Morgunblaðið - 22.10.2003, Blaðsíða 6
6 B MIÐVIKUDAGUR 22. OKTÓBER 2003 MORGUNBLAÐIÐ
bílar
ERNA Gísladóttir tók við starfi forstjóra B&L í
ágúst sl. og segir það skipta litlu máli að vera
kona í sannkölluðu karlaveldi bílageirans. Enda
þekki hún lítið annað þar sem hún hefur starfað
við fyrirtækið frá barnsaldri og unnið í öllum
deildum, nema verkstæðinu. Síðasti áratug-
urinn hefur verið viðburðaríkur hjá fyrirtækinu,
nýjar tegundir bíla hafa bæst við og fyrir fjórum
árum flutti B&L í nýtt glæsilegt húsnæði á
Grjóthálsi 1. Að sögn Ernu hafa því árin eftir að
hún lauk hagfræðinámi frá HÍ árið 1991 verið
viðburðarík og skemmtileg.
„Stuttu eftir að ég kom úr námi fórum við í
samningaviðræður við Hyundai og var það eitt
mitt fyrsta verkefni að koma því verkefni á
koppinn. Síðan höfum við verið að breikka línuna
og breytast heilmikið á þessum tíma og ég hef
tekið þátt í þeirri þróun. Þá fluttum við hingað á
Grjóthálsinn árið 1999. Ég hef einnig verið í
stjórn Bílgreinasambandsins lengi og er for-
maður þess núna, og að auki er ég í MBA-
framhaldsnámi við háskóla í Barcelona, þannig
að það er nóg að gera,“ segir Erna.
Að sögn Ernu hefur fyrirtækið á þessum tíma
farið í gegnum ótal sveiflur, eins og önnur fyr-
irtæki í þessari grein, og nú sé að hefjast upp-
sveifla á ný eftir krappa en snögga lægð á mark-
aðnum. „Þessar sveiflur virðast alltaf koma
þótt maður voni í hvert skipti sem uppsveifla
verður að það komi ekki dýfa. Nú fer vonandi að
komast meira jafnvægi á þetta og þar gæti
rekstrarleiga og einkaleiga bíla skipt miklu máli
og komið meira jafnvægi á bílamarkaðinn.“
Erna tók við starfi forstjóra í ágúst, en hvern-
ig finnst henni að vera kona í þessu karlaveldi?
„Bílageirinn er mikið karlaveldi, mjög mikið.
Samt hefur það aldrei skipt mig neinu máli. Það
var kannski fyrst þegar ég kom á fundi, þá var
horft á mig með spurn í augum; hvað er hún að
gera þessi? En nú er ég búin að vera það lengi í
geiranum og hef orðið það mikla reynslu að
menn heyra strax að ég veit hvað ég er að tala
um. Á Íslandi erum við nánast engar í þessari
stöðu en erlendis fer þeim sífjölgandi. Þetta
kemur hægt og rólega.“
Mikil samkeppni í þessari grein
Að sögn Ernu er bílaumhverfið mjög
skemmtilegt, auk þess sem B&L hefur að
mestu leyti verið fjölskyldufyrirtæki í gegnum
tíðina. „Þá er búið að vera ákaflega gaman að
takast á við ný verkefni. Ef ég hugsa það út frá
mér þá var það fyrst að kynna Huyndai-bílinn,
síðan tókum við yfir BMW og Renault og ári síð-
ar Landrover. Þegar þetta var allt komið í höfn
fórum við að byggja hús, þannig að það hafa
stöðugt verið ný verkefni að takast á við. Maður
þarf alltaf að vera vakandi því það er mjög mikil
samkeppni í þessari grein og gaman að taka
þátt í þeim slag,“ segir Erna.
Hún segist telja framtíð B&L blómlega, enda
margar nýjungar á leiðinni og stöðug þróun hjá
framleiðendum. „Við erum að fá inn mjög mikið
af nýjum módelum. Þróunin hjá framleiðend-
unum er mjög ör og það eru skemmtilegir tímar
framundan þar sem við verðum að kynna nýjar
vörur meira og minna stöðugt. Þegar við bjóð-
um fjögur merki er auðvelt að finna einhverjar
breytingar hjá hverjum og einum.“
Um síðustu helgi kynnti B&L nýja Megane-
línu frá Renault og segir Erna að B&L muni
bjóða viðskiptavinum heila Megane-línu á
næsta ári, en það hefur ekki verið gert fram að
þessu. Þá segir hún að BMW sé sífellt að kynna
nýjungar, eins og þekkt er í bílageiranum, og
megi þar m.a. nefna að B&L muni brátt fá inn
nýja X3-jeppann. Jafnframt verður fljótlega
boðið upp á nýjan jeppa frá Huyndai, sem er
minni en Santa Fe, og þá verður brátt kynntur
nýr Freelander frá Landrover. „Það er mikill upp-
gangur hjá þessum framleiðendum og þegar
markaðurinn er á uppleið er miklu auðveldara að
breikka línuna. Við horfum auðvitað til þess
líka,“ segir Erna.
Ladan á eftir að koma aftur
Að mati Ernu er markaðurinn fyrir notaða
bíla í góðu jafnvægi í dag eftir að umboðin nán-
ast sprengdu utan af sér birgðahald notaðra bíla
fyrir nokkrum misserum. Hún segist ekki búast
við slíkum aðstæðum aftur þegar markaðurinn
er að taka við sér á ný.
„Ég held að við komum vel undir það búin,
enda hafa menn lært svolítið af reynslunni og
það er ekkert endilega skynsamlegt að selja of
marga nýja bíla og sitja uppi með ótal óselda
notaða bíla. Þannig að markaðurinn fyrir notaða
bíla stendur vel í dag og það eru ekki lengur
þessar frægu stórútsölur aðra hverja viku hjá
umboðunum til skiptis, eins og var á tímabili.“
Í dag selur B&L hágæða og tæknilega séð
mjög þróaða bíla, en á árum áður var hinn rúss-
neski, einfaldi og ódýri Ladabíll helsta söluvara
fyrirtækisins. Lada er ekki lengur á söluskrá
B&L en Erna segir þó framleiðslu Lada vera enn
í gangi og fyrirtækið sé enn í sambandi við
framleiðendurna.
„Tækninýjungar og kröfur varðandi meng-
unarstaðla og annað þess háttar hafi gert fram-
leiðendum Lada erfitt fyrir. Þá er heimamark-
aðurinn orðinn mun erfiðari eftir að opnað var
fyrir innflutning eftir að Sovétríkin liðu undir lok.
En þeir koma, ég er alveg viss um það, þarna er
t.d. heill bær sem gengur út á bílaframleiðslu
með þeirri kunnáttu og öðru sem því tilheyrir.
Það mun einhver nýta sér það þegar fram líða
stundir, líkt og gerst hefur í Tékklandi á síðustu
árum.“
Erna Gísladóttir er fyrsta og ennþá eina konan í forstjórastól bifreiðaumboða á Íslandi
Viðburðaríkt og skemmtilegt starf
Morgunblaðið/Ásdís
Erna Gísladóttir settist í stól forstjóra B&L í sumar.