Norðurslóð - 30.09.1986, Blaðsíða 4
Frá Svarfaðardalshreppi
Þorgils Sigurðsson, póstmeistari á Dalvík er ein annálaðasta hvalaskytta við Eyjafjörð. Hann segir sjálfur að
örugglega hafi hann banað á annað þúsund hvölum um dagana.
I.ærifaðir hans var Baldvin Sigurðsson á Dalvík, Hnísu-Baldi stundum kallaður. Einnig móðurbróðir Þorgilsar,
Kristján E. Jónsson í Nýjabæ sem líka kenndi honum veiðibrellurnar.
Á myndinni er Þorgils á hafnarbakkanum á Dalvík með nýlega veiði, en það er sjaldgæf hvalategund, afbrigði af
höfrungi sem Hnýðingur nefnist og hefur annan lit og annarskonar bakugga en t.d. háhyrningurinn.
Með veiðimanninum er Þórarinn P. Þorleifsson og leynir sér ekki aðdáun í svip hans.
Fundir hreppsnefndar
Samkvæmt nýjum sveitar-
stjórna'rlögum eiga fundir
hreppsnefnda að vera opnir
almenningi. Þar eru opinber
mál til umræðu og hver sem
áhuga hefur á að geta hlýtt á
umræðurnar. Því hefur nú verið
ákveðið að fundir hreppsnefndar
verði framvegis í Húsabakka-
skóla, stofu 3 kl. 21.00 fyrsta
sunnudag hvers mánaðar. Fund-
irnir verða ekki auglýstir frekar,
nema eitthvað sérstakt sé til
umræðu og vekja þurfi athygli á
því. Fyrirkomulag þetta ætti að
geta orðið til hagræðis fvrir þá
sem skjóta þurfa málum til
hreppsnefndarinnar eða nefnda
á hennar vegum.
Viðtalstími
Þeir sem þurfa að „finna
oddvita" hafa kvartað yfir því
að vita ekki á hvaða tíma
hentugast er að koma. Því
verður hér með komið á föstum
viðtalstímum á skrifstofu
hreppsins.
Mánudaga kl. 10.00-12.00
Miðvikudaga kl. 16.00-18.00
Laugardaga kl. 14.00-16.00
Að sjálfsögðu geta menn haft
samband á öðrum tímum, en
viðtalstímarnir ættu að tryggja
að oddvitinn sé við þegar á að
finna hann.
Sundskálinn
Byggingarframkvæmdir við nýja
búningsklefa eru nú hafnar.
Vaskir ungmennafélagar rifu
gömlu klefana og tók það
skamma stund. Rúnar Búason
húsasmíðameistari hefur tekið
að sér að byggja nýju klefana.
Stefnt er að því að gera bygging-
una fokhelda á haustinu, en
fjárveitingar eru ekki til frekari
aðgerða núna. Vonast er til að
hægt verði að kría fé út úr ríkis-
sjóði til að klára verkið strax
eftir áramót. Þá gæti sundskál-
inn komist í gagnið aftur fyrir
vorið.
Innheimta
Gjaldendur í sveitinni hafa
sumir verið að fá miða frá
hreppnum, þar sem vinsamleg-
ast er beðið um greiðslur á gjald-
föllnum skuldum. Á miðanum
er líka þetta staðlaða orðalag
um kostnaðarsamar innheimtu-
aðgerðir, sem beri að forðast.
Svarfaðardalshreppur hefur
yfirleitt ekki sýnt óþarfa hörku í
innheimtuaðgerðum eða sigað
lögfræðingum á menn. Ástæða
er þó til að íhuga hvort ekki
þurfi að herða eitthvað meira á
fólki, því innheimtuhlutfallið er
lágt. Um miðjan september
hafði innheimtst 61,28% af því
sem átti að vera komið inn.
Svona staða er að sjálfsögðu
alltaf bagaleg fyrir hvaða sveitar-
félag sem er. Þegar sveitar-
félagið er líka lítið og máttvana
og stendur í kostnaðarsömum
framkvæmdum, þá verða
vandræðin enn meiri. Þaðerþví
ástæða til að hvetja menn til að
sýna sveitarfélaginu sínu þann
velvilja að gera upp skuldir
sínar við það.
4 -NORÐURSLÓÐ