Skólavarðan - 01.08.2003, Blaðsíða 20
FRÉTTIR OG SMÁEFNI
Félag grunnskólakennara færir
Barnaspítala Hringsins gjöf
Nýr og glæsilegur Barnaspítali
Hringsins var formlega tekinn í
notkun við hátíðlega athöfn 26.
janúar sl. Spítalinn er til húsa í
nýbyggingu á Landspítalalóðinni
austan við Kennarahúsið.
Starfsemin er nú að fullu hafin
í nýju húsakynnunum. Á vegum
spítalans er rekinn grunnskóli í
tengslum við Austurbæjarskólann og
hefur hann fengið nýja starfsaðstöðu
í nýbyggingunni. Af því tilefni
afhenti Félag grunnskólakennara
Barnaspítalanum að gjöf litaprentara
og peningaupphæð í maí sl., samtals
að verðmæti 250 þúsund krónur.
Finnbogi Sigurðsson formaður Félags
grunnskóla kennara afhenti gjöfina.
Á myndinni eru talið frá vinstri: Helga Þórðardóttir, Dóra Guðrún Kristinsdóttir og Jón Agnar
Ármannsson, kennarar við grunnskóla Barnaspítalans og Finnbogi Sigurðsson, Björk Hella Jessen og
Sesselja G. Sigurðardóttir frá Félagi grunnskólakennara.
Málþing um
stærðfræðikennslu
Menntamálaráðuneytið stendur
fyrir málþingi um kennslu í stærð-
fræði dagana 24. og 25. október
nk. í samvinnu við Íslenska
stærðfræðafélagið, Kennaraháskóla
Íslands, Háskóla Íslands stærðfræðiskor,
Flöt samtök stærðfræðikennara og
Félag raungreinakennara.
Aðalfyrirlesari verður Mogens
Niss, prófessor í Hróarskeldu. Hann
mun m.a. fjalla um mat á námi í
stærðfræði en auk þess verður fjallað
um nýlegar námskrár í stærðfræði fyrir
grunnskóla og framhaldsskóla. Nánari
upplýsingar er að finna á heimasíðu
menntamálaráðuneytisins.
Röddin sem atvinnutæki
Félag íslenskra talkennara
og talmeinafræðinga efnir til
athyglisverðrar ráðstefnu þann 31.
október nk. þar sem fjallað verður
um röddina sem atvinnutæki. Í
fréttatilkynningu um ráðstefnuna
segir að fram til þessa hafi lítill
gaumur verið gefinn að röddinni
sem atvinnutæki þó að hún sé
undirstaða atvinnuöryggis margra
atvinnustétta, m.a. kennara.
Almennt þekkingaleysi á rödd,
lélegur hljómburður, hávaði, streita,
of mikil fjarlægð til áheyranda og
slæmt inniloft á vinnustað eru talin
helstu ástæður þess að fólk þjáist
af raddveilum og óþægindum sem
þeim fylgja. Afleiðingar hafa valdið
bæði einstaklingum og þjóðfélagi
ómældu fjárhagslegu tjóni í töpuðum
vinnudögum.
Fyrirlesarar verða Finnarnir
prófessor Erkki Vilkman, sérfræðingur
í háls- og raddmeinum, sem fjallar
um röddina og stöðu hennar sem
atvinnutækis og dr. Marketta Shivo
sem ræðir um skaðvænleg áhrif
umhverfis á rödd. Báðir hafa beitt sér
mikið fyrir því að efla umræðu um
röddina sem atvinnutæki. Svíinn dr.
Anita McAllister fjallar um hæsi barna
sem er vandi sem hefur ekki verið
nægilega vel sinnt á Íslandi fram til
þessa. Algengt er að hæsi barna valdi
raddvandamálum þegar þau verða
eldri.
Einar Thoroddsen háls-, nef- og
eyrnalæknir kynnir meðferð sína sem
hann hefur beitt til að slaka á vöðvum
við tungubein. Valdís Jónsdóttir
talmeinafræðingur fjallar um hvernig
mögnunarkerfi hefur dregið úr álagi á
kennararaddir og aukið hlustunargetu
nemenda. Þóra Másdóttir og Bryndís
Guðmundsdóttir talmeinafræðingar
ræða gildi raddþjálfunar.
Eftir hádegi verður boðið upp á
námskeið hjá bæði innlendum og
erlendum raddþjálfurum í raddbeitingu
og raddvernd. Allir þeir sem þurfa að
nota röddina sem atvinnutæki eru
hvattir til að nýta sér þessi námskeið.
Fyrirlestrar eru á ensku.
20