Vikan - 21.01.1960, Qupperneq 19

Ennio Girolami heitir einn hinna kvenhollu heljarkarla ítalskra kvik-
mynda. Tveimur hugdjörfum ljósmyndurum þótti bera vel í veiði, þegar
þeir komust að því, að Ennio væri staddur í Borghese-skógi og gamnaði
sér með ungri kvikmyndastjörnu, Vicky Ludovisi. Ljósmyndararnir ákváðu
að gera sér mat úr þessu og héldu á vettvang með alvæpni, hvor með
sína myndavélina. En Ennio var ekki á þeim buxunum, að hann léti slíkt
viðgangast orðalaust. Fyrsti glampinn frá myndavél þess ljósmyndarans,
sem á undan fór, kom leikaranum úr jafnvægi, og unga stúlkan dró pils-
faldinn niður fyrir hné í snatri.
En ljósmyndararnir voru frá byrjun við hinu versta búnir. Þeir höfðu
skipt með sér liði, — sá, sem fór fyrir, var ekki líklegur til að ná nema
einni til tveimur myndum, áður en hinn fokvondi leikari réðist á hann,
— svo að hinn ljósmyndarinn, sem á eftir kom, beið þess bara reiðu-
búinn að taka myndir af atlögpnni. Hér skella þeir saman, Ennio og ljós-
myndarinn, og ber myndin með sér, að atgangur hefur verið allharður.
Stúlkunni leizt alls ekkert á blikuna, þegar hún sá, hvað verða
vildi, og þótti illa farið með góða skemmtan, að ljósmyndasnápar
skyldu eyðileggja hina unaðslegu samverustund í skóginum. En
ljósmyndararnir virtust sneyddir öllum mannlegum tilfinningum,
og aftur blossaði ljósmyndaglampinn. Nú var heljarkarlinum Ennio
hins vegar nóg boðið, — honum skyldi ekki verða skotaskuld
úr því að sýna þessum hundum svart á hvítu, hvar Davíð keypti
ölið. Hann lagði til atlögu, ófrýnilegur á svip.
Sem ekki er nema von, má venjulegur ljósmyndari sfn ekki
mikils gegn fílefldum heljarkarli og þaulæfðum áflogahundi. Það
kom líka á daginn, að hér var ójafn leikur. En það hlakkaði í
ljósmyndaranum, meðan hann tók við hverju högginu af öðru, —
hann vissi sem var, að hann átti liðsauka að baki sér og allt var
í sölurnar leggjandi fyrir góðar myndir af frægu fólki við þessar
aðstæður. Og þegar þeim félögum með myndavélarnar þótti komið
nóg, hlupu þeir sem ákafast á brott með bráð sína. Hérna sjáum
við svo afrakstur erfiðisins: — Bardaga í fjórum lotum, — eins
og myndasmiðirnir hafa nefnt hann.