Feykir - 09.07.2015, Síða 9

26/2015 9

Heilir og sælir lesendur góðir.
Gaman að byrja þáttinn að þessu sinni með
limrum eftir einhvern mesta snilling á þessum
vettvangi Jóhann Hannesson.
Sértu fríður er gróflega gaman
að gera sig ljótan í framan
með fettum og brettum
og glennum og grettum.
Ég geri það tímunum saman.
Það er eitt sem ég aldrei fæ skilið
ef ég ætla að ganga upp þilið,
losna iljarnar frá
og fæturnir ná
ekki að fylla að gagni upp í bilið.
Sá skrautlegi Sunnlendingur Magnús
Halldórsson kann vel á limruformið, þessi
hefur ef ég fer með rétt mál fangamarkið hans.
Sæmundur brölti í brattanum
búin var tuggan úr skjattanum.
Hann blíndi yfir sviðið
batt aftur hliðið
og bölvaði túnrolluskrattanum.
Einhvern tímann heyrði ég að Gísli Jónsson
menntaskólakennari hafi ort þessa sniðugu
limru.
Alltaf leita til laupanna hrafnar
og ég læt þér í staup, Anna Rafnar.
Sagði Lí Pó frá Kína,
við lagskonu sína
er þau komu til Kaupmannahafnar.
Eftir því sem Helgi Hálfdánarson segir mun
sjálfur Lí Pó hafa ort svo einhverju sinni eftir
góða drykkju.
Ég vakna, því ég heyri fugla fjöld
sem fyllir garðinn söngvum: og ég spyr.
Hvort mundi vera morgun eða kvöld?
Og mangófuglinn kvakar: það er vor.
Duglegur var Helgi að þýða verk hinna ýmsu
snillinga. Súnún Íbn Hamza virkar svo í
meðförum Helga.
Á heimsins unað hef ég glatað trú
en samt er helguð þér mín innsta þrá,
og þegar svefninn lokar minni brá
á milli auga og augnaloks ert þú.
Miklar býsnir hafa þótt hinum ýmsu
mótmælendur að ráðherra sjávarútvegsmála
skyldi leyfa sér að hlynna örlítið að
landsbyggðinni með því að færa starfsemi
Fiskistofu til Akureyrar. Hápunktur í þeirri
orrahríð varð þegar tilkynning barst til
landsmanna um að vandinn væri nú leystur
í þeim deilum og komin lausn í málið. Af því
tilefni orti séra Hjálmar Jónsson svo.
Fært er allt í fyrri skorður
fyrir deilur girt.
Fiskistofa flutt er norður
fólkið verður kyrrt.
Dásamleg fegurð hefur blasað við mörgum
sem hafa verið svo heppnir að vera viðstaddir
þar sem konur hafa fengið þá snjöllu hugmynd
Vísnaþáttur 644 að frelsa geirvörtuna. Held að það hafi verið Ágúst Marínósson sem orti svo.
Alþingi er allt í kvelli
ekki linnir róstunum.
En yndislegt á Austurvelli
er hjá meyjarbrjóstunum.
Einn slíkan hátíðisdag barst sú frétt norður í
Mývatnssveit að kalla hefði þurft á lögreglu
höfuðborgar vegna karlmanns sem mun hafa
háttað sig í Austurstræti. Sá kunni hagyrðingur
þar fyrir norðan Friðrik Steingrímsson mun
hafa spurt tíðindin og ort svo.
Óáreitt með brjóstin ber
brosleit sprangar gellan,
í varðhald körlum vísað er
sem viðra á sér sprellann.
Ólafur Stefánsson mun hafa hlustað eftir
fréttum frá alþingi og ort svo.
Svandís vill ekki virkja
vandi er skammlaust að yrkja.
Vorið svo kalt
verkföll um allt
ráðalaus ríki og kirkja.
Ekki veit ég hver sá Páll mun hafa verið sem
Kári Sólmundarson orti svo laglega um.
Út að reikna rétt hann Pál,
reynist örðugt dæmi.
Ég held engin saklaus sál
saman tölum kæmi.
Þingeyjingurinn og bóndinn Einar Karl
Sigvaldason á Fljótsbakka áttar sig vel á
erfiðum kjörum bænda. Veit reyndar ekki af
hvaða tilefni þessi vísa er ort.
Á þá leggjast örlög grá
eins og hjarn á runna.
Verða nú að flýja frá
flestu sem þeir unna.
Falleg er þessi vísa Einars.
Eins og rakinn árdagsblær
yljar blaki vöngum.
Hefur staka hugum kær
hlýju vakið löngum.
Eins og um getur hér að framan var Helgi
Hálfdánarson snillingur í að þýða ljóð og vísur
margra erlendra skálda. Endum með þessari
djúpu hugsun eftir Piet Hein sem Helgi þýddi
svo vel.
Að leggja af stað í langa ferð
er leiðust raun sem mér er gerð.
En lífið heimtar þetta af þeim
sem þykir gott að koma heim.
Þakka fyrir það efni sem borist hefur og
bið lesendur að senda vísur sem birta má í
þættinum.

Verið þar með sæl að sinni.
/ Guðmundur
Valtýsson
Eiríksstöðum,
541 Blönduósi
Sími 452 7154
( GUÐMUNDUR VALTÝSSON ) kristin@feykir.is
Kári Kárason á Blönduósi
skoraði á mig að koma með
hugvekju í Feyki og eftir
örlitla umhugsun ákvað ég
að grípa „samvinnuboltann“
hans á lofti og halda aðeins
áfram með hann.

Norðurland vestra er
landshluti sem hefur átt undir
högg að sækja á liðnum
árum. Íbúum hefur fækkað,
aldurssamsetning er ekki
eins og best verður á kosið
og skortur er á störfum fyrir
vel menntað fólk sem orðið
hefur til þess að margir leita til
annara byggðarlaga, einkum
á höfuðborgarsvæðið. Ein
orsök þessa er sú hversu langt
ráðamenn síðustu ríkisstjórna
og alþingismenn í bæði
stjórn og stjórnarandstöðu
hafa gengið í niðurskurði á
innviðum svæðisins sem
bitnað hefur stórlega á
samkeppnishæfni þess
gagnvart öðrum landshlutum.
Niðurskurður á fjárveitingum
til margra ríkisstofnana og
-fyrirtækja eða sameining
þeirra hefur aukinheldur oftar
en ekki skilað sér þannig að
yfirmenn þeirra hafa látið
„hagræðinguna“ koma fram
í starfsstöðvunum úti á landi
og því miður oft á Norðurlandi
vestra.
Auðvitað hefur slík
„byggðastefna“ afleiðingar
eins og rakið var hér að
framan. Og þegar heilagir
menn berja sér á brjóst
og tala um mikilvægi þess
að jafna atkvæðarétt þá
held ég að flestir íbúar
landsbyggðarinnar myndu
glaðir skipta á þeirri
jöfnun fyrir raunverulega
byggðastefnu sem miðaði
ekki að sífelldri samþjöppun
þjónustu og tilfærslu
fjármagns af landsbyggðinni
til höfuðborgarinnar heldur
jöfnun á þjónustu til
borgaranna.
Fullyrða má að ef til að
mynda sveitarstjórnarmenn
í sveitarfélögum á svæðinu
hefðu ekki snúið bökum
saman þvert á flokka
gagnvart ýmsum aðgerðum
eða aðgerðaleysi, þá væri
staðan jafnvel enn verri. Og ef
frumkvöðlar, sprotastarfsemi,
ferðaþjónustan, rótgróin
fyrirtæki, menntastofnanir og
fleiri aðilar á svæðinu væru
ekki í samstarfi sín á milli og
leituðu stöðugt tækifæra til að
bæta samkeppnisstöðu sína,
efla sérstöðuna og vinna að
framþróun og nýjungum, þá
væri staðan líklega enn önnur.
Norðurland vestra hefur
nefnilega upp á gríðarlega
margt að bjóða. Bæði
hvað varðar upplifun fyrir
ferðamenn og aðra gesti
sem sækja svæðið heim,
og ekki síður gæði sem eru
eftirsóknarverð þegar kemur
að búsetuvalkostum. Innviði
þessa þarf að styrkja og
styðja við og er það best
gert með samvinnu og
samstöðu heimamanna,
hvort sem um er að ræða
sveitarstjórnarmenn,
atvinnurekendur,
forsvarsmenn stofnana
eða hinn almenna íbúa.
Ríkisvaldið þarf einnig að
koma að málum líkt og það
hefur gert á svæðum þar sem
búsetuþróun er jákvæð eins
og á höfuðborgarsvæðinu,
Akureyri, Mið-Austurlandi
og suðurhluta Vesturlands.
Á það við um atriði eins
og samgöngur, menntun,
heilbrigðisþjónustu,
fjarskipti og stuðning við
atvinnuuppbyggingu.
Er þetta ekki bara díll?

- - - - -
Ég skora á Hönnu Dóru
Björnsdóttur að koma með
næstu „hugvekju“.
Sigfús Ingi Sigfússon í Stóru-Gröf syðri í Skagafirði skrifar
Sameinuð eða sundruð? - II
ÁSKORENDAPENNINN
UMSJÓN kristin@feykir.is