Morgunblaðið - 06.08.2003, Blaðsíða 8
8 B MIÐVIKUDAGUR 6. ÁGÚST 2003 MORGUNBLAÐIÐ
bílar
R
alf Schumacher kveðst ekki hafa átt
sök á árekstrinum, sem varð í upp-
hafi kappakstursins í Hockenheim
á sunnudag og undir það tekur
tæknistjóri og annar aðaleigandi
liðsins, Patrick Head, og hefur Williams-liðið
áfrýjað þeim úrskurði dómnefndar kappakst-
ursins að refsa Ralf fyrir að vera valdur að
árekstrinum með því að færa hann aftur um
10 sæti á rásmarki næsta móts, í Ungverja-
landi.
Með refsingunni hefur Schumacher ung-
verska kappaksturinn eftir þrjár vikur 10
sætum aftar en hann lýkur keppninni um rás-
pólinn í því móti. Þótti hann hafa sýnt tillits-
leysi og þrengt svo að bílum sér til vinstri
handar að árekstur, sem að öðru leyti hafi
verið afstýranlegur, hafi átt sér stað.
Ralf nuddaðist utan í Ferrari-bíl
Rubens Barrichello var eins og í samloku
milli Williams-bílsins og McLaren-bíls Kimi
Räikkönens rétt fyrir fyrstu beygju. Var
Barrichello engrar undankomu auðið og skall
utan í Räikkönen svo að bílarnir lentu í kös
og löskuðust svo allir féllu þeir úr leik. Þrír
bílar drógust inn í óhappið og neyddust til að
hætta vegna skemmda; Jagúarbíll Justins
Wilsons, Jordan-bíll Ralphs Firmans og
Sauber-bíll Heinz-Haralds Frentzens.
Räikkönen hlaut einna harðasta skellinn og
var fluttur á sjúkrahús til skoðunar en hann
marðist á hné og tognaði á hálsi er hann skall
á öryggisvegg.
Dómnefndin komst að þeirri niðurstöðu að
Ralf Schumacher hafi ekki sýnt nógu mikla
aðgæslu vegna bíla sér til vinstri handar
[Barrichello og Räikkönen] og verið valdur að
atvikinu. Hafi hann lokað á Barrichello sem
ekki hafi átt neina undankomuleið og með því
valdið afstýranlegum árekstri, en Barrichello
rakst síðan utan í bíl Räikkönens á fullri ferð.
Ökuþórarnir voru allir kallaðir fyrir dóm-
nefndina og veitt tækifæri til að útskýra sjón-
armið sín varðandi atvikið. Tilkynnti Will-
iams-liðið þegar í stað að niðurstöðunni yrði
áfrýjað til gerðardóms Alþjóðaaksturs-
íþróttasambandsins (FIA) sem kveða verður
upp úrskurð fyrir ungverska kappaksturinn.
Ralf gætti ekki að bílum til vinstri handar
Sögðu dómararnir í niðurstöðum sínum að
Ralf Schumacher hefði játað á fundinum að
hafa ekki gætt neitt að bílunum sér til vinstri
handar er hann sveigði yfir á vinstri helming
brautarinnar til að skapa sér betri línu inn í
fyrstu beygju.
Er þetta í annað sinn sem gripið er til refs-
ingar sem þessarar. Sauber-þórinn Felipe
Massa var einnig færður aftur um 10 sæti á
rásmarki ítalska kappakstursins í fyrrahaust
fyrir að vera valdur að afstýranlegu slysi.
Ralf Schumacher var ekki á því að við hann
væri að sakast og reyndi að réttlæta akstur
sinn inn að beygjunni. „Vitaskuld var þetta
afar svekkjandi en atvik sem þessi geta átt
sér stað þegar þröng er á þingi. Ég held ekki
að ég hafi ekið of langt til vinstri, var bara að
reyna að verja stöðu mína,“ sagði Ralf.
„Maður getur ekki velt því fyrir sér hvað
bílarnir í kring eru að gera og því eiga atvik
sem þessi sér stundum stað. Ég var einfald-
lega að reyna að verja stöðu mína og sveigði
ekkert skyndilega svo hinir höfðu meira en
nógu mikinn tíma til að forðast mig. Það urðu
svo miklar skemmdir á bíl mínum við skellinn
að ekki var um annað að ræða en hætta,“
sagði Ralf Schumacher.
Barrichello svekktur
„Ég er afar svekktur, ég átti engrar und-
ankomu auðið,“ sagði Barrichello. „Ræsingin
hjá mér var í meðallagi. Mér fannst bæði Ralf
og Kimi taka mikla áhættu, ekki síst Kimi
sem ók við brautarjaðar til að komast fram
úr. Ralf sveigði yfir til vinstri og veitti mér
ekkert svigrúm. Ég bremsaði en fékk svo
skell á bílinn. Hreyfði þó ekki stýrishjólið og
breytti aldrei um akstursstefnu. Þetta var
mjög svekkjandi því ég hefði getað náð góð-
um árangri í dag,“ sagði Barrichello um at-
vikið.
„Ég náði góðu viðbragði og ók rakleitt nið-
ur eftir ytri brautarjaðrinum. Var kominn
fram úr Barrichello er hann rakst utan í mig
og átti því enga undankomuleið. Ég veit ekki
hverjum var um að kenna, enda skiptir það
eiginlega ekki máli og ég fæ ekkert við þessu
gert,“ sagði Kimi Räikkönen hins vegar.
Ánægður að dekkið sprakk hjá Schumacher
Marinn og blár mótmælti hann því að við
hann væri að sakast. Skaust hann við ystu
brún brautarinnar inn að beygjunni og fór ut-
anvert fram úr hægstartandi Ferrari-fák
Rubens Barrichello en bílar þeirra skullu
saman er Ralf Schumacher lagði inn í Ferr-
ari-bílinn frá hinni hliðinni. Vegna áreksturs-
ins féllu allir þrír úr leik.
„Ég finn mjög til í öðrum fæti og það mun
taka nokkra daga að komast í samt lag,“
sagði Räikkönen sem fluttur var undir lækn-
ishendur þar sem hann hlaut þung högg er
bíll hans splundraðist við samstuðið og er
hann skall á öryggisvegg.
„Ég held það hafi ekki verið nein tvísýna að
aka niður brautina við ytri jaðar. Ég var
kominn fram úr Rubens. Veit ekki hvað gerð-
ist en það var í lagi að keyra með þessum
hætti. Hafi ekki verið neitt svigrúm hefði ég
ekið aftan á hans bíl. Ég tek ekki á mig sök
því ég hafði ekkert rangt við,“ sagði Räikkön-
en.
Hann sagði að hið eina góða sem rekið
hefði á fjörur hans á kappakstursdeginum
væri að sjá dekk springa á bíl Michaels Schu-
macher undir lokin. Fyrir vikið féll heims-
meistarinn niður í sjöunda sæti og jók hann
því forystuna á Räikkönen í stigakeppninni
um heimsmeistaratitil ökuþóra ekki eins mik-
ið og í stefndi. Munar á þeim 9 stigum.
„Punkteringin er það eina góða sem gerðist í
dag. Fyrir vikið er ég enn í baráttunni um tit-
ilinn,“ sagði Räikkönen.
Upphafið að rekja til ræsingar Barrichello
„Orsök vandræðanna má rekja til lélegrar
ræsingar Rubens,“ sagði McLaren-stjórinn
Ron Dennis um atvikið rétt eftir að það átti
sér stað. „Ég held ekki að Ralf hafi þrengt að
honum af ásetningi en það leiddi til árekst-
ursins,“ bætti Dennis við.
Reuters
Kimi Raikkonen lendir í árekstri í fyrstu beygjunni í Hockenheim.
Ralf sver af sér sök og Will-
iams áfrýjar refsingu hans
Ralf Schumacher er ekki á því að við hann sé að sakast vegna
árekstursins í upphafi kappakstursins í Hockenheim en vegna hans
féllu sex bílar úr leik. Ágúst Ásgeirsson fjallar um dramatískan
kappaksturinn í Hockenheim sl. sunnudag.
Reuters
Ralf Schumacher hafði enga ástæðu til að brosa í Hockenheim.