Andvari - 01.01.2008, Qupperneq 19

ANDVARI
BJARNI BJARNASON
17
Vorið 1903 fermdist Bjarni Bjarnason á Ólafsvöllum á Skeiðum, en
þangað áttu Skálmholtsbæir kirkjusókn. Veturinn áður dvaldist hann
á Kiðjabergi í Grímsnesi, orðlögðu menningarheimili, og lærði þar að
eigin sögn undir fermingu.6 Séra Brynjólfur Jónsson á Ólafsvöllum
hefur gefið Bjarna svofelldan vitnisburð og skráð í prestsþjónustubók
Ólafsvallakirkju:
Les ágætlega
Kann ágætlega -
Skrifar dável -
Reiknar ágætlega
Hegðun ágætlega.
Þóroddur Sigurðsson lést á Skálmholtshrauni 24. janúar 1904. Vigdís
bjó þar áfram til 1905. Guðríður dóttir hennar giftist það ár Guðmundi
Jónssyni, þá bónda á Ólafsvöllum. Vigdís fluttist þangað með henni
ásamt sonum sínum og ári seinna, 1906, eru þau skráð i prestsþjón-
ustubók Arnarbæliskirkju í Ölfusi sem innkomin frá Ólafsvöllum að
Auðsholti í Arnarbælissókn, ásamt hjónunum Guðríði og Guðmundi.
Bjarni er þar talinn vinnumaður, 17 ára. Guðríður lést 1909, aðeins 23
ára. Vigdís virðist þá hafa tekið við búsforráðum með Guðmundi. Við
manntal 1910 er hún talin ráðskona hans þar. Þar er einnig Bergsteinn
sonur hennar, skráður vinnumaður, en ekki önnur börn hennar.
III. Skólaganga
Það varð hlutskipti Bjarna á unglingsárum hans að vinna búi móður
sinnar þegar hún varð ekkja í annað sinn og vera stoð hennar og
stytta sem eldri sonur. Landbúnaðarstörf létu honum vel enda var
hann alla ævi hneigður fyrir búskap. Jafnframt lagði hann kapp á að
afla sér menntunar. Veturna 1907-1908 og 1908-1909 var hann ásamt
Bergsteini bróður sínum nemandi í Flensborgarskóla en aðeins fram
að vetrarvertíð hvorn vetur og lauk því ekki prófum. Að sögn Bjarna
sjálfs leyfði efnahagur ekki að hann sæti á skólabekk til prófs þessi ár.
Hann reri þessar tvær vertíðir í Þorlákshöfn hjá alkunnum aflamanni,
Jóni Jónssyni á Hlíðarenda, og taldi þær hafa verið sér gildismikinn
skóla