Morgunblaðið - Sunnudagur - 06.03.2021, Blaðsíða 4

FRÉTTIR VIKUNNAR
4 MORGUNBLAÐIÐ SUNNUDAGUR 7.3. 2021
Vikan var undirlögð af jarð-skjálftahrinu á Reykjanes-skaga (og víðar raunar), en
sumir skjálftarnir voru allsnarpir.
Þeir urðu fæstir til þess að valda
verulegu tjóni, en þó komu sprungur
í mannvirki í Grindavík.
Grunur um að jarðskjálftarnir kynnu
að reynast undanfari eldvirkni á
svæðinu jukust mjög er á leið vikuna
og um hríð virtust flestir þess fullvissir
að svo færi. Sérfræðingar reyndu þó
að róa mannskapinn og sögðu líklegast
að hraun flæddi yfir miðjan Reykja-
nesskaga og því lítið í húfi.
Meira kann að reynast í húfi ef dreg-
ur úr styrk Golfstraumsins, líkt og
blikur eru á lofti um. Rannsóknir
benda til þess að hann sé nú með
veikara móti, en dragi mikið úr hon-
um kynni það að gerbreyta lífsskil-
yrðum á og við Ísland.
Icelandair og félög starfsfólks í flugi
ýta á það að flugliðar og aðrir starfs-
menn, sem eiga í samskiptum við far-
þega í millilandaflugi, fái forgang í
bólusetningu. Landlæknir og heil-
brigðisráðherra létu sér fátt um finn-
ast.
Veitingastaðir og vínstúkur landsins
höfðu vart undan ásókn um helgina,
sem var sú fyrsta eftir að verulega var
slakað á sóttvarnareglum. Munu sum-
ir jafnvel hafa drukkið meira en tvö
glös og orðrómur var uppi um að stig-
inn hefði verið dans á stöku stað.
Á mánudag þóttu líkur á eldgosi á
Reykjanesskaga hafa aukist mikið
og fram kom tilgáta um kvikuinnskot
þar undir. Sérfræðingarnir virtust
þó ekki verulega áhyggjufullir og
töldu mestar líkur á flæðigosi án
mikilla sprenginga, en vegna fá-
mennis þar á svæðinu ætti það ekki
að valda miklum vanda. Þó var nefnt
að gasmengun úr iðrum jarðar kynni
að verða vesen.
Eldfjallafræði- og náttúruvárhópi
Háskóla Íslands þótti rétt að ljóstra
því upp að „einhvern daginn verður
eldgos“ á Reykjanesskaga. Glöddust
margir yfir að jarðsagan hefði ekki
tekið enda enn.
Tölur Hagstofunnar benda til þess
að kórónukreppan sé mun minni
en óttast var, en mælingar benda til
þess að efnahagssamdrátturinn á
liðnu ári hafi verið 6,6%. Gylfi
Zoëga hagfræðiprófessor vogaði
sér að nefna að það benti til lítillar
framleiðni í ferðaþjónustu þegar
samdrátturinn væri ekki meiri
þrátt fyrir geigvænlegt atvinnuleysi
í greininni.
Biskupsstofa tók upp á því að skrá
hjá sér hverjir kæmu til messu og
ekki einn einasti mannréttinda-
fulltrúi eða persónuverndarmöppu-
dýr rak upp bofs um trúfrelsi. Þar
var ekki um að ræða markaðsátak á
vegum Biskupsstofu, heldur erind-
rekstur fyrir Landlækni, ef rekja
þyrfti smit.
Evrópska hagstofan (Eurostat)
birti tölur um hlutfall fólks með
snjallúr og þar trónuðu Íslendingar
langhæst allra Evrópubúa með
meira en tvöfalt hærra hlutfall en
hjá næsta landi á eftir. Engar vís-
bendingar eru hins vegar um að
snjallúrin geri landsmenn stundvís-
ari en áður.
Áslaug Arna Sigurbjörnsdóttir
dómsmálaráðherra kom fyrir þing-
nefnd til þess að svara spurningum
um símtöl, sem hún átti við Höllu
Bergþóru Björnsdóttur, lög-
reglustjóra á höfuðborgarsvæðinu.
Af orðum þingmanna eftir fundinn
að dæma kom þar fátt nýtt fram.
Foreldrar í Fossvogsskóla hafa enn
áhyggjur af myglu í skólanum en
borgaryfirvöld virtust enn ekki
kippa sér upp við að skylda börn í
heilsuspillandi skóla. Benti Helgi
Grímsson, sviðsstjóri skóla- og
frístundaráðs borgarinnar, á það öld-
ungis áhyggjulaus að nú fyndist þar
ekki mygla heldur myglugró.
Náttúrufræðistofnun bendir á að þau
séu líka skaðleg og valdi veikindum
barna.
Katrín Jakobsdóttir forsætisráð-
herra sagðist ekki útioka samstarf
við neina flokka að loknum alþing-
iskosningum í haust. Spurð um nú-
verandi samstarfsflokka sagði hún
áframhaldandi samstarf vel koma til
greina.
Félagsbústaðir keyptu 127 íbúðir á
liðnu ári og ætla að kaupa ámóta á
þessu ári, flestar í Árbæ, fæðingar-
borg borgarstjóra.
  
Skáldsagan Eldarnir – Ástin og aðr-
ar hamfarir eftir Sigríði Hagalín
Björnsdóttur fór í endurprentun
vegna mikillar eftirspurnar, en þar
greinir m.a. frá miklum jarð-
skjálftum og eldgosum á Reykjanes-
skaga.
Af hinu raunverulega sögusviði var
hið sama að frétta og fyrr, miklir
skjálftar og órói undir niðri. En ekk-
ert gos.
Bólusetningar ganga vel á Íslandi,
svona að því marki, sem þær eiga sér
stað, en enn berst sáralítið af bólu-
efni til landsins. Fregnir bárust af
því að æ fleiri Evrópuríki væru farin
að leita annnara leiða við öflun bólu-
efnis en að reiða sig á Evrópusam-
starf þar um, sem þykir hafa verið
mikið klúður.
Við skoðun á varðskipinu Tý í
slippnum í Reykjavík komu í ljós svo
miklar bilanir og skemmdir, að óvíst
þótti að hann færi aftur á flot í fyrra
hlutverk. Viðgerðir væru svo dýrar
að það svaraði tæplega kostnaði.
Samband íslenskra sveitarfélaga
stakk upp á mýkri leiðum til þess að
stuðla að sameiningu sveitarfélaga
en að skikka þau til þess við and-
stöðu íbúa.
  
Enn voru umbrot við Keili á miðviku-
dag og nýtt orð – óróapúls – komst í
orðaforða landsmanna, sem notuðu
það eins og ekkert væri frá þeirri
stundu. Stjórnvöld biðluðu til borg-
aranna um að vera ekki að fara í
ferðir eða göngur inn á óróasvæðið,
en Íslendingar eru sem kunnugt er
eina þjóðin sem forðar sér ekki held-
ur flykkist á eldfjöll ef þar eru boðuð
gos.
Víðir Reynisson sagði þjóðinni að
slaka á, það væri ekkert hamfaragos
í vændum. Svo hún slakaði á og ekki
kom gos.
Katrín Jakobsdóttir forsætisráð-
herra sagði að íslensk stjórnvöld
könnuðu fleiri leiðir til öflunar bólu-
efnis en Evrópusamstarfið eitt, sem
valdið hefði nokkrum vonbrigðum.
Opnað var fyrir skráningar í sumar-
búðir KFUM og K, en þar reyndist
tvöfalt meiri aðsókn frá fyrsta degi
en nokkru sinni áður. Veitir sjálfsagt
ekki af handleiðslu æðri máttarvalda
þegar það gengur á með plágum,
náttúruhamförum og hnattrænni
hlýnun, sem valdið hefur mildasta
vetri í manna minnum.
Steinn Logi Björnsson, fyrrverandi
framkvæmdastjóri hjá Icelandair,
sagði í viðtali að Boeing MAX-
vélarnar henti ekki flugfélaginu,
jafnvel þegar þær megi loks fljúga á
ný. Hann telur að sofandaháttur
stjórnvalda í bóluefnismálum kunni
að reynast efnahagslífinu afar dýr.
  
Enn einn daginn urðu jarðvísinda-
menn hissa og margir hattar étnir
þegar skjálftavirknin færðist til og
kvikuhlaup virtist dvína. Mönnum til
hugarhægðar minntu þeir á að það
væri nú samt sem áður „kominn tími
á eldgos“.
Öll þessi umbrot vöktu marga til
umhugsunar um varúðarráðstaf-
anir, svo sem með því að koma upp
meira olíuöryggi í landinu og auka
netöryggi. Hins vegar virtist engum
detta í hug að nefna Sundabraut og
afkastameiri umferðarmannvirki.
Píratinn Jón Þór Ólafsson, formað-
ur stjórnskipunar- og eftirlits-
nefndar Alþingis, sætti gagnrýni fyr-
ir trúnaðarbrest, sem fælist í að hann
gæfi annað til kynna um hvað til bæri
á fundum nefndarinnar en forsendur
væru til.
Lyfjastofnun telur ýmsa kosti í stöð-
unni um kaup á bóluefni og nefndi
Rúna Hauksdóttir, forstjóri hennar,
rússneska bóluefnið Spútník
sérstaklega í því samhengi.
Kurr vegna uppnáms í leghálsskim-
unum jókst áfram í vikunni, en heil-
brigðisráðherra lét flytja þær frá
Krabbameinsfélaginu til Landspít-
alans, sem ekki hefur neina burði til
þess að sinna þeim.
Dómsmálaráðherra tilkynnti að
ekki yrði ráðist í dýrar viðgerðir á
varðskipinu Tý heldur skyldi kaupa
nýlegt skip að utan í stað hans. Var
því vel tekið en þó ekki síður þeirri
nýbreytni að fleyið yrði nefnt eftir
ástar- og unaðsgyðjunni Freyju.
Allt á floti alls staðar, tralalalala!
Beðið eftir
gosi
Margir biðu í ofvæni eftir eldgosi á Reykjanesskaga í vikunni en jörð skalf nær viðstöðulaust. Ef myndin prentast vel má
sjá móta fyrir Keili, en örin á skiltinu bendir næstum á hann. Margar slíkar myndir birtust af Keili í fjölmiðlum í vikunni.
Morgunblaðið/Eggert
28.2.-5.3.
Andrés Magnússon
andres@mbl.is
DUXIANA Reykjavik | Ármuli 10 | Reykjavik | +354 5 68 99 50 | www.duxiana.is
GÆÐI OG ÞÆGINDI
SÍÐAN 1926
DUX 6006 - SVÆÐISMEÐFERÐ
Í örfáum einföldum skrefum geturðu sett upp rúmið þitt til að mæta þörfum þínum.