Fréttablaðið - 02.04.2009, Page 19

Kjóstu F !
forysta fyrir íslenska þjóð
www.xf.is
Reykjavík, 30. mars 2009
Góðir landsmenn.
Við höfum orðið fyrir áföllum af völdum ógætinna útrásarmanna og framundan eru ár sem reyna á þrautseigju og dugnað
Íslendinga. Verum samt minnug þess að áður hefur blásið á móti. Stormurinn hefur verið í fangið en við staðið það af okkur
sem þjóð. Þetta á einnig við um Frjálslynda flokkinn sem mun eins og þjóðin halda velli þrátt fyrir illmælgi og rógburð sem
skaðað hefur flokkinn.
Framundan hjá forystumönnum og frambjóðendum Frjálslynda flokksins er stutt og snörp kosningabarátta þar sem við
leggjum fram málin okkar á liðnum árum, sem ennþá brenna harkalega á fólkinu vegna óréttlætis og kúgunar ásamt eigna-
og atvinnumissis. Við krefjumst þess enn að kvótinn verði þjóðareign og að afnumin verði veðsetning útgerðar á óveiddum
fiski í sjó sem opnaði leið fyrir yfirveðsetningu og ofurskuldir sjávarútvegsins. Sölu- og leigubraskið þarf að afnema.
Sjómönnum er ætlað að borga núverandi handhöfum kvótans okurverð fyrir réttinn til fiskveiða. Í gamla daga hét þetta
vistarband. Sanngjarnt leigugjald til ríkisins á að taka upp. Við spurðum í sérstakri auglýsingu fyrir kosningar 2007 um vísitölu
verðtryggingar: „Verður þú gjaldþrota?“ Þá, eins og nú, vildum við Frjálslyndir einir afnema vístölu verðtryggingar á lánum til
fólks. Nú er aðför að húseigendum, verðtryggðar skuldir hækka en eignir lækka. Nú vilja fleiri en Frjálslyndir vinna gegn
verðtryggingu lánsfjár en samt fær frumvarp okkar um það mál ekki afgreiðslu á Alþingi.
Við viljum ekki ganga inn í ESB og teljum að sjálfstæði okkar og yfirráð á auðlindum beri að tryggja.
Frjálslyndi flokkurinn hefur á undanförnum árum beitt sér fyrir mörgum félagslegum úrbótum svo sem hækkun persónu
-afsláttar, hækkun á lífeyri úr almannatryggingum og greiðslum úr lífeyrissjóðum og bættri stöðu aldraðra og öryrkja. Við viljum
mikla lækkun vaxta nú þegar og eflingu atvinnulífsins. Atvinnuleysið er eitthvert versta böl sem fólk stendur frammi fyrir í lífinu
og er brýnasta úrlausnarefnið núna.
Góðir landsmenn.
Frjálslyndi flokkurinn hefur mátt þola erfið innanflokksátök sem skert hafa trúverðugleika flokksins í augum fólks. Þessi átök
eru nú að baki. Framboðslistar í öllum kjördæmum liggja fyrir, skipaðir ágætu fólki sem vill fylgja fram góðum og réttlátum
málum.
Það er von mín að íslenskir kjósendur telji nauðsynlegt að ná fram þeim meginmarkmiðum sem Frjálslyndi flokkurinn stendur
fyrir. Ég heiti því fyrir hönd okkar frambjóðenda Frjálslynda flokksins að berjast til þrautar fyrir þessum málum og legg þar
við drengskap minn.
Með góðri kveðju,
__________________________________
Guðjón Arnar Kristjánsson,
formaður Frjálslynda flokksins