Feykir - 17.03.2016, Blaðsíða 7
11/2016 7
síðan reknar suður með brekk-
unum niður í Sauðármýrar. Á
kvöldin komu þær sömu leið
tilbaka og vitjuðu eigenda sinna.
Þegar kýrnar voru flestar voru
þær um og yfir 140 talsins þegar
allt var talið. Margir áttu tvær til
fjórar mjólkandi kýr og fólkið
safnaðist saman að sækja sína
gripi í góðum tíma. Það var mikil
deigla við Árbæinn er mönnum,
hestum og kúm ægði saman er
halla tók degi. Binni og Emma
voru staðarhaldarar þessa marg-
slungna mannlífs. Oft stóð
Emma á tröppunum eins og
forseti Alþingis og lá ekki á liði
sínu í umræðunum sem endaði
oftar en ekki í sólskinsbrosi og
dillandi smitandi hlátri.
Kjölfestufólk í
samfélaginu
á Króknum
Binni og Emma voru dæmigert
sveitafólk sem flutti á Krókinn
fyrri hluta síðustu aldar. Þau
komu sér upp bústofni, voru
með tvær til þrjár mjólkandi kýr
og naut. Tuttugu til þrjátíu ær.
Hænurnar voru í kjallaranum
undir húsinu sem grafinn hafði
verið út af Binna og Sveini syni
hans í kringum 1940. Heyjað var
fram á túnum sunnan og neðan
Sauðárbæjarins. Þá var verið á
engjum í Víkur- og Glæsi-
bæjarlandi og fengnar slægjur í
landi Skarðs. Kartöflugarðurinn
sunnan Árbæjar var gríðarstór.
Sjálfsþurftarbúskapurinn í há-
vegum. Heimilinu séð fyrir
öllum nauðþurftum. Svo var
gengið í alla þá vinnu sem var að
fá, skipavinnu, sláturhús og allt
sem til féll er tengdist Bún-
aðarfélaginu. Lengi sá Binni um
rekstur Sýsluhestshússins og allt
er viðkom því að koma kúnum í
haga. Svona komst fólk af, nánast
aldrei farið af bæ en nægjusemin
allsráðandi en þó lifandi sam-
félag.
Skrásetjari varð heimagangur
í Árbænum hjá Binna og Emmu
tveggja ára gamall fram á
fullorðins ár, ómetanlegur sjóður
lífsreynslu sem safnaðist í á þeim
árum. Binni og Emma voru
kjölfestufólk í samfélaginu á
Króknum. Voru í framvarðasveit
þeirra er vildu jöfnuð og
framfarir fyrir nýjar kynslóðir.
Myndin af ullarþvottinum ber
með sér reynslu genginna
kynslóða sem Binni og Emma
voru svo rík af. Þau hjónin voru
alla tíð í lifandi sambandi við
grænar grundir, slegin tún,
búsmala, allt lifandi og kvikt.
Þetta var þeirra líf í gleði og
sorgum.
Verkefninu Boðið á býli
hleypt af stokkunum
Þrjár ferðaþjónustukonur í Lýdó sameina krafta sína
Þrjár konur, sem starfa við búskap
og ferðaþjónustu í fyrrum
Lýtingsstaðahreppi í Skagafirði, hafa
ákveðið að sameina krafta sína og efla
afþreyingarmöguleika á svæðinu með
því að bjóða ferðamönnum heim á
býli, en verkefnið heitir einmitt
Boðið á býli. Þetta eru þær Eydís
Magnúsdóttir í Sölvanesi, Evelyn Ýr
Kuhne á Lýtingsstöðum og Sigrún
Helga Indriðadóttir á Stórhóli.
Á dögunum opnuðu þær fésbókarsíðu
verkefnisins The Icelandic Farm Animals,
en áhersla verður lögð á að kynna
húsdýrin á þessum þremur bæjum.
Verkefnið fékk í fyrrasumar styrk úr
Uppbyggingarsjóði Norðurlands vestra
og hefur það verið í undirbúningi í vetur.
„Hugmyndin á bak við þetta er að
mynda heild, sameina krafta okkar og
byggja upp meiri afþreyingu, sem nýtist
okkur jafnt sem öðrum í ferðaþjónustu á
svæðinu,“ segja þær stöllur.
Hjá Eydísi í Sölvanesi er boðið upp á
gistingu og heimilisveitingar undir
merkjum Ferðaþjónustu bænda. Einnig
eru gestir velkomnir í fjárhúsin til að fá
fræðslu og spjall um sauðfjárbúskapinn
og landbúnað almennt. Á staðnum eru
líka hross, endur, hænur og fleiri húsdýr.
Evelyn á Lýtingsstöðum býr með
hross og þar hefur um langt skeið verið
ferðaþjónusta, hestaferðir og gisting.
Síðastliðið sumar var byggt þar torfhesthús í
gömlum stíl, sem er partur af sýningunum
Horses & Heritage. Þar býðst gestum að
kynnast íslenska hestinum og sérstakri sögu
hans, ásamt því að skoða torfhesthúsið og
munina sem í því eru. Torfhesthúsið mun
vera það eina sinnar tegundar á landinu.
Ratleikur í sumar
Sigrún Helga býr á Stórhól með sauðfé,
íslenskar landnámsgeitur, hross, íslenskar
landnámshænur, endur og fleiri dýr sem hún
býður gestum að kynnast. Á Stórhól er einnig
opin vinnustofa Rúnalist Gallerí þar sem
unnið er úr hráefnum frá býlinu, svo sem
smálambaskinni, lambsleðri, geitastökum,
ull, hornum og fleiru. Rúnalist Gallerí hefur
að bjóða fjölbreytt handverk, minjagripi,
gjafavöru, lambakjöt, kiðlingakjöt, andaregg
og hænuegg, frá fyrstu hendi „Beint frá býli“.
Þar eru einnig í boði námskeið fyrir litla
hópa, og léttur fróðleikur um íslensku ullina.
„Núna erum við á fullu að vinna að
markaðssetningu, útgáfu á sameiginlegu
kynningarefni, skiltagerð og fleiru. Við erum
líka að hanna ratleik sem prufukeyrður
verður einhvern góðviðrisdag í sumar, það
verður auglýst síðar, svo erum við að
undirbúa fyrir sumarið og hnýta lausa enda
til að geta lokið verkefninu,“ sögðu þær
stöllur að lokum.
VIÐTAL
Kristín Sigurrós Einarsdóttir
Eydís, Sigrún og Evelyn eldhressar með styrkveitingu sem þær hlutu úr Uppbyggingarsjóði SSNV í júní í fyrra.
MYND: LAUFEY SKÚLADÓTTIR