Bæjarins besta - 27.01.2011, Qupperneq 2

2 FIMMTUDAGUR 27. JANÚAR 2011
Samkeppnishæfni lands-
byggðarinnar fer versnandi
Síhækkandi eldsneytisverð
hefur skaðað samkeppnishæfni
landsbyggðarinnar verulega og
þá sérstaklega útflutningsfyrir-
tæki sem þurfa að koma afurðum
sínum á markaði erlendis. „Á
undanförnum árum hafa mörg
iðnfyrirtæki horfið af sjónarsvið-
inu hér vestra og með þeim yfir
300 störf,“ segir Jóhann Jónasson,
framkvæmdastjóri 3X Techno-
logy á Ísafirði. „Nú er svo komið
að það er orðið verulega óhag-
stætt að hafa iðnfyrirtæki starf-
andi á landsbyggðinni. Sér í lagi
þegar horft er til síhækkandi elds-
neytisverðs sem hefur áhrif á
flutningsgjöld og þar með skakka
samkeppnisstöðu þeirra fyrirtækja
sem þurfa að flytja til sín aðföng
og frá sér tilbúnar vörur á mark-
aði erlendis. Samkeppnisstaða
landsbyggðarfyrirtækja gagnvart
fyrirtækjum á Reykjavíkursvæð-
inu og síðan gagnvart fyrirtækj-
um í Evrópu hefur farið hríð-
versnandi,“ segir Jóhann.
„Nú er svo komið að vöruflutn-
ingur frá Ísafirði til Reykjavíkur
er helmingurinn af flutnings-
kostnaði vörunnar á leið sinni til
hafnar í Evrópu. Þegar vara er
flutt frá Ísafirði til Reykjavíkur
með flutningabíl nemur svokall-
að olíugjald nálega þriðjungi af
kostnaðinum á þeim flutnings-
legg. Þessi þróun er tilkomin vegna
skattpíningarstefnu stjórnvalda
og síðan heimsmarkaðsverði á
olíu. Því er hægt að segja að stefna
núverandi ríkisstjórnar með
auknum álögum á eldsneyti komi
harðast niður á útflutningsfyrir-
tækjum á landsbyggðinni. Kostn-
aður við aðföng er kominn langt
yfir það sem nokkurt fyrirtæki
getur tekið á sig, enda lætur nærri
að félög í iðnaðarframleiðslu, að
stóriðju undanskilinni, á lands-
byggðinni greiði á endanum 10%
hærra hráefnisverð en félög sem
starfa nærri skilgreindri útflutn-
ingshöfn, þ.e. í Reykjavík. Því er
það tómt mál að tala um að auka
útflutning með nýsköpun í iðn-
aði eins og svo vinsælt er að
stjórnmálamenn skreyti sig með
á tyllidögum, allavega þarf ekki
að hafa miklar áhyggjur af því
slík félög sæki fram á lands-
byggðinni,“ segir Jóhann.
Jóhann segir þó að ábyrgðin
liggi ekki alfarið hjá ríkinu.
„Ábyrgðin liggur einnig hjá sveit-
arstjórnum; aðgerðarleysi þeirra
og röng forgangsröðun hefur ekki
spornað við hnignuninni. Í því
sambandi má nefna að það er
ótrúlega lítil umræða um sam-
keppnishæfni byggðakjarna á
landsbyggðinni og fólk er alltaf
jafn hissa þegar að fyrirtæki loka
eða leggja upp laupana á lands-
byggðinni. Það er ótrúlega lítill
áhugi innan sveitarstjórna um að
greina samkeppnisstöðuna, bæði
innbyrðis milli sveitarfélaga á
landsbyggðinni annars vegar og
gagnvart höfuðborgarsvæðinu
hins vegar. Sveitarfélögin eiga
ekki að vera upptekin af því að
finna uppá hverskonar fyrirtæki
þau vilja fá á svæðið, heldur ein-
beita sér að því að skapa jarðveg
með góðum gróanda,“ segir Jó-
hann.
„Það er brýnt að samfélagið
hér vestra undir forystu bæjar-
yfirvalda komi saman til að móta
leiðir sem tryggja viðgang iðn-
aðar og almennra starfsskilyrða
á svæðinu. Með áframhaldandi
aðgerðarleysi hefur teningunum
verið kastað,“ segir Jóhann.
Viltu breyta?
Þriggja mánaða námskeið þar sem þátttak-
andi er aðstoðaður við að velja holla lifnaðar-
hætti. Notaðar verða einstaklingsmiðaðar að-
ferðir til að styðjast við, leiðbeina, veita fræðslu
og hvetja þátttakanda. Þátttökuskilyrði eru að
líkamsþyngdarstuðull sé hærri en 30 BMI.
Takmarkaður fjöldi, lokaður hópur
Heilsufarsviðtöl hjá hjúkrunarfræðingi.
Viðtöl og farið yfir matardagbók með nær-
ingarfræðingi.
Viðtal hjá sjúkraþjálfara.
Styrktar- og hreyfiþjálfun hjá íþróttakennara.
Vatnsleikfimi hjá leiðbeinanda.
Almenn fræðsla um góða lifnaðarhætti.
Starfsfólk:
Sigrún Gerða Gísladóttir, hjúkrunarfræðing-
ur, MA í stjórnun.
Salome Elín Ingólfsdóttir, næringarfræðingur.
Sigurgeir Sigurgeirsson, matreiðslumaður.
Jónas Leifur Sigursteinsson, íþróttakennari.
Guðrún D. Guðmundsdóttir, stuðningsfulltrúi.
Martha Ernstsdóttir, sjúkraþjálfari.
Fanney Pálsdóttir, sjúkraþjálfari.
Skráning er hjá Ragnheiði Ragnarsdóttur í
síma 862 7615. Námskeiðið hefst miðvikudag-
inn 2. febrúar 2011 kl. 20:30 í Hvítahúsinu. Verð
kr. 21.000.- fyrir þrjá mánuði.
Fyllsta trúnaðar verður gætt við þátttakend-
ur.Möguleiki er að sækja um styrk hjá við-
komandi stéttarfélagi.
Vegleg peningagjöf var afhent
Bolungarvíkurkaupstað í upphafi
þorrablótsins í Bolungarvík á
laugardaginn. Upphæðin nam
rúmlega 1,3 milljónum króna en
um var að ræða varasjóð þorra-
blótsnefnda undanfarin ár sem ætl-
að er til stólakaupa í hinu nýupp-
gerða félagsheimili Bolvíkinga.
„Þorrablótið er ekki fjáröflun-
arsamkoma en eins og konum
sem reka heimili er títt, verður
alltaf einhver smá afgangur til,
en safnað hefur verið saman und-
anfarin tíu ár í svokallaðan stóla-
kaupasjóð,“ segir Þóra Hansdótt-
ir formaður þorrablótsnefndar.
Svo skemmtilega vildi til að
Guðlaug Elíasdóttir sem fór fyrir
nefndinni sem stofnaði sjóðinn á
sínum tíma var einnig í þorra-
blótsnefndinni í ár og þótti því
tilvalið að hún skyldi afhenda
ávísunina. – thelma@bb.is
Rúmar 1,3 milljónir
króna til stólakaupa
Elías Jónatansson, bæjarstjóri Bolungarvíkur, tekur á móti ávísuninni frá Guðlaugu Elíasdóttur.