Feykir - 13.08.2015, Blaðsíða 2
2 30/2015
Eftir fjögurra vikna sumarfrí skrölti ég til vinnu á ný. Þótt fríið
hafi vissulega verið ánægjulegt í faðmi fjölskyldunnar – við
komum víða við og ýmsu í verk – þá get ég ekki neitað því að mér
fannst ég heldur svikin hvað
veðurfar varðar hér á Norður-
landi. Þegar þetta er skrifað
er fyrsta haustlægðin í þann
mund að skella á.
Í upphafi sumarfrísins var ég
full bjartsýni – verslaði tvo
brúsa af sólarvörn og dró fram
stuttbuxurnar heldur betur
klár í slaginn. En þegar upp var
staðið man ég ekki eftir að hafa
nokkurn tíma borið á mig né
börnin. Ég gerði eina tilraun til
að fara út í stuttbuxum en var
ekki lengi að smeygja mér í
síðbuxurnar á ný. Það var þó ekki hangið innandyra í iðjuleysi þótt
veðrið væri ekki til að hrópa húrra fyrir, þvert á móti. Land var lagt
undir fót nokkrum sinnum og ferðast í allar áttir; dvalið vestur á
Hólmavík í góðu yfirlæti, Suðurlandið heimsótt og við brugðum
okkur austur fyrir Tröllaskagann. Ég hef ótal sinnum ferðast um
Suðurlandið í gegnum tíðina, eigandi ættir að rekja undir Eyjafjöll,
en minna síðustu ár eftir að ég settist að norðan heiða. Á ferðalagi
okkar í sumar urðum við áþreifanlega vör við gríðarmikla aukningu
ferðamanna í landshlutanum, þá sérstaklega við Gullfoss og
Seljalandsfoss. Þegar við komum að hinum síðarnefnda hafði
skapast mikið umferðaröngþveiti á bílastæðinu og þegar við stigum
útúr bílnum sveimaði þyrla rétt yfir höfði okkar. Þetta var ekki beint
aðlaðandi aðkoma en við fjölskyldan létum það ekki aftra okkur frá
að skemmta okkur konunglega þegar við rennbleyttum okkur við
gönguna umhverfis fossinn. Í sömu ferð var siglt til Vestmannaeyja
þar sem við drukkum í okkur alla þá einstöku og tilkomumiklu
náttúrufegurð sem þær búa yfir. Þá var ekki hægt að yfirgefa eyjarnar
án þess að heimsækja Eldheima þar sem mögnuð saga Vest-
mannaeyjagossins 1973 og raunum eyjaskeggja eru gerð góð skil í
glæsilegu safni.
Það þarf þó ekki alltaf að leita langt yfir skammt til að finna góða
skemmtun og sanna „ferðaupplifun“. Einn af hápunktum sumarsins
hjá okkur hjónunum var nefnilega heimsókn til Siglufjarðar. Eins og
kunnugt er hefur mikil og afar vel heppnuð uppbygging átt sér stað
þar síðustu ár, nú síðast með opnun hótels í sumar sem mikil prýði
er af. Aðalupplifunin fólst þó í heimsókn á Síldarminjasafn Íslands
en safnið er að mínu mati eitt besta safnið sem ég hef farið á,
hérlendis og þótt víðar væri leitað. Þar er hægt að ganga um
tímunum saman og skoða þá margþættu sögu sem fylgdi
síldarævintýri Íslendinga. Safnið er í senn afskaplega áhugavert,
skemmtilegt og fróðlegt – ótrúlega vel lukkað í alla staði.
Loks langar mig að minnast á enn eina snilldina sem ég kynntist í
sumar, þ.e. Grenndarspil nemenda Grunnskólans austan Vatna
-„Hvað veistu um Skagafjörð?“. Spilið reyndist hin besta skemmtun
á köldum sumarkvöldum, fróðlegt og þrælskemmtilegt og ætti að
vera skildueign á hverju skagfirsku heimili.
Berglind Þorsteinsdóttir ritstjóri
Útgefandi: Nýprent ehf., Borgarflöt 1, Sauðárkróki
Póstfang Feykis: Borgarflöt 1, 550 Sauðárkrókur
Ritstjóri & ábyrgðarmaður:
Berglind Þorsteinsdóttir – berglind@feykir.is & 455 7176, 694 9199
Blaðamenn:
Kristín Sigurrós Einarsdóttir – kristin@feykir.is & 867 3164
Óli Arnar Brynjarsson – oli@feykir.is Þóra Kristín Þórarinsdóttir – thora@nyprent.is
Áskriftarverð: 530 kr. hvert tölublað með vsk. Lausasöluverð: 650 kr. með vsk.
Áskrift og dreifing: Nýprent ehf. Sími 455 7171. Umbrot og prentun: Nýprent ehf.
Óháð fréttablað á Norðurlandi vestra - alltaf á fimmtudögum
LEIÐARI
Hvert fór sumarið?
Fögnuður við sundlaugina
Kröfðust
lokunar skot-
svæðisins
Blönduós
Farið hefur verið fram á við
byggðarráð Blönduósbæjar
að skotsvæðinu á Blönduósi
verði tafarlaust lokað.
Veiðifélag Laxár á Ásum og
eigendur Hjaltabakka lögðu
fram þessa kröfu vegna
hávaðamengunar og
mengandi efnum á landinu.
Á fundi byggðaráðs þann
5. ágúst sl. var erindi frá
Óttari Yngvasyni, hrl. lagt
fram þar sem hann gerir
þessa kröfu fyrir hönd
veiðifélagsins og eigenda
Hjaltabakka. Skv fundargerð
kemur fram að byggðaráð
hafni erindinu og var sveitar-
stjóra falið að svara því. /ÞKÞ
Freydís Ósk
Leiðrétting
Í Krakkahorni 28. tölublaðs
Feykis var spjallað við
Freydísi Ósk.
Þar var hún sögð dóttir
Kristjáns Heiðars Kristjáns-
sonar sem mun ekki vera
rétt, hún er dóttir Kristjáns
Steinarssonar. Beðist er
velvirðingar á þessu. /BÞ
Gæðaáfangastaður
Íslands 2015
Skagafjörður
Sveitarfélagið Skagafjörður
hefur verið útnefnt sem
gæðaáfangastaður Íslands
2015 fyrir verkefnið
Matarkistan Skagafjörður.
Þetta ákvað valnefnd EDEN
verkefnisins á Íslandi.
Evrópska EDEN verkefnið
stendur fyrir „European
Destination of Excellence“ en
Ferðamálaskrifstofa er aðili
að verkefninu fyrir Íslands
hönd. Markmið verkefnisins
er að vekja athygli á gæðum,
fjölbreytileika og sameigin-
legum einkennum Evrópskra
áfangastaða og kynna til
sögunnar nýja, lítt þekkta,
áfangastaði vítt og breitt um
Evrópu þar sem áhersla er
lögð á ferðaþjónustu í anda
sjálfbærni.
Af þessu tilefni er haldin
samkeppni um gæða áfangastaði
í Evrópu annað hvert ár með
nýju þema í hvert sinn. Þema
ársins 2015 var matartengd
ferðaþjónusta og sérstök val-
nefnd yfirfór þær umsóknir sem
bárust frá íslenskum áfanga-
stöðum. Nefndina skipaði þau
Guðmundur Jón Guðmundsson,
fulltrúi Beint frá býli, Sigríður
Kristjánsdóttir, fulltrúi Nýsköp-
unarmiðstöðvar, Ragnheiður
Sylvía Kjartansdóttir, fulltrúa
Íslandsstofu og Lára Pétursdóttir,
fulltrúi SAF.
Í niðurstöðu valnefndar
segir: „Matarkistan Skagafjörður
á sér langa sögu og fyrsta sam-
starfsverkefni sinnar tegundar á
sviði matartengdrar ferðaþjón-
ustu hér á landi. Má því segja að
verkefnið hafi rutt veginn og
undirbúið jarðveginn fyrir
önnur slík verkefni víða um land
og sé því sannkallað frum-
kvöðlaverkefni. Afurðir verkefn-
isins hafa verið margar og
fjölbreyttar í gegnum tíðina, en
þar má m.a. nefna árlega
Hrossaveislu, fyrirlestra og
námsefni á vegum Hólaskóla og
matreiðslubókina Eldað undir
bláhimni. Nefndin telur verk-
efnið vel að heiðrinum komið og
vonast til að tilnefningin verði til
að efla enn frekar matartengda
ferðaþjónustu í Skagafirði, sem
og á landinu öllu.“ /ÞKÞ
Skálmöld á
sögudegi
Á Sturlungaslóð
Sögudagar félagsins á
Sturlungaslóð í Skagafirði
verður 15. ágúst. Að þessu
sinni verður gestum boðið
að koma á Örlygsstaði kl.
13 þar sem sagnamaðurinn
Sigurður Hansen mun verða
á staðnum og segja frá
atburðum úr Sturlungu.
Ásbirningablótið verður
í Kakalaskálanum í Kringlu-
mýri og hefst kl. 19. Það
verður með öðru sniði í ár
en venjulega því nú mætir
Einar Kárason rithöfundur
með leikþáttinn Skálmöld
ásamt Júlíu Margréti dóttur
sinni. Samhliða leikþætt-
inum verður boðið upp á
léttar veitingar að hætti
miðaldamanna.
Miðaverð er 5.000 kr og
panta þarf fyrir kl. 17
föstudaginn 14. ágúst á
Hótel Varmahlíð í síma 453
8170 /ÞKÞ
Sigurður Líndal Þóris-
son ráðinn til starfa
Nýr framkvæmdastjóri Selaseturs
Skipt var um framkvæmda-
stjóra Selaseturs Íslands á
Hvammstanga nú á dögunum
en Unnur Valborg
Hilmarsdóttir, fyrrverandi
framkvæmdastjóri, sagði
starfi sínu lausu í byrjun
sumars. Sigurður Líndal
Þórisson tekur við stöðunni
og hefur störf þann 1.
október. Unnur mun gegna
starfi framkvæmdastjóra
þangað til. Þetta kemur fram
á vef Selasetursins.
Sigurður er frá Lækjamóti í
Víðidal, en hefur búið í
Lundúnum í 20 ár. Síðastliðin
fjögur ár hefur hann unnið hjá
Expedia sem er stærsta ferða-
þjónustufyrirtæki heims. Þar
kom hann m.a. að stjórn á
flóknu verkefni sem unnið var á
20 tungumálum, í þremur
heimsálfum, og kostaði rúman
milljarð króna.
Sigurður er með leikarapróf
frá Arts Educational London
School of Drama; M.A. gráðu í
listastefnu og -stjórnun frá
Birkbeck College, University of
London; og kennsluréttindi frá
Strode’s College.
Hann hefur leikstýrt á sjötta
tug leikverka, og kenndi við
suma virtustu leiklistarskóla
Bretlandseyja í meira en áratug,
auk þess að vera aðstoðar-
leikhússtjóri Tabard leikhússins í
Lundúnum í 3 ár.
Sigurður er giftur Gretu
Clough, brúðulistamanni og
leikara frá Vermont-fylki í
Bandaríkjunum. Þau eiga árs-
gamla dóttur, Elínu Rannveigu
Líndal. /ÞKÞ
Sigurður Líndal Þórisson.