Morgunblaðið - 29.10.2009, Side 8
Eftir Bjarna Ólafsson
bjarni@mbl.is
J
óhannes Ingi Kolbeinsson er alinn upp í Lúx-
emborg, þar sem faðir hans var flugstjóri hjá
Cargolux flugfélaginu. „Ég kom heim til að
fara í menntaskóla, en fór svo utan til frekara
náms. Í California State University lauk ég BS
prófi í rekstrarfræði og stefnumótun og í kjölfarið tók
við MBA nám í Heidelberg og London.“
Jóhannes vann nokkur ár í Lúxemborg eftir útskrift,
en kom heim þegar honum bauðst starf sem ráðgjafi hjá
PricewaterhouseCoopers árið 1998. „Það er svo árið
2002 sem við félagarnir stofnum Kortaþjónustuna.“
Segir hann að þeir hafi verið að skoða kortamarkaðinn
þegar ákveðið var í Evrópusambandinu að fella skyldi
niður öll landamæri í þessari starfsemi og leyfa viðskipti
með kortauppgjör milli landa á EES-svæðinu. „Við
stofnuðum til samstarfs við PBS í Danmörku, sem er
þjónustuaðili Visa og Mastercard í Danmörku. Sam-
kvæmt því gerum við samninga við íslensk fyrirtæki og
sendum svo uppgjörin út til PBS, sem afgreiðir þau.“ Að
sögn Jóhannesar var þetta í rauninni eina leiðin til að
stofna til samkeppni á Íslandi. „Alltaf þegar við reyndum
að komast inn í íslenska kerfið voru allar hurðir læstar.
Við vorum því tilneydd til að byggja þetta upp í sam-
starfi við erlendu kortafyrirtækin.“
Bjuggu sig undir langhlaup
Með tilkomu Kortaþjónustunnar segir Jóhannes að ís-
lenski markaðurinn hafi gjörbreyst. „Þetta hafði verið
lítill, lokaður markaður án nokkurrar samkeppni. Þetta
séríslenska einokunarkerfi breyttist árið 2002. Má sem
dæmi nefna að söluaðilar, sem taka við kortagreiðsl-
unum, fá þá í fyrsta sinn möguleika á því að fá kortaupp-
gjörið greitt daglega.“ Áður var uppgjörið almennt
greitt mánaðarlega, en gegn aukagjaldi í banka gátu
söluaðilar fengið gert upp daglega. „Heildarkostnaður
við slíka þjónustu var á þeim tíma 6 prósent af heildar-
upphæð uppgjörsins, en hjá okkur greiðir fólk í mesta
lagi aðeins 2,6 prósent fyrir daglegt uppgjör.“
Segir hann að fyrstu árin hafi fyrirtækinu vart verið
hugað líf og að baráttan hafi verið hörð, þótt fyrirtækið
hafi aldrei verið rekið með tapi. „Við gerðum okkur strax
í upphafi grein fyrir því að þetta yrði langhlaup og
byggðum fyrirtækið upp með það í huga. Eftir að sam-
keppnisaðilarnir játuðu á sig langvarandi og umfangs-
mikil samkeppnislagabrot árið 2008 varð alger kúvend-
ing á markaðnum. Við náðum miklum vexti á tiltölulega
stuttum tíma eftir að þeir hættu alls kyns bolabrögðum
og hindrunum.“
Þá segir hann það hafa verið afar gott að þegar krepp-
an skall á hafi Kortaþjónustan verið skuldlaus og staða
fyrirtækisins því mun betri en margra annarra. „Við höf-
um alltaf haft hagkvæmni í huga og hefur rekstrarkostn-
aður okkar verið mun minni en samkeppnisaðilanna.“ Er
Kortaþjónustan nú með um 10% hlutdeild í kortaveltu og
er að þjónusta um 15-20% fyrirtækja í landinu. „Á þess-
um tölum sést að okkar viðskiptavinir eru helst smærri
og meðalstór fyrirtæki.“
Jóhannes er hestamaður og á fjölskylda hans nokkra
hesta í Mosfellsbænum. „Við höfum verið í þessu í um
það bil sjö ár, en ættingjar okkar drógu okkur í íþróttina.
Þá er yngsti sonur minn að gera sitt besta til að draga
mig í mótorkross. Ég er ekki ennþá kominn með hjól, en
það er á dagskrá.“
Eiginkona Jóhannesar er Andrea Kristín Jónsdóttir
og eiga þau þrjú börn.
Jóhannes Ingi
Kolbeinsson er
framkvæmdastjóri og einn af stofn-
endum Kortaþjónustunnar sem sótt
hefur í sig veðrið að undanförnu.
Morgunblaðið/Ómar
Hestamaður Jóhannes Ingi Kolbeinsson er á kafi í hest-
unum í frítíma sínum ásamt fjölskyldunni.
Gott að reka skuldlaust
fyrirtæki í kreppunni
SVIPMYND»
HEIMSMARKAÐSVERÐ á mjólk
og mjólkurafurðum hefur lækkað
svo hratt undanfarið að bandarískir
mjólkurbændur eru farnir að slátra
stórum hluta kúahjarða sinna til að
draga úr framleiðslu og eftirspurn.
Samtök mjólkurbænda þar í
landi hjálpa bændum við að slátra
kúm sínum í stað þess að selja þær,
en samtökin eru mjög áfram um að
draga úr mjólkurframleiðslu.
Á árunum 2002-2006 greiddu
samtökin fyrir slátrun um 275.000
kúa, en á þessi ári einu hefur um
225.000 kúm verið slátrað á vegum
samtakanna.
Alls er gert ráð fyrir því að
bandarískir mjólkurbændur slátri
nú um 55.000 gripum í hverri viku,
sem þýðir að haldi svo fram sem
horfir muni um þremur milljónum
gripa verða slátrað á árinu.
Kreppan drepur kýrnar
Reuters
MÁLGAGN kínverska kommúnistaflokksins hef-
ur sakað leitarvélarisann Google um ritskoðun. Er
sagt að Google hafi komið í veg fyrir að fólk fyndi
vefsíðu blaðsins, eftir að fjallað var um höfund-
arréttardeilu á síðunni.
Fréttin, sem um ræðir, snýst um gagnrýni hóps
kínverskra höfundarrétthafa á áform Google um að
koma upp bókasafni á netinu. Í þrjá daga eftir að
fréttin birtist varaði Google-leitarvélin netnotendur við því að á vefsíðu
blaðsins gætu leynst tölvuveirur.
Dagblaðið segir að þetta hafi hugsanlega tengst umfjöllun blaðsins um
höfundarréttardeiluna og hefur einn ónefndur stjórnandi hjá blaðinu sagt
að illur vilji Google hafi ráðið för. Google segir hins vegar að sjálfvirkt for-
rit ákveði við hvaða síðum eigi að vara vegna hugsanlegrar öryggishættu
og að engin manneskja komi þar nærri.
Eins og alþekkt er hafa fáar ríkisstjórnir teygt sig lengra en sú kín-
verska í tilraunum sínum til að hafa stjórn á netnotkun þegna sinna.
bjarni@mbl.is
Grjótkast úr kínversku glerhúsi
NÚ er McDonald’s á leið úr land-
inu eftir sextán ára dvöl. Hafa sumar
spírurnar líkt brottför hamborg-
aravörumerkisins við fall Saddams
Husseins í Írak og aðrar hafa fagnað
þessu framfaraspori í átt að auknu
frelsi einstaklingsins. Það er allt gott
og blessað, en hagfræðingar, hér
heima og erlendis, gráta hins vegar
örugglega í kaffibolla sína og syrgja
Big Mac-hamborgarann.
Borgarinn sá hefur lengi verið not-
aður til að bera saman kaupmátt í
mismunandi löndum. Er þá reiknað
hve lengi venjulegur einstaklingur er
að vinna sér inn fyrir einum Big Mac.
Rætt hefur verið um að í stað að-
keyptra hráefna hefði McDonald’s á
Íslandi getað boðið upp á íslenska
framleiðslu og hafa sviðakjammar
verið nefndir í því sambandi. Hug-
myndin er ágæt sem slík, en óneit-
anlega væri erfitt að finna McKjömm-
unum stað í hinu flókna líkani sem
að baki Big Mac-vísitölunni liggur.
Þeir sem haldnir eru matvæla-
öryggisblæti geta einnig fagnað
brottför borgarans, enda mun nýr
hamborgarastaður auka eftirspurn
eftir íslenskri framleiðslu.
Hver verða örlög Big Mac-vísitöl-
unnar að borgaranum horfnum?
ÚTHERJI
• Hagstæðar afborganir
• Söluaðilar geta valið um lán með breytilegum vöxtum eða vaxtalaus
• Söluaðilar greiða ekkert þjónustagjald af Kortalánum
• VALITOR greiðir út til söluaðila annan virkan dag eftir að sala fer fram
FYRIRTÆKJALAUSNIR VALITOR • Laugavegi 77 • 101 Reykjavík • fyrirt@valitor.is • www.valitor.is