Skólavarðan - 01.08.2003, Qupperneq 17

FRÉTTIR OG SMÁEFNI
Vika símenntunar
haldin í fjórða sinn
Vika símenntunar verður haldin
dagana 7. - 13. september
næstkomandi. Vikan er á vegum
menntamálaráðuneytisins og er nú
haldin í fjórða sinn hér á landi og
sér Mennt um skipulagningu og
framkvæmd hennar í samvinnu við
símenntunarmiðstöðvar um land
allt. Þema Viku símenntunar að
þessu sinni er „Fjarnám og aðrar
óhefðbundnar leiðir til náms.“
Ýmsir viðburðir tengdir þema
átaksins verða í gangi alla Vikuna
auk þess sem henni er ætlað að
vekja athygli fólks á mikilvægi þess
að afla sér þekkingar allt lífið.
Fjölbreytt dagskrá
Dagskrá Viku símenntunar verður
fjölbreytt. Nefna má sérstakan
símenntunardag í fyrirtækjum, málþing
og afhendingu starfsmenntaverðlauna
auk útgáfu sérblaðs um símenntun.
Þriðjudaginn 9. september verður
málþingið haldið, á Hótel Loftleiðum
kl. 9 - 12, undir yfirskriftinni
„Fjarnám”.
Aðalfyrirlesari verður Gilly Salmon
sem kennir við Open University í
Bretlandi. Gilly hefur víðtæka reynslu
af kennslu í fjarnámi og sendi árið
2002 frá sér bókina E-tivitis - the key
to active online learning.
Mikilvægur þáttur átaksins er
símenntunardagur í fyrirtækjum þar
sem fyrirtæki eru hvött til þess að
tileinka 11. september fræðslumálum
starfsmanna. Þann dag er gert ráð
fyrir að fyrirtæki nýti til að kynna
starfsmönnum sínum möguleika á
símenntun. Starfsmenntaverðlaunin
2003 verða afhent föstudaginn 12.
september en þau eru veitt þeim sem
eru að vinna framúrskarandi starf í
starfsmenntun.
Á vefsíðu Viku símenntunar,
www.mennt.net/simenntun má finna
upplýsingar um átakið og ýmsan
fróðleik tengdan símenntun.
Afmælisveisla í
Listhúsinu
Haukur Már Haraldsson er mörgum
í kennarastétt að góðu kunnur enda
hefur hann verið óþreytandi við að
leggja hönd á plóginn hvar sem þurft
hefur með og aldrei skorast undan hafi
verið til hans leitað. Haukur Már situr
í stjórn Félags framhaldsskólakennara
og þann 20. maí sl. hélt hann upp
á sextugsafmælið að viðstöddum
miklum fjölda gesta sem kom
og samfagnaði með vini sínum í
Listhúsinu í Laugardal. Heill þér
sextugum, Haukur Már!
60 ára
17