Lögmannablaðið - 01.12.2014, Page 26

26 LÖGMANNABLAÐIÐ TBL 04/14
Á LÉTTUM NÓTUM
Meyjarhof og Zorbadans í Aþenu
Úr ferðabók Bjarna G. Björgvinssonar
ÞAÐ HAUSTAR AÐ. Þrestirnir hópast á
barina sem opnaðir eru á hverju hausti
í reynitrjánum og háma í sig gerjuð ber
svo söngurinn hljómar eins og í vel
heppnuðu kokkteilpartýi. Síðan flögra
þeir í næsta tré, óstöðugir á stefnunni,
og halda partýinu áfram. Á meðan á
þessu stendur öndum við mennirnir
að okkur gasi úr Holuhrauni og höfum
áhyggjur af stöðu gjaldeyrismála,
snjóhengjum, gjalddögum skuldabréfa
og lekamálum. Öfundum þrestina af
áhyggjulausu lífi. Því var það kærkomið
þegar LMFÍ skipulagði lögmannaferð
til Aþenu dagana 22.–28. september
síðastliðinn og bauð upp á sumarauka
í þessari fornu menningarborg þar sem
vagga siðmenningarinnar stóð. Við
yfirgáfum dægurþrasið og skyggðumst
aftur í söguna jafnframt því að kynnast
lítillega Grikklandi dagsins í dag sem
glímir við mörg sömu áhyggjuefnin og
við hér uppi á Íslandi.
Skyggni ágætt í Aþenu
Það var 25 manna hópur sem mætti
í Leifsstöð um hádegisbil þann
22. september og tók flugið með
Icelandair til okkar fornu höfuðborgar
Kaupmannahafnar, þar sem gist var í
eina nótt. Seinkun varð á flugi þannig að
við komum ekki til Kaupmannahafnar
fyrr en undir kvöld. Því gafst ekki færi
að líta á Strikið og heilsa upp á anda
fornra Íslendinga á Hviids vinstue eða
Det lille Apotek og „ha en øl“ því vakna
þurfti snemma næsta morgun í flug með
SAS til Aþenu.
Í Aþenu tók á móti okkur fararstjórinn
okkar í ferðinni, Þóra Valsteinsdóttir,
sem búsett hefur verið í Grikklandi í
30 ár. Hún er hafsjór af fróðleik um allt
er Grikkland snertir, gríska goðafræði,
sögu, byggingarlist, pólitík fyrr og nú,
Aþenuborg var hrein og falleg.
Á göngu í þorpinu Delfí sem var flutt um aldamótin 1900 þegar farið var að
grafa upp fornminjar hins helga staðar.