Feykir - 08.05.2014, Blaðsíða 9

17/2014 Feykir 9
Í hugum margra er
vísnakeppni sú sem Safnahús
Skagfirðinga hefur staðið fyrir
í áraraðir, ómissandi þáttur í
þeirri menningarviku sem nú
er nýlokið og voru úrslit
hennar kynnt við formlega
setningu Sæluvikunnar í
íþróttahúsinu á Sauðárkróki.

Vísnakeppnin hefur átt sinn
fasta sess og notið mikilla
vinsælda allt frá árinu 1975 er
hún var haldin í fyrsta sinn að
frumkvæði Magnúsar Bjarna-
sonar kennara og minningar-
sjóðs hans og má vel ímynda
sér að þeir hafi verið fleiri sem
glímdu við vísnasmíði þá en nú
á tímum óþrjótandi afþreyingar
á öldum ljósvakans. Er þó
engin vísindaleg könnun sem
styður þá tilgátu undirritaðs.
Rúnar Kristjánsson á Skaga-
strönd var einn af þeim sem
sendi inn botna og vísur í
keppnina í ár og vildi minnast
Magnúsar á sinn hátt.
Fyrst skal lof hér látnum tjáð
ljóðsins kjarnavini,
manni er átti mennt og dáð,
Magnúsi Bjarnasyni!
Sem fyrr var það Sparisjóður
Skagafjarðar sem gaf verð-
launin, samtals 30.000 krónur
sem deildust milli þeirra er
besta botninn gerði og bestu
vísuna að mati dómnefndar og
vert að þakka stjórnendum
sjóðsins fyrir það framlag.
Dómnefnd sú er nú starfaði í
fyrsta skiptið var skipuð
undirrituðum: Páli Friðriks-
syni, Guðbjörgu Bjarnadóttur
og Ágústi Guðmundsyni.
Rúmur tugur manna tók þátt í
keppninni að þessu sinni og
sendu inn ýmist einn botn
eina vísu eða marga botna við
sama fyrri partinn, nú eða
nokkrar vísur sem að þessu
sinni skyldu snúast um
komandi sveitarstjórnarkosn-
ingar. Fyrripartarnir voru
fjórir talsins og komu úr
smiðju Haraldar S. Haralds-
sonar annars vegar og Hreins
Guðvarðarsonar hins vegar og
hljómuðu svo:
Skagafjörður skartar dýrð
og skaparans er prýði.
Í leik og gleði lífið er
léttast hverjum manni.
Enn mig tæla öll þau game
sem eru á Sæluviku.
Lifnar þor og léttast spor
er líður vor um bæinn.
Krummi sendi inn góða botna
en bak við það dulnefni
reyndist vera Ingibjörg Jóhann-
esdóttir frá Miðgrund.
Skagafjörður skartar dýrð
og skaparans er prýði.
Á hann falli aldrei rýrð
aldir þó að líði.
Ingibjörg fagnar vorkomunni
og botnar eftirfarandi:
Lifnar þor og léttast spor
er líður vor um bæinn.
Blessað lítið blóm í skor,
býður góðan daginn.
Og Eyjólfur Sveinsson á
Sauðárkróki botnar einnig á
þessa leið:
Skagafjörður skartar dýrð
og skaparans er prýði.
Ef annars staðar að þú býrð
ég illa tel að þér nú líði.
Dómarinn sendi inn nokkra
botna og kannski er hér um
einhverjar Sæluvikusyndir að
ræða.
Í leik og gleði lífið er
léttast hverjum manni.
Sínar leiðir syndin fer
samt, þó kirkjan banni.
Dómarinn reyndist vera hinn
ljúfi hagyrðingur Hilmir
Jóhannesson og svona botnaði
hann annan fyrri part.
Lifnar þor og léttast spor
er líður vor um bæinn.
Ekki er slor að eiga Þor-
ólf, forsjárlaginn.
Hvítur hrafn hafði ýmislegt til
málanna að leggja botnaði
sama fyrripart svo:
Lifnar þor og léttast spor
er líður vor um bæinn.
Kýrin borin kind í skor
kópur í slori við sæinn.
Bak við dulnefnið leyndist
Stefán Haraldsson frá Víðidal.
Hafði hann svo þetta til
kosningamálanna að leggja:
Kosningin hún kostar glímu
kvíða og sár hún ber.
Sveitarstjórn í sæluvímu
syndlaus fórnar sér.
Eins og áður var sagt sendi
Rúnar Kristjánsson á Skaga-
strönd botna og vísur og kom
kannski ekki á óvart að þar var
enginn skortur á afbragðs
botnum og er hér einn af þeim:
Í leik og gleði lífið er
léttast hverjum manni.
Bros á vör í heimi hér
heilsar best með sanni.
Rúnar setti kosningarnar í
bundið mál og virðist nokkuð
sáttur:
Lýðræðis er gatan góð
greind með stefnu ljósa.
Alltaf fái okkar þjóð
um sín mál að kjósa!
Ólafur Sindrason er ekki eins
jákvæður og Rúnar út í
pólitíkusana og segir:
Fyrir loforð fátt ég gef -
mig framboð reyna að ginna.
Kosninganna klækjavef
kunna þau að spinna.
Gunnar Rögnvaldsson á
Löngumýri minnist þess er
hann kaus í fyrsta skiptið og
virðist hafa verið efins um
ágæti framboðsins er fékk hans
atkvæði.
Fyrsta krossinn man ég mest
í myrkri stofu inni.
Þá gaf ég aftur gálgafrest
gömlu hreppsnefndinni.
Hilmir Jóhannesson leitar í
sveitina til að skýra sína sýn á
pólitíkina.
Gáfnaljósin gjamma þver,
gamli Mósi er staður.
Ég þá kjósa enn vil hér
enda fjósamaður.
Sæluvikan hefur stundum
verið nefnd æluvikan vegna
afleiðinga víndrykkju sem
getur gengið úr hófi hjá
gleðiþyrstum mönnum en
Alfreð Guðmundsson sútar
það ekkert þegar hann botnar
svo:
Enn mig tæla öll þau game
sem eru á Sæluviku.
Eigi skæli út af þeim
þó ég æli á stiku.
Ari setur saman prýðilegan
botn um fjörðinn fagra:
Skagafjörður skartar dýrð
og skaparans er prýði.
Kvölds í loga skrauti skýrð
skín þá fegurð lýði.
Ari átti náinn frænda sem
einnig sendi inn botn undir
dulnefninu Bubbi:
Í leik og gleði lífið er
léttast hverjum manni.
Ljúfir vindar lyfta sér
og lífga í hverjum ranni.
Það var hann Reynir
Hjörleifsson ættaður frá
Kimbastöðum í Skagafirði sem
átti þá Ara og Bubba og reyndar
fleiri kappa. Einn þeirra var
Finnur en hann vildi gefa
frambjóðendum góð ráð. Þau
geta nú reyndar dugað hverjum
þeim sem lífsandann dregur
nokkuð vel.
Ritaðu öll þín ráð á blað
og réttu þínum vinum.
Oft mun réttast reynast það
sem ráðlegt er af hinum.
Það hefur aldrei talist auðvelt
að gera upp á milli vel gerðra
vísna og fékk dómnefndin að
reyna það. Þær voru nokkrar
sem komu til álita sem besta
vísan og sama má segja um
botnana sem voru nokkru fleiri
en vísurnar. En dagskipunin
var ljós, besta botninn skyldi
velja sem og bestu vísuna og
komst dómnefnd að
eftirfarandi niðurstöðu:
Besta botninn að þessu sinni á
Benedikt Benediktsson bóndi á
Vatnsskarði og mærir hann
dýrð Skagafjarðar á eftirfarandi
hátt:
Skagafjörður skartar dýrð
og skaparans er prýði.
Eflaust verður aldrei skýrð
öll sú listasmíði.
Eins og að framan greinir
virðist Gunnar Rögnvaldsson
hafa verið efins í kjörklefanum í
fyrsta skiptið er hann kaus en
eitthvað hefur það lagast með
tímanum, þó heitin séu sjaldan
efnd. Því lýsir hann í vísunni
sem dómnefndin taldi eiga
skilið fyrsta sætið í keppninni
þetta árið:
Fagurt galar flokkurinn
fáir efna heitin.
Í klefanum fer krossinn minn
á kunnuglega reitinn.
Dómnefnd óskar vinnings-
höfum til hamingju með
árangurinn og þakkar jafnframt
þátttakendum fyrir framlag
þeirra til keppninnar.
Vísnakeppni Safnahúss Skagfirðinga
„Fagurt galar flokkurinn“
UMSJÓN
Páll Friðriksson