Uppeldi og menntun - 01.01.2012, Blaðsíða 150
Uppeldi og menntUn/icelandic JoUrnal of edUcation 21(1) 2012150
sKÍrsKOtun til annarra frÆðigrEina
Greinasafnið Iðja, heilsa og velferð: Iðjuþjálfun í íslensku samfélagi gefur áhugaverða inn-
sýn í þróun iðjuþjálfunar og iðjufræða. Sú staðreynd að iðjuþjálfar hér á landi hafa allt
fram á þennan dag mest sótt menntun sína til útlanda hefur valdið því að iðjuþjálfa
hefur stundum skort orðfæri til að tjá sig á íslensku og samþætta fræðin íslenskum
veruleika. Eitt af því sem styrkti framgang iðjuþjálfunar og sjálfsmynd iðjuþjálfa
var því útkoma bókarinnar Íðorð í iðjuþjálfun árið 1996 (Iðjuþjálfafélag Íslands, 1996).
Greinasafnið endurspeglar að hluta þá nýorðasmíð sem þar er kynnt.
Bókin stenst fullar fræðilegar kröfur og lesandinn hnýtur um fáa málfarslega agnúa.
Hverri grein fylgir áhugaverður textarammi, oftast til að færa fræðilegu skrifin nær
vettvangi, og tekst það vel. Eitt það áhugaverðasta við bókina er að hún miðlar ekki
einungis auknum skilningi á starfi iðjuþjálfa, heldur vekur hún einnig athygli á hug-
myndafræðilegri þróun og jafnvel átökum sem fræðin hafa þurft að glíma við. Bók-
inni tekst þannig bæði að miðla vel til lesandans því sem fagið iðjuþjálfun stendur
fyrir, en einnig þeim hugmyndafræðilegu öldum sem fræðin hafa þurft að stíga. Þar
má nefna togstreitu á milli hug- og félagsvísinda annars vegar og heilbrigðisvísinda
hins vegar. Eða á milli „smættunarhyggju líflæknisfræðinnar og heildarhyggju frum-
kvöðlanna“ (bls. 38). Einnig er fjallað á áhugaverðan hátt um samspil sálar og líkama,
tengslin á milli fræða og starfs eða kenninga og hversdags. Því er bókin verðugt fram-
lag til fræðilegrar umræðu, ekki einungis fyrir iðjuþjálfa, heldur á hún erindi við mun
breiðari hóp.
HEiMilD
Iðjuþjálfafélag Íslands. (1996). Íðorð í iðjuþjálfun: Hugtök og skýringar. Reykjavík: Höf-
undur.
uM HÖfunDinn
Guðbjörg Linda Rafnsdóttir (glr@hi.is) er prófessor í félagsfræði við Félags- og mann-
vísindadeild Háskóla Íslands. Hún útskrifaðist með doktorspróf í félagsfræði frá
Lundarháskóla í Svíþjóð árið 1995. Um árabil vann hún á rannsókna- og heilbrigðis-
deild Vinnueftirlitsins. Meginrannsóknasvið Guðbjargar Lindu er félagsfræði
atvinnulífs, vinnutengd heilsa og kynjafélagsfræði.
Um hUgmyndafræðileg álitaefni og tengsl fræða og starfs