Morgunblaðið - 27.07.2018, Page 4

4 FRÉTTIRInnlent
MORGUNBLAÐIÐ FÖSTUDAGUR 27. JÚLÍ 2018
Reyktur lax
í brunchinn
Söluaðilar:
10-11, Hagkaup, Iceland verslanir,
Kvosin, Melabúðin, Nettó, Samkaup,
Sunnubúðin, Pure Food Hall flug-
stöðinni Keflavík.
Með því að velja
hráefnið af kostgæfni,
nota engin aukaefni og
hafa verkhefðir fyrri tíma
í hávegum, framleiðum við
heilnæmar og bragðgóðar
sjávarafurðir.
Bæjarráð Hveragerðis samþykkti á
fundi sínum í síðustu viku tilboð frá
Landformi ehf. um að gera úttekt á
gróðurhúsunum í bænum. Eins og
sagði frá í Morgunblaðinu á dög-
unum hafa mörg gróðurhúsin sem
voru í miðju bæjarins verið tekin of-
an á undanförnum árum, svo segja
má að byggðin hafi breytt um svip.
Alls voru um 50 þúsund fermetrar
undir gleri í Hveragerði þegar best
lét fyrir 30-40 árum eða svo, en nú
aðeins 10-15 þúsund fermetrar.
Það er Oddur Hermannsson,
landslagsarkitekt hjá Landformi,
sem mun meta varðveislugildi gróð-
urhúsanna, en hann hefur tvívegis
unnið aðalskipulag Hveragerð-
isbæjar og er öllum staðháttum
kunnugur. Þá hefur Pétur Ármanns-
son hjá Minjastofnun boðist til að að-
stoða bæjarfélagið við þetta verk-
efni, en frumkvæðið kemur frá Nirði
Sigurðssyni sem er bæjarfulltrúi
bæjarmálafélagsins Okkar Hvera-
gerði.
Í greinargerð frá Landformi, sem
birt er á vef Hveragerðisbæjar, segir
að úttektin muni taka til allra uppi-
standandi ylræktarhúsa og garð-
yrkjustöðva innan bæjarmarkanna. Í
skráningu fyrir hvert hús og stöð
verði helstu upplýsingar og myndir
settar inn. Varðveislugildið verði
metið út frá menningu, umhverfi og
ástandi bygginganna. Sumar megi
mögulega nýta áfram til garðyrkju
en önnur hafi varðveislugildi, séu
sögulegar minjar og megi fá hlut-
verk samkvæmt því. sbs@mbl.is
Meta á gildi gróðurhúsa
 Varðveisla í Hveragerði  Menning, umhverfi og ástand
Morgunblaðið/Sigurður Bogi
Hveragerði Gróðurhús við Þelamörk; í Blómabænum, sem svo var kallaður.
Magnús Heimir Jónasson
mhj@mbl.is
Í gær var hafist handa við að mála
heila miðlínu á vegarkafla á Þing-
vallavegi í Mosfellsdal. Framúrakst-
ur verður þar með bannaður á þeim
kafla í dalnum þar sem fjöldi afleggj-
ara liggur að veginum. Íbúar hafa
lengi krafist úrbóta á veginum, en að
þeirra sögn er hrað- og framúrakst-
ur tíður á svæðinu. Banaslys varð á
veginum sl. laugardag og ákvað
Vegagerðin í kjölfarið að banna þar
framúrakstur. Að sögn Jónasar
Snæbjörnssonar, starfandi forstjóra
Vegagerðarinnar, hefur verið unnið
að deiliskipulagi ásamt sveitarstjórn
þar sem gert er ráð fyrir tveimur til
þremur hringtorgum á veginum. Í þá
vinnu verður þó líklegast ekki farið
fyrr en á næsta ári.
Íbúar hótuðu lögbroti
Fulltrúar hverfisfélagsins Víghóls
í Mosfellsdal sendu frá sér ályktun í
kjölfar íbúafundar í fyrradag þar
sem ályktað var að ef Vegagerðin
myndi ekki bregðast við myndu íbú-
ar mæta með málingarrúllu og
ganga sjálfir í verkið. Slíkt athæfi er
með öllu ólöglegt, að sögn Guð-
brands Sigurðssonar, aðalvarðstjóra
hjá lögreglunni á höfuðborgarsvæð-
inu. „Það hefði gagnast lítið. Það er
náttúrulega ólöglegt athæfi, það má
enginn gera það [að mála veginn]
nema veghaldari,“ segir Guðbrand-
ur. „Engum hefði borið að fara eftir
því og í rauninni bara skemmdaverk
á vegi. Þetta hefði bara verið krot
sem hefði getað skapað hættu ef
menn kæmust upp með að mála bara
hvað sem þeim sýnist á vegina.“
Hann segist fyrst og fremst hafa litið
á þessa hótun íbúa sem hróp á að-
gerðir.
G. Pétur Matthíasson, upplýsinga-
fulltrúi Vegagerðarinnar, tekur í
sama streng og segir það algjörlega
bannað samkvæmt lögum að mála á
vegi enda sé Vegagerðin veghaldari.
„Mér finnst það einkennilegt að
vera uppi með slíkar hótanir þegar
við vorum búin að tilkynna að við
myndum mála heila línu.“
Búið að mála miðlínu í Mosfellsdal
Morgunblaðið/Árni Sæberg
Vegmerkingar Vegagerðin sendi viðeigandi aðila til að mála miðlínu á vegarkaflanum í Mosfellsdal í gærmorgun.
 Vegagerðin sendi vinnuhóp til að mála heila miðlínu á Þingvallavegi í Mosfellsdal  Íbúar höfðu áður
hótað því að ganga í verkið sjálfir  Slíkt væri ólöglegt með öllu, segir aðalvarðstjóri hjá lögreglunni
Óli Már Aronsson
olimar@rang.is
Séra Sváfnir Sveinbjarnarson bauð til
veislu á 90 ára afmælisdaginn í gær í Hvoln-
um á Hvolsvelli. Margt var um manninn, á
þriðja hundrað gestir komu til að samfagna
honum. Sváfnir setti samkomuna með
stuttu ávarpi og bauð svo tveimur barna-
börnum sínum að stýra samkvæminu. Þau
Sváfnir Gíslason og Anna Elín Kjart-
ansdóttir tóku við veislustjórn og byrjuðu á
að syngja afmælissönginn, allir viðstaddir
risu úr sætum og tóku vel undir. Gísli
Sváfnisson tók síðan til máls og færði föður
sínum nýútkomna ljóðabók frá börnum
Sváfnis, með ljóðum sem Sváfnir hefur
samið gegnum tíðina. Nefnist ljóðabókin
Heimalönd. Þá flutti afmælisbarnið ræðu
sem það kallaði predikun og sló á létta
strengi í lokin. Meðal atriða á samkomunni
var flutningur Öðlinganna á nokkrum lög-
um og meðal annars var frumflutt lag eftir
Gísla Sváfnisson við texta séra Sváfnis.
Séra Sváfnir er einstaklega ern og býr í
eigin íbúð á Hvolsvelli og segist una sér við
lestur, grúsk og skriftir. Hann lét af störf-
um fyrir 20 árum eftir áratuga þjónustu við
kirkjuna og samfélagið.
Afmælisfagnaður héraðshöfðingja
Morgunblaðið/Óli Már Aronsson
Vinafundur Það var glatt yfir afmælisbarninu þegar það tók á móti Samúel Erni Erlingssyni og öðrum gestum.
 Um 300 manns
samfögnuðu
afmælisbarninu
Miklar myglu- og rakaskemmdir
hafa komið í ljós í húsnæði Háskól-
ans á Akureyri og tæma þurfti hluta
af húsnæðinu vegna þess.
Háskólinn neyðist til að leigja
skrifstofuhúsnæði á öðrum stað í
bænum vegna skemmdanna.
Um er að ræða elsta hluta Sól-
borgarhússins svokallaða þar sem
stoðstarfsemi háskólans hafði að-
stöðu.
„Eitt hús var tæmt fyrir jól og svo
var annað tæmt núna í byrjun júní.
Það var raki í veggjum og menn fóru
í það að framkvæma sýnatökur og
rækta úr því. Þá kom í ljós að þetta
var slæmt,“ segir Hólmar Svansson,
framkvæmdastjóri HA, í samtali við
mbl.is.
Til stendur að fara í viðgerðir á
húsnæðinu en umfangið á eftir að
koma í ljós.
Talið er að kostnaður við viðgerð-
irnar gæti numið allt að 200 millj-
ónum króna en fjármagnið er ekki til
reiðu eins og er. thor@mbl.is
Mygla og
raki herja á
háskólann
 Rýma þurfti
byggingu að hluta