Bændablaðið - 28.09.2004, Qupperneq 17

Þriðjudagur 28. september 2004 17
Sauðfjársetur á Ströndum
stendur að sögusýningunni
Sauðfé í sögu þjóðar sem er opin
alla daga frá 1. júní til 31. ágúst.
Sýningin er til húsa í
félagsheimilinu Sævangi við
Steingrímsfjörð á Ströndum, tólf
kílómetrum sunnan við Hólma-
vík. Í Sævangi er einnig kaffi-
stofa og handverksbúð sem opn-
ar eru á sama tíma. Sýningin,
sem er ætluð öllum aldurs-
hópum, fjallar á lifandi og
skemmtilegan hátt um allar hlið-
ar sauðkindarinnar og sauðfjár-
búskapar á Íslandi, með sér-
staka áherslu á Strandir.
Viðfangsefni sýningarinnar eru
fjölmörg en á henni er t.d. fjallað
ítarlega um sauðburð, heyskap,
þjóðtrú tengdri sauðfé, sauð-
fjárrækt, göngur og réttir,
sjúkdóma, rúning, ullarvinnslu og
margt fleira. Á sýningunni finna
ungir sem aldnir eitthvað við sitt
hæfi, t.d. barnahorn með leikföng-
um, vísindahorn fyrir fræðingana í
fjölskyldunni og sísvanga
heimalninga sem Sauðfjársetrið
hefur í fóstri yfir sumarið.
Matthías Lýðsson, bóndi á
Húsavík, á sæti í stjórn Sauðfjár-
setursins. Hann segir að aðsókn að
sýningunni hafi verið mjög góð í
sumar. Í fyrrasumar komu á fjórða
þúsund gestir sem skrifuðu sig í
gestabókina og sennilega hafi þeir
verið álíka margir í sumar en ekki
er búið að telja úr gestabókinni í
ár.
Matthías segir að sýning Sauð-
fjársetursins sé enn dálítil for-
tíðarsýning enda auðvelt að afla
gagna úr fortíðinni. Tilgangur
sýningarinnar er ekki síst sá að
bæta sjálfsvitund bænda og góða
ímynd sauðfjárræktar og gera það
sem unnt er til að auka sölu á
sauðfjárafurðum almennt. Þá er
sýningin, kaffistofan og hand-
verksbúðin atvinnuskapandi.
,,Við viljum líka gera lífið
skemmtilegra og yfir sumarið
erum við með öfluga skemmtidag-
skrá í gangi. Það eru einhverjir
viðburðir í það minnsta aðra
hverja helgi yfir sumarið. Við
erum með dráttarvéladag, þar sem
keppt er í dráttarvélaakstri eins og
á landsmótunum, furðuleika þar
sem keppt er í ýmsum furðu-
greinum eins og öskri,
tungubreidd, belgjahoppi, aftur-
göngu og trjónufótbolta. Við höld-
um líka sumarhátíð sem inniheldur
m.a. kraftakeppni karla og kvenna.
Síðast en ekki síst má nefna
meistaramót í hrútadómum sem er
geysilega vinsælt hrútaþuklaramót
sem er haldið seint í ágúst á hverju
ári," segir Matthías.
Þeim, sem vilja forvitnast
frekar um hina líflegu starfsemi
Sauðfjárseturs á Ströndum, er bent
á vefinn
www.strandir.is/saudfjarsetur
Sögusýning Sauðfjárseturs á
Ströndum - Sauðfé í sögu þjóðar
Góð aðsókn að
sýningunni í sumar