Litli Bergþór - 01.06.2013, Blaðsíða 33
Litli-Bergþór 33
Persónulegir kostir hennar voru svo miklir og
góðir, að það stafaði hlýja frá henni. Hún var í
orðsins fyllstu merkingu góð kona og svo mikil
hæfileikakona, að áhrif hennar bárust víða, ekki
síst með bókum hennar, smásögum og ritum, sem
áttu vinsældum að fagna um land allt. Skáldsögur
hennar, „Á heimleið“, „Þess bera menn sár“,
„Brúðargjöfin“ og fleira lýstu göfugri sál og
töluðu ljúfu og heillandi máli til þeirra, sem meta
manngöfgi og þrá, birtu og frið í stað skugga og
baráttu.
En jafnframt kom frú Guðrún mikið við opinber
mál og var það einkum áhugi hennar fyrir hjálp við
þá einstaklinga mannfélagsins, sem bágt eiga, sem
mun hafa knúð hana inn á þær brautir. Má nokkuð
marka það af því, að mestu áhugamál hennar á
þingi voru að bæta aðhlynningu vanmetabarna
og koma upp fyrir þau hælum, þar sem því yrði
bjargað sem hægt væri að bjarga hjá veslingunum,
bæði líkamlega og andlega.
Dætur Guðrúnar og Sigurbjörns sem létust með móður
sinni í Tungufljóti, Guðrún Valgerður, gift Einari
Kristjánssyni auglýsingastjóra og Sigrún Kirstín,
sem hafði nýlokið fullnaðarprófi gagnfræðadeildar.
Einar varð ekki bara fyrir sárum missi við andlát konu
sinnar og ófædds barns heldur missti hann unga systur
sína, Ingibjörgu Kristjánsdóttur, á Landspítalanum
nokkrum klukkustundum áður en slysið vildi til. Missir
Kirstínar Katrínar, 88 ára gamallar móður Guðrúnar,
var sömuleiðis mikill því Guðrún var sjöunda barn
hennar af átta sem hún sá á eftir yfir móðuna miklu
en að auki var Lárus, maður hennar, fallinn frá. Eina
eftirlifandi barnanna var Pétur Lárusson fulltrúi á
skrifstofu Alþingis.
Sigurbjörn Ástvaldur Gíslason eiginmaður hennar
var sömuleiðis landsþekktur. Hann var prestur í
Reykjavík og vann fyrir líknarfélög og gegn fátækt og
var stofnandi Elliheimilisins að Grund.
Í Danmörku var einnig fjallað þó nokkuð um
andlát og feril Guðrúnar Lárusdóttur. Birti National
Tidende mynd af Guðrúnu og flutti langa og ítarlega
minningargrein um hana. Segir blaðið meðal annars,
að hið hörmuglega bílslys hafi vakið sterka sorg og
samúð ekki einungis á Íslandi, heldur harmaði fjöldi
manna í Danmörku sáran fráfall Guðrúnar og dætra
hennar. Sagði blaðið ennfremur, að Guðrún hafi verið
áhrifarík kona í íslenskum stjórnmálum. Þjóðkunn fyrir
ýmsa menningarstarfsemi og fjöllesinn rithöfundur.
Þá rakti blaðið rithöfundarstarf hennar og fjallaði
um trúaráhuga hennar til mannúðar- og félagsmála.
Politiken ritaði einnig ítarlega um Guðrúnu,
rithöfundarstörf hennar og stjórnmálastarfsemi og
í miðdegisfréttum danska útvarpsins var greint frá
slysinu og skýrt ítarlega frá stjórnmála-, félagsmála-
og rithöfundarstörfum Guðrúnar.
Orsök slyssins
Arnold Pedersen viðurkenndi í samtali við blaðamann
Morgunblaðsins degi eftir slysið að bremsur bílsins
hefðu verið í ólagi.
Ég varð var við það á föstudag, að bremsur
bílsins voru í ólagi. En áður en við fórum frá
Geysi í gærmorgun herti ég svo á bremsunum,
að þær virtust verka nokkurn veginn. Ég prófaði
bremsurnar nokkru eftir að við lögðum af stað frá
Geysi og verkuðu þær þá vel öðru megin.
Þegar ég kom á hæðina ofan við vegamótin við
Tungufljót setti ég bílinn í fyrsta gír. En þegar ég
ætlaði að taka beygjuna austur á aðalveginn verkuðu
bremsurnar alls ekki. Þarna á vegamótunum
er nokkur halli og rann því bíllinn beint fram af
vegarbrúninni og niður snarbratta brekkuna, ofan
í fljótið.
Yfirvöld létu fara fram ítarlega rannsókn á orsök
slyssins. Arnold Pedersen var látinn gefa skýrslu
daginn eftir. Kom þá fram að Sigurbjörn og Guðrún
voru nýbúin að kaupa bílinn R 884 af Helga Eyjólfssyni
flugmanni að lokinni umfangsmikilli viðgerð um vorið
sem kostaði hann 800 krónur.
Var viðgerðin aðallega fólgin í því, að gangvélin
var yfirfarin og lagfærð svo og stýrisútbúnaðurinn
og ný stykki sett í þar. Ennfremur var sett í bílinn
nýtt drifskaft og tilheyrandi legur. Bíllinn var
klæddur nýju taui innan og ný dekk sett á öll hjól.
Guðrún Lárusdóttir (8. janúar 1880 - 20. ágúst 1938).
Mynd af vef Alþingis