Lesbók Morgunblaðsins - 18.05.2002, Side 10

10 LESBÓK MORGUNBLAÐSINS ˜ MENNING/LISTIR 18. MAÍ 2002
Í stórhríðinni blæs um bratta tinda
og brotna hríslu, skaflar vaxa á túni.
En bráðum munu sundhanarnir synda
og svanamæður hylja egg sín dúni.
Álftin hvít á lind sem aldrei leggur
lætur sér eflaust vor í huga detta
þó umhverfið sé eins og hvítur veggur
og aðeins skjól við fáa, lága kletta.
Hún veit eins og þú, ef mætt er miklum harmi
er mátturinn að þora, trúa og vilja.
Og það að geyma bernskuna í barmi
er besta ráðið til að sjá og skilja.
Ef hugurinn er lind sem aldrei leggur
má láta sér svo margt í huga detta
þó umhverfið sé eins og hvítur veggur
mun aftur fjóla í Hvammsheiðinni spretta.
HÓLMFRÍÐUR
BJARTMARSDÓTTIR
Minning um skáldið Jóhönnu Á. Steingrímsdóttur. Höfundur býr á Sandi II
í Aðaldal.
VORHRET