleirum.
Það gerði sýninguna enn betri og öll
helgin einkenndist af mikilli gleði.“
Úr hvaða hráefnum
var fatnaðurinn?
Hráefnin í dressunum og á diskun-
um koma frá hreindýrum, kindum,
þorskum, löxum, körfum, hlýrum
og hrossum. Fyrirsætur báru fram
matinn klæddar í fatnað, fylgi-
hluti og skó úr aukaafurðum þess
sem borðað var. Í einum rétti til-
einkuðum hrossum og hreindýr-
um klæddust stúlkurnar kjólum
úr hreindýraleðri, báru töskur
með hreindýrshornum og skóm
skreyttum hrosshárum, framreitt
var hrossakjöt með hreindýrasoðs-
sósu.
Komu margir að
sýningunni?
„Fyrir utan alla styrktaraðila voru
um 30 þátttakendur; Arfleifð með
fatnað og fylgihluti, HALLDORA
með skó, Sign með skart og
Hinrik Carl matreiðslumeistari.
Greta Salóme hafði yfirumsjón
með tónlist og með henni var
fimm manna band auk þess
sem Harmonikkubræðurnir frá
Hornafirði tóku sjóaralög með
einum fiskréttinum. Baksviðs
voru „klæðarar“, hárgreiðslufólk,
förðunarfólk, ljósmyndarar,
grafískur hönnuður og fleira.
Frekari upplýsingar og myndir
má sjá á www.facebook.com/
fashionwith flavor.
/ehg
Fullnýting íslenskra hráefna
Fyrirsæta í fatnaði úr laxa-, þorsk- og karfaroði og skóm úr laxaroði.
Hér klæðist fyrirsætan fatnaði úr hreindýra- og lambsleðri og skóm úr lambsleðri skreyttum hrosshárum.