Læknablaðið : fylgirit - 01.03.1983, Page 5
FORMÁLI
Samvinna Norðurlanda á sviði öldrunarfræða hefur verið sannreynd í fjórum vel heppnuðum
ráðstefnum, sinni í hverju landi. Vorið 1981 féll sá heiður í hlut íslands að sjá um 5. Norrænu
ráðstefnuna í öldrunarfræðum. Var hún haldin dagana 30. maí til 2. júní að Hótel Loftleiðum í
Reykjavík. Veg og vanda af ráðstefnunni hafði Öldrunarfræðafélag íslands, en það félag var
upphaflega stofnað árið 1973 m. a. til þess að taka þátt í norrænni samvinnu á sviði öldrunarfræða.
Öldrunarfræðin skiptist í margar vísindagreinar. Á þessari ráðstefnu var leitast við að ná jafnvægi
milli ólíkra greina öldrunarfræðinnar. Fjallað var um faraldsfræði öldrunar, öldrunarbreytingar í
stoðkerfi, aðstæður og afkomu aldraðra, öldrunarlækningar, öldrunarþjónustu, sálarfræði, geð-
læknisfræði og öldrunarsjúkdóma í miðtaugakerfi.
Erindi ráðstefnunnar eru nú gefin út sem fylgirit við íslenska Læknablaðið. Er það von okkar að
þátttakendum ráðstefnunnar, svo og íslenskum læknum þyki fengur að útgáfu ritsins.
Eins og forseti íslands nefndi í ávarpi sínu við opnun ráðstefnunnar, verður Elli kerlingu oft hnikað
um set og ber að vona að útgáfa erinda ráðstefnunnar verði hjálp í þeirri viðleitni að seinka
ótímabærri elli, jafnvel þó vitað sé að hún verði ekki með öllu umflúin.
Öllum ráðstefnugestum þökkum við fyrir þátttökuna, sem var mjög uppörvandi fyrir þá aðila, sem
að öldrunarmálum starfa í landinu. Við viljum einnig þakka þeim ýmsu aðilum, sem styrktu
ráðstefnu þessa og gerðu kleift að koma efni hennar á þrykk.
Ársæll Jónssort,
Sigurueig H. Sigurðardóttir,
Þór Halldórsson.
3