Fálkinn - 14.12.1960, Blaðsíða 21

„ERU NOKKUR JÖL
Á fSLANDI?”
Erlendir skemmtikraftar eru orðnir tíðir gestir hér
á landi jafnt sumar sem vetur, og fyrir nokkru komu
hingað tvær brezkar dans- og söngmeyjar, til þess að
skemmta í Lidó.
Skömmu eftir að þær komu, heimsóttum við þær, þar
sem þær gista í einkahúsi við Sörlaskjól. Það var tals-
vert frost og hvasst þennan dag og hið fyrsta sem þær
minntust á var að sjálfsögðu, hversu hræðilega kalt þetta
land væri og hvort það væri alltaf svona. Þær sögðu
okkur, að hlýtt hefði verið í London, er þær fóru þaðan,
— dálítill rigningarsuddi.
Við spjölluðum fyrst við Chiquitu Lopez:
— Ég er brezk að þjóðerni. Faðir minn var brezkur,
en móðir mín indversk. Ég hef búið allt mitt líf í Eng-
landi, en ferðazt um alla Evrópu. Ég skemmti til dæmis
lengi í París við góðar undirtektir.
— Hafið þér leikið í kvikmyndum?
— Já, ég hef leikið í nokkrum kvikmyndum hjá
MGM-félaginu og Pathé. Nýjasta myndin, sem ég hef
leikið í, heitir „Too Hot To Handle“. Síðustu átta mán-
uðina hef ég skemmt í öllum þekktustu næturklúbbum
í London.
— Hvernig líkar yður að skemmta í Lidó?
— Ágætlega. Staðurinn er stærri en við eigum að
venjast, en mjög smekklegur og skemmtilegur, og fólkið
ánægjulegt, það sem við höfum kynnzt því.
Brenda Rowe er brezk í húð og hár, fædd í Yorkshire
og uppalin þar. Hún segist hafa byrjað að skemmta, þeg-
ar hún var aðeins tveggja ára gömul, og bætir við:
— En blessaðir spyrjið mig ekki, hvað ég er gömul nú!
Hún hefur skemmt mjög víða í Evrópu; og þar að
auki í Kanada og tvö ár dvaldist hún í Ástralíu. Auk
þess hefur hún leikið í kvikmyndum og komið fram í
sjónvarpi.
Brenda spurði okkur, hvort ekki væru haldin hátíðleg
jól hér á íslandi. Hún kvaðst hafa ekið um miðbæinn
og ekki séð eitt einasta jólatré.
— Það eru tvær vikur, síðan London skrýddist sín-
um jólabúningi.
Við vorum fljótir að svara, að jólin væru haldin hátíð-
leg í fleiri daga hér á landi en víðast hvar annars staðar.
— Kannski við verðum þá hér um jólin, sagði Brenda
og brosti sínu blíðasta brosi.
★
Efrr andlitsmyndin og myndin hér að neðan eru
af Brenda Rowe, en til hliðar sést Chiquita Lopez.