Fréttatíminn - 01.08.2014, Blaðsíða 16

Atvinnumennska
er draumurinn
Á hverju ári skjótast nýjar stjörnur fram í íslensku knatt-
spyrnunni. Pepsideildin hefur á undanförnum árum framleitt
fjöldann allan af ungum og efnilegum leikmönnum sem seinna
fara svo í atvinnumennsku og verða vonarstjörnur Íslands
á hinu alþjóðlega sviði knattspyrnunnar. Í ár hefur engin
undantekning orðið þar á. Það hafa margir ungir og efnilegir
leikmenn sannað sig í sumar og einn þeirra er Víkingurinn
marksækni, Aron Elís Þrándarson.
A ron er fæddur og uppal-inn í Fossvoginum, tæplega tvítugur að
aldri og hefur eytt meirihluta
ævi sinnar í Víkinni, heimavelli
Víkinga í Reykjavík. Hann var
farinn að sofa með boltann
ungur að árum og hefur alltaf
stefnt hátt.
„Ég hef aldrei spilað með
öðru liði á Íslandi. Byrjaði að
æfa undir stjórn pabba míns í
yngri flokkunum og hann var
þjálfarinn minn þangað til að
ég fór í 4. flokk.“ Faðir Arons
er Þrándur Sigurðsson sem
hefur þjálfað yngri flokka Vík-
ings um árabil.
„Það kom aldrei neitt annað
til greina en að vera bara í fót-
bolta. Við vorum með gott lið í
yngri flokkunum, það gekk vel
og var mjög gaman svo þetta
var aldrei spurning.“
Aron spilaði með Víkingum í
næst efstu deild á síðasta ári og
gerði sér lítið fyrir og skoraði
14 mörk í 14 leikjum og þá
fóru menn að fylgjast náið með
pilti.
Þáttur Óla og Milos
„Ég hef ekkert alltaf verið
þessi markaskorari. Ég skoraði
mikið í yngri flokkunum en
svo þegar maður fór að spila
í 11 manna bolta þá
fann maður frekar sína
stöðu og þá minnkaði
markaskorunin. Þá
breyttist maður sem
knattspyrnumaður,
eins og gerist oft á þeim
tíma.
Fyrsta tímabilið mitt
hjá Óla fékk ég að spila
nokkra leiki og skoraði
lítið. Þá fór ég bara að
vinna í því og mætti
sumarið eftir og setti
þessi 14 mörk. Hefði
viljað skora meira en
meiddist og náði ekki
að spila alla leikina.“
Þjálfari Arons hjá Vík-
ingi er hinn margreyndi
Ólafur Þórðarson sem
Aron segir hafa hjálpað
sér mikið.
„Óli og Milos aðstoð-
arþjálfari eiga stóran
þátt í því hvað ég hef
bætt mig mikið.“ Víkingar eru
sem stendur í 3. sæti Pepsi-
deildarinnar og Aron búinn að
skora 5 mörk.
„Eins og er gengur mjög vel
hjá okkur og gaman að vera
partur af því.“
Markmiðið er að spila
fyrir Íslands hönd
Alla unga knattspyrnumenn
dreymir um atvinnumennsku
og hjá Aron er þar engin und-
antekning.
„Það hafa lið frá Hollandi
og Norðurlöndunum verið að
spyrjast fyrir um mig, en ég er
eiginlega ekki að spá í það akk-
úrat núna. Mér líður vel með
Víkingunum og vil einbeita mér
að því að ná þeim markmiðum
sem við höfum sett okkur. Svo
skoðar maður kannski eitthvað
í vetur.“
Aron kláraði stúdentinn frá
Versló núna í vor svo hann er
tilbúinn að einbeita sér að fót-
boltanum eftir sumarið.
„Fótboltinn hefur alltaf verið
númer eitt, en mér fannst mik-
ilvægt að klára stúdentinn áður
en lengra er haldið. Maður veit
ekkert hvað framtíðin ber í
skauti sér og ferill knattspyrnu-
manns getur verið óútreiknan-
legur. Það var bæði pressa frá
foreldrunum og líka gerir mað-
ur kröfur á sjálfan sig. Ég vildi
klára þetta og er mjög ánægður
með að þetta slapp fyrir horn í
vor,“ segir Aron glottandi.
Aron Elís hefur spilað með
öllum yngri landsliðum Íslands
og í byrjun sumars spilaði
hann sinn fyrsta leik með U-21
landsliðinu þegar þeir mættu
Svíum í erfiðum leik sem
tapaðist 0-2.
„Það eru leikir hjá U-21 í
september og vonandi fæ ég
tækifæri til þess að spila þá
leiki. Markmiðið er svo að
spila fyrir Íslands hönd og
fá tækifæri til þess að vinna
við það skemmtilegasta sem
maður gerir, sem er að spila í
fótbolta,“ segir Aron Elís sem
verður gaman að fylgjast með í
framtíðinni.
Hannes Friðbjarnarson
hannes@frettatiminn.is
Fótboltinn
hefur alltaf
verið númer
eitt, en mér
fannst mikil-
vægt að
klára stúd-
entinn áður
en lengra er
haldið.
Aron Elís Þrándarson
Fæddur 10.11. 1994.
Víkingur 59 leikir, 26 mörk í deild og bikar.
Ísland U-17 9 leikir 0 mörk.
Ísland U-19 9 leikir 1 mark.
Ísland U-21 1 leikur 0 mark.
Uppáhaldslið í enska boltanum Liverpool.
Uppáhalds knattspyrnumaður Lionel Messi.
Aron Elís Þrándarson. Athygli vakti fyrr
í sumar, eftir leik Víkings og Keflavíkur,
þegar Kristján Guðmundsson, þjálfari
Keflavíkur, hrósaði leikmanninum í
hástert. „Ég hvet alla til að mæta á völl-
inn og horfa á hann spila meðan hann er
hér á landinu,“ sagði hann. Mynd Teitur
16 viðtal Helgin 1.-3. ágúst 2014