Skátablaðið Faxi - 01.12.1996, Blaðsíða 2

J óla v aka
SKÁTABLAÐIÐ FAXI
Við könnumst öll við þennan texta
Lúkasarguðspjalli í 2. kafla 10.-11. vers.
En þar stendur “Og engillinn sagði við
þá: “Verið óhræddir, því sjá ég boða
yður mikinn fögnuð, sem veitast mun
öllum lýðnum: Því sjá, yður er í dag
Frelsari fæddur, sem er Kristur Drottinn
í borg Davíðs.”
Ósjálfrátt hugsum við um þessa
atburði, sem greint er frá í jólaguð-
spjallinu um Maríu og Jósep frá
Nasaret, sem urðu eins og allir, að hlýða
boði hins volduga keisara. Við förum
með þeim í anda til Betlehem, þar sem
þau fá ekki rúm í gistihúsinu. Og við
sjáum hið nýfædda barn liggjandi í
jötunni. Yfir þessari frásögn hvílir blær
einfaldleikans, en þó var hér heims-
sögulegur viðburður að gerast. Það var
ekki keisarinn eða sendimenn hans sem
tóku á móti honum heldur fátækir
fjárhirðar, sem vöktu yfir hjörð sinni úti
í haga þessa nótt. Þessi boðskapur hefur
verið fluttur mannkyninu æ síðan, ekki
aðeins á jólunum og öðrum hátíðar-
stundum. Þetta er sígildur boðskapur
allra tíma, kjarni kristindómsins.
Þegar við nú fögnum hinni miklu
hátíð og við finnum frið og helgi hennar
fylla hjörtu okkar, heimili okkar og jafn-
vel allt í kring um okkur, þá vona ég að
þessi hugsun sé bak við allt: „Okkur er í
dag frelsari fæddur”.
Okkur öllum stendur til boða að
öðlast þau lífssannindi, sem ekki aðeins
hefur gildi fyrir lífið, heldur þá framtíð,
sem bíður í öðrum heimi.
Eins og jólin geta breytt umhverfinu
og varpað yfir það undursamlegum
töfraljóma, geta sannindi kristindómsins
Björgvin Magnússon D.C.C.
með raunsæi sínu og alvöru breytt
viðhorfum og lífi okkar.
Þegar við lesum eða heyrum um þessa
atburði, sem einkum snerta jólin, þá eru
þetta ekki frásagnir, sem aðeins snerta
löngu liðna atburði, heldur frásagnir,
sem tengja saman ár og aldir. Þegar við
lesum: Yður er í dag Frelsari fæddur, þá
leggjum við áherslu á orðin í dag til þess
að undirstrika að kjarni þessara atburða
sé veruleiki líðandi stundar og að okkur
sé Frelsari fæddur, bæði mér og þér.
Það er ekki nóg að fagna jólunum
með alls konar ytra skrauti og prjáli. Við
megum ekki setja jólabarnið á flótta
fyrir þeim konungi, sem lætur okkur
lúta ytra prjáli og sundurgerð. Við
megum ekki gera jólin að hátíð brasks
og kaupmennsku, tildurs og sýndar-
mennsku.
Nei, við þurfum að eiga næma til-
finningu fyrir því að við þurfum á frels-
ara að halda og þeim sannindum, sem
móta líf okkar.
Jólahátíðin er ólík öllum öðrum
hátíðum ársins. Henni fylgir dásamleg
birta, sem ljómar í skammdegi vetrarins.
Það er alveg eins og ósýnilegir vængir
lyfti huga okkar yfir allt hið jarðneska
og hverfula.
Á heillögu jólakvöldi er eins og hin
undursamlega stund fagnaðar og sælu
við jötuna í Betlehem flytjist inn á heim-
ili okkar, sjúkrahúsin, um borð í skipin
og jafnvel upp í flugvélarnar.
Eg hugsa að aldrei muni jólaboðskap-
urinn berast eins víða og um þessi jól.
Ég sé í huga heimilin, víðs vegar um
landið, sem fagna jólunum bæði fátæk-
leg og ríkmannleg heimili. Þar sem ljós
er í hverjum glugga og ómur lofsöng-
vanna fylla húsin.
Auðvitað koma jólin til okkar með
ýmsu inóti. Sumir eru glaðir og heil-
brigðir, aðrir sjúkir og sorgmæddir, en
þrátt fyrir allt flytja jólin einhverja birtu
og gleði, von og trú á lífið og minna
okkur á að yfir okkur er vakað af kær-
leiksríkri handleiðslu Guðs.
Við skulum því láta áhrif jólanna
verða varanleg og berast út í lífsbarátt-
una sjálfa svo að hin góðu öfl sameinis í
eina fylkingu, sem gengur götuna fram
til farsældar landi og þjóð.
Ég óska svo ykkur og ástvinum ykkar
gleðilegra jóla.
Góða skátun
Björgvin Magnússon D.C.C.
369.405 Ská 1996 14(2) Átthagi
Skátablaðið Faxí.
Átthagadeild
14205124
Utgefið í desember 1996
Útgefandi: Skátafélagið Faxi
Ábyrgðarmaður: Marinó Sigursteinsson
Ritstjóri: Einar Örn Arnarsson
Auglýsingar: Páll Arnar Georgsson
Prófarkalestur: Halla Andersen
Prentvinna: Prentsm. Eyrún hf.
Ritnefnd:
Páll Arnar Georgsson
Einar Örn Arnarsson
Sif Hjaltdal Pálsdóttir
Júlía Ólafsdóttir
Guðmundur Vigfússon
Rósa Guðmundsdóttir (Rósa mamma)
Inkar og Fálkar
Bókasafn Vestmannaeyja