Fréttablaðið - 13.08.2021, Qupperneq 14

Oddur Freyr
Þorsteinsson
oddurfreyr@
frettabladid.is
Útgefandi: Torg ehf Veffang: frettabladid.isÁbyrgðarmaður: Björn Víglundsson Sölumaður auglýsinga: Jón Ívar Vilhelmsson, jonivar@frettabladid.is, s. 550 5654,
Langhlauparinn Hlynur
Andrésson setti Íslandsmet
í maraþoni í vor þegar hann
keppti í maraþonhlaupi í
fyrsta sinn á ferlinum, en
markmið Hlyns var að ná
lágmarkinu fyrir Ólympíu-
leikana. Það tókst ekki í þetta
sinn, en hann reynir aftur
árið 2023.
Vestmannaeyingurinn Hlynur
Andrésson setti Íslandsmet í
maraþonhlaupi í vor, en hann
hefur alls náð tíu Íslandsmetum í
langhlaupum. Honum tókst ekki að
komast á Ólympíuleikana en ætlar
að reyna aftur á þarnæsta ári og í
millitíðinni keppir hann á Evrópu-
meistaramótinu í Þýskalandi á
næsta ári. Hann segir mikilvægt að
geta einbeitt sér að hlaupum til að
ná árangri í íþróttinni.
Hlynur segir að það sé ekkert
leyndarmál að baki velgengni hans,
bara mikil og stöðug erfiðisvinna.
„Og kannski líka einhverjir hæfi-
leikar,“ segir hann og hlær. „En ég
hef lagt hart að mér síðan árið 2012,
svo ég er búinn að leggja mikla
vinnu og tíma í þetta.“
Hlynur setti nýtt Íslandsmet í
maraþonhlaupi í þýsku borginni
Dresden í mars þegar hann kláraði
hlaupið á 2 klukkustundum, 13
mínútum og 37 sekúndum, en hann
lenti í fimmta sæti. Hlynur bætti
gamla Íslandsmetið um rúmlega
þrjár og hálfa mínútu, en náði samt
ekki Ólympíulágmarkinu eins og til
stóð, en það var 2 klukkustundir, 11
mínútur og 30 sekúndur.
Það kom Hlyni ekki
á óvart að ná nýju Íslandsmeti
„Án þess að vilja hljóma hrokafull-
ur, þá bjóst ég við því, vegna þess að
ég hafði hlaupið hálft maraþon á 1
klukkustund og 2 mínútum, sem er
töluvert hraðara en aðrir Íslend-
ingar. Ég ætlaði náttúrlega líka að
ná Ólympíulágmarkinu, sem er
töluvert hærra en Íslandsmetið,“
segir hann. „Þannig að ég bjóst við
því að slá metið, en var ekki viss
hvort lágmarkið myndi nást og ég
var aðeins frá því.“
Svekkjandi að ná ekki lágmarkinu
Hlynur tók þátt í maraþoninu í
Dresden sérstaklega til þess að
komast á Ólympíuleikana í Tókýó
og var að vonum svekktur að það
hefði ekki tekist, enda er hann viss
um að það hefði náðst ef hlutirnir
hefðu farið betur.
„Þetta var smá klúður. Ég ætlaði
fyrst að hlaupa í Bern í Sviss en
vegna slæmra veðuraðstæðna var
því frestað. En í maraþoni ertu með
smá tímabil rétt fyrir hlaup þar
sem þú æfir minna til að fríska þig
upp og til að ég gæti hlaupið eins
hratt og ég get þurfti ég taka þátt í
hlaupi vikuna eftir, í Dresden, en
því miður voru veðuraðstæður ekki
nógu góðar þar,“ segir Hlynur. „Ég er
nokkuð viss um að það hefði gengið
betur ef veðrið hefði verið betra.
Ef þú ert að hlaupa á móti vindi fer
hjartslátturinn upp og þá þarftu að
hægja á þér, eins og gerðist.“
Auðveldara
að komast á ÓL í maraþoni
Hlynur hefur aðallega keppt í 5
og 10 km hlaupi og þetta var hans
fyrsta maraþon á ferlinum. Hann
segir að maraþonhlaup séu nokkuð
ólík öðrum hlaupum.
„Þetta er svolítið öðruvísi. Í mara-
þoni ertu ekki að hlaupa á nógu
miklum hraða til að springa ekki
og þetta snýst um að halda nægri
orku í líkamanum til að endast alla
leiðina,“ segir hann. „Þannig að þú
ert að taka inn kolvetnadrykki á
leiðinni til að eiga næga orku.“
Ástæðan fyrir því að Hlynur
reyndi að ná Ólympíulágmarkinu
í grein sem hann hafði ekki keppt í
áður er einföld.
„Það komast fleiri að í maraþoni
en á brautinni. Það eru bara sirka
30 manns sem komast í 5 og 10 km
hlaupin en hingað til hafa um 150
komist að í maraþoninu, en í ár
var það reyndar skorið niður í 80,
því Ólympíuleikarnir eiga bara að
vera fyrir þá bestu af þeim bestu,“
segir Hlynur. „Tíminn minn hefði
því verið nógu góður fyrir alla
Ólympíuleika til þessa.“
Þrjú markmið eftir
Hlynur ætlar nú að reyna við lág-
markið fyrir næstu leika eftir eitt
og hálft ár.
„Það er markmiðið. Það eru
miklu meiri líkur á að ég nái þessu
núna því ég hef fleiri sénsa, en
fyrir leikana í ár hafði ég bara eitt
tækifæri,“ segir Hlynur, sem stefnir
ekki á að keppa í maraþoni fyrr
en á þarnæsta ári. „Á næsta ári er
Evrópumeistaramótið í frjálsum
íþróttum í München og ég ætla að
keppa í 5 og 10 km hlaupi. Svo árið
2023 reyni ég aftur við maraþonið
til að koma mér á leikana í París.“
Hlynur segist hafa þrjú mark-
mið sem hann langar enn að ná á
hlaupaferlinum.
„Mig langar að hlaupa 10 km á
undir 28 mínútum, hlaupa mara-
þon á undir 2 klukkustundum og
10 mínútum og keppa á Ólympíu-
leikunum. Og mig langar ekki bara
til að mæta á Ólympíuleikana til
að vera með, ég vil vera í topp 15
eða 20,“ segir hann.
Flytur aftur heim
Hlynur býr í hollensku borginni
Leiden og var að vinna þar en hefur
minnkað við sig til að geta einbeitt
sér að hlaupum.
„Í sumar hef ég bara verið að
æfa og keppa. Það er svo mikil fag-
mennska í þessari íþrótt að það er
ekki hægt að ná árangri ef þú ert
ekki íþróttamaður í fullu starfi,“
segir hann. „Þegar ég var að undir-
búa mig fyrir maraþonið var ég til
dæmis að vinna 30-40 tíma í viku,
sem var of mikið. En núna get ég
einbeitt mér 100%.“
Næsta skref hjá Hlyni er svo að
flytja heim til Íslands.
„Ég átti kærustu hér úti en við
erum hætt saman og mig langar
að fara til Íslands til að vera með
fjölskyldunni, ég held að ég verði
ánægðari þar,“ segir hann. „Ég er
búinn að búa úti í 10 ár síðan ég var
17 ára, fyrst í Bandaríkjunum og
svo í Hollandi, og núna langar mig
bara að fara heim.“ n
Íslandsmetið í maraþoni var það tíunda
Hlynur Andrésson er einn fremsti
hlaupari Íslands og hefur sett tíu
Íslandsmet í langhlaupum.
Hlynur var
svekktur yfir því
að tryggja sér
ekki þátttöku-
rétt á Ólympíu-
leikunum þegar
hann tók þátt
í maraþoninu
í Dresden í vor
en hann náði
samt frábærum
árangri í sínu
fyrsta maraþon-
hlaupi.
MYND/AÐSEND
2 kynningarblað 13. ágúst 2021 FÖSTUDAGURMAR AÞON