Reykjavík - 05.04.2014, Blaðsíða 8

8 5. apríl 2014REYKJAVÍK VIKUBLA
Ð
Skrautlegur ferill Skuggamanna
Mennirnir að baki félaginu Skuggi 3 ehf., sem á lóð og byggingarétt á nýjum
turni í 101 Skuggahverfi í Reykjavík, eiga að baki langan feril í viðskiptum
hér á landi. Sumir hafa á ferli sínum safnað milljarða skuldum og hafa tengst
dómsmálum vegna efnahagsbrota í aðdraganda og eftirleik bankahrunsins.
Ný turnbygging í 101 Skuggahverfi
í Reykjavík er mjög umdeild. Áform
hafa verið um að reisa þar margra
hæða íbúðarhús með lúxusíbúðum,
en turn á þessum stað, upp við neðsta
hluta Frakkastígs mun, miðað við fyr-
irliggjandi áætlanir, skyggja verulega
á útsýni af Skólavörðuholti og niður
Frakkastíginn, einum besta útsýnisstað
borgarinnar.
Árið 2006 var samþykkt skipulagið
sem núverandi framkvæmd byggir á.
Borgaryfirvöld telja þetta óráð. Nú
blási aðrir vindar í skipulagsmálum. En
telja sig um leið fátt geta gert í málinu,
annað en höfða til samvisku verktak-
ans. Skipulagsfulltrúa borgarinnar var
falið að ræða við verktakann, en lítið
fréttist af þeim viðræðum.
Félagið Skuggi 3 ehf. er handhafi
lóðarinnar á reitnum og þar með
byggingarrétti. Félagið var stofnað í
nóvember í fyrra.
Fáir menn
Samkvæmt upplýsingum frá fyrir-
tækjaskrá er félagið í eigu fjögurra fyr-
irtækja. Þau eru Litluvellir ehf. sem eiga
helming í félaginu, Ursus Maritinus
ehf. sem á fjórðung, og Pétur Stefáns-
son ehf. og B15 ehf. eiga 12,5 prósent
hvort.
Stjórnarmenn í Skugga 3 eiga allir að
baki nokkurn ferli í viðskiptum, sem
og fleiri sem félaginu tengjast.
Í stjórninni sitja þeir Jakob Valgeir
Flosason útgerðarmaður frá Bol-
ungarvík og sem kenndur hefur verið
við Stím. Pétur Stefánsson, útgerðar-
maður og Hilmar Ágústsson, en hann
á félagið Litluvelli ásamt Kristjáni
Gunnari Ríkharðssyni.
Bjarni Brynjólfsson var stjórnarfor-
maður Skugga 3 við stofnun, en sagði
sig úr stjórn í byrjun mars.
Keyptu af sjálfum sér
Fram kemur í stofngögnum Skugga
3 ehf. sem Reykjavík vikublað fékk
afhent hjá fyrirtækjaskrá að hlutafé
Skugga 3 sé 200 milljónir króna. Einnig
að greiddir hafi verið 1,15 milljarðar
króna fyrir fasteignir að Vatnsstíg
20-22 þar sem nýi turninn á að rísa
og Lindargötu 39. Þetta eru þær lóðir
sem ekki eru fullbyggðar í samræmi
við upphaflegar áætlanir.
Fram kemur í stofngögnunum að
seljandinn sé félagið Litluvellir ehf. en
félagið á sem að framan greinir helm-
ingshlut í Skugga 3. Þannig hafa sömu
aðilar selt sjálfum sér bygginarréttinn
inn í nýtt félag, í samstarfi við aðra.
Byrjaðir að selja íbúðir
Í þessum gögnum segir enn fremur
að við mat á kaupverði eignanna sé
litið til þess að þegar hafi fengist bind-
andi tilboð í nokkrar íbúðir, þar sem
kaupverðið nemi á bilinu 700 þúsund
krónur og upp í eina milljón króna fyrir
hvern fermetra. Samkvæmt heimasíðu
Íslandsbanka hefur fermetraverð í
miðbænum farið hækkandi, en er að
jafnaði í kringum 350 þúsund krónur.
Í stofngögnunum segir einnig að
heildarfasteignamat eignanna sé
þegar yfir 424 milljónir króna, „þótt
óbyggðar séu“ segir í stofngögnunum.
Þar er jafnframt greint frá því að fjár-
málastofnun hyggist fjármagna verkið
á grundvelli þessara forsendna.
Ýmis tengsl
Mennirnir sem tengjast Skugga 3 hafa
sumir víða komið við í viðskiptum og
sum komið til umfjöllunar í fjölmiðlum,
ýmist vegna gjaldþrota eða sakamála.
Þannig hafa mál Jakobs Valgeirs
Flosasonar hafa mikið verið til um-
fjöllunar, en hann átti 2,5 prósenta
hlut í Stími og var stjórnarformaður
félagsins. Það fékk háar upphæðir að
láni frá Glitni fyrir Hrun; í allt yfir
20 milljarða króna. Féð fór til þess að
kaupa hlutabréf í bankanum sjálfum
og í félaginu FL group, en þau urðu
bæði gjaldþrota. Veð fyrir lánunum
voru hlutabréfin sjálf. Embætti sér-
staks saksóknara ákærði nýlega þrjá
menn vegna Stím málsins. Jakob Val-
geir var ekki ákærður í málinu.
Í réttarhöldum yfir Jóni Ásgeiri
Jóhannessyni í gær var sýndur tölvu-
póstur frá forsvarsmönnum Samherja
þar sem þeir afþökkuðu þátttöku í
Stím málinu. Jón Ásgeir sagðist ekki
vita hvers vegna tölvupósturinn hefði
verið sendur á hann.
Jakob Valgeir situr í stjórn Skugga
3 fyrir hönd félagsins B15 ehf. Það er
að fullu í eigu Bjargar H. Daðadóttur,
eiginkonu hans. Félagið B15 hefur svo
aftur komist í fréttir vegna flókinna
viðskipta með sjávarútvegsfyrirtæki
sem tengdust gamla Landsbankanum,
en B15 keypti félagið Salting með yfir-
töku skulda upp á um milljarð króna,
að því er fram kom í fréttum.
Lán frá lífeyrissjóði
Kristján Gunnar Ríkharðsson, annar
eigenda Litluvalla, er jafnframt eig-
andi félagsins Skuggabyggðar, sem
hefur staðið í framkvæmdum við
Vatnsstíg 16-18, á næstu lóð þar
sem til stendur að reisa turninn auk
þess að standa í framkvæmdum við
Mánatún í Reykjavík. DV greindi frá
því fyrir tveimur árum að árið 2010
hefði Arion banki selt Skuggabyggð
fjölbýlishús við Mánatún 3-5. Þá
hafi Skuggabyggð verið eignalaust
félag, en ári síðar hefði Sameinaði
lífeyrissjóðurinn fjármagnað fyrstu
útborgun á kaupverðinu til Arion
banka. Þá hefði bankinn síðar sama
ár jafnframt lánað Skuggabyggð á
fjórða hundrað milljóna króna til að
ljúka við framkvæmdir við fjölbýl-
ishúsið.
Tengsl við Exista
Félagið skilaði um 200 milljóna króna
hagnaði árið 2012. Fram kemur í árs-
reikningi Skuggabyggðar fyrir þetta
sama ár að félögin Dán tán ehf., sé
jafnframt í eigu Kristjáns Gunnars,
en félagið hefur meðal annars verið
með áform um að reisa fjögurra
hæða fjölbýlishús við Baldursgötu,
og samkvæmt reikningnum er fé-
lagið Reykjanesbyggð ehf. einnig í
eigu Kristjáns Gunnars.
Það félag er nefnt í ákæru sérstaks
saksóknara á hendur Sigurði Val-
týssyni, fyrrverandi forstjóra Exista
vegna ætlaðra umboðssvika, þegar
Vátryggingafélag Íslands keypti 40
prósenta hlut í Reykjanesbyggð fyrir
150 milljónir króna. Kristján Gunnar
og Sigurður eru tengdir fjölskyldu-
böndum. Kristján Gunnar var ekki
ákærður í málinu.
Ísbjörninn
Félag Bjarna Brynjólfssonar, Ursus
Maritimus, heitir eftir latneska
heitinu á ísbirni. Félagið komst í
fréttir undir lok árs í fyrra, en greint
var frá því að það stefndi að því að
flytja allt að einn og hálfan milljarð
króna hingað til lands í gegnum fjár-
festingaleið Seðlabankans. Með fjár-
festingaleiðinni er hægt að fá 20 pró-
senta afslátt af peningum. Bjarni vildi
rétt fyrir jólin ekki svara spurningum
DV um til hvers féð væri ætlað.
Gamalt heiti
Skuggahverfi er á milli Skúlagötu
og Hverfisgötu annars vegar og
Frakkastígs og Klapparstígs hins
vegar. Hverfið dregur nafn af
Skugga, fyrsta húsinu sem byggt
var á þessu svæði um 1800. Skuggi
stóð að líkindum niður við sjó, rétt
austur af þar sem Klapparstígur
kemur niður á Skúlagötu og réru
bændur þaðan úr samnefndri vör,
Skuggavör.
Forsaga
Eimskipafélagið átti lóðirnar í 101
Skuggahverfi og skipulögðu byggð
þar ásamt borginni í kringum árið
2000. Félagið var um tíma hluti
af fasteignafélaginu Stoðir sem að
mestu leyti var í eigu Baugs og þar
með hluti af viðskiptaveldi Jóns Ás-
geirs Jóhannessonar, líkt og Glitnir
var þegar Stím málið átti sér stað.
Reykjavík vikublað hefur ekki rekist
á tengsl gamalla eigenda við núver-
andi eigendur á byggingasvæðinu.
Byggingaréttur á reitnum hefur
skipt um hendur. 101 Skuggahverfi
átti hann, en félagið Skuggabyggð
aðrar lóðir á þessum stað. Eftir því
sem blaðið kemst næst þá þarf ekki
að gera Reykjavíkurborg viðvart um
hver hafi byggingarrétt hverju sinni.
Borgarfull-
trúar á móti
„Turninn og reiturinn allur er al-
mennt á skjön við umhverfis- og
skipulagsáherslur í dag. Í aðal-
skipulagi Reykjavíkur 2010-2030
kemur fram skýr stefna þar sem
tekið er tillit til fleiri þátta en
áður, m.a. um hæðir húsa, um
sjónása, verndun eldri byggðar
og byggðarmynsturs. Það breytir
þó ekki átta ára gamalli sam-
þykkt, deiliskipulagið er í gildi og
byggingarleyfi hafa verið gefin út,“
sagði í bókun Besta flokksins, Sam-
fylkingar og Vinstri grænna á fundi
skipulagsráðs nýlega þar sem fjallað
var um málið, en gengið var frá
skipulagi þarna árið 2006. Borgar-
fulltrúar Sjálfstæðisflokksins sögðu
í bókun á sama fundi að á síðasta
kjörtímabili hefði verið óskað eftir
því að turninn yrði færður innar
á lóðina, en á það hafi ekki verið
fallist.
fréttaSkýring
Horft niður Frakkastíginn. Neðst í götunni sést byggingakrani en óttast er að
turninn fullbyggður muni spilla þessu útsýni og útsýni ofan af Skólavörðuholti.
Helmingseigendur í Skugga 3 seldu lóð og byggingarrétt fyrir ríflega milljarð króna út úr eigin félagi.
Gerðu athugasemdir
Hjónin Elín Ebba Ásmunds-
dóttir og Jon Kjell Seljeseth gerðu
athugasemdir við fyrirhugaða 19
hæða turnbyggingu í Skuggahverf-
inu árið 2006. Elín Ebba segir í sam-
tali við Reykjavík vikublað að þau
hafi átt fund með Steinunni Valdísi
Óskarsdóttur, sem þá var formaður
skipulagsnefndar borgarinnar og
þar lýst áhyggjum sínum. Fjallað var
um málið í fréttum Ríkisútvarpsins
í vikunni og þar haft eftir Steinunni
Valdísi að hún kannaðist ekki við
fundinn.
Hjónin Elín Ebba og Jón létu ekki
staðar numið við fundinn en hafa
frá ársbyrjun 2008 skrifað borgaryf-
irvöldum fjölmörg bréf vegna máls-
ins. Fram kom í áskorun skipulags-
ráðs borgarinnar til verktaka sem
greint er frá hér á síðunni að engar
athugasemdir hefðu verið gerðar
við þessar framkvæmdir á sínum
tíma.
Elín Ebba Ásmundsdóttir og Jon
Kjell Seljeseth.
Mynd: Skjámynd úr fréttum RÚV.