Bændablaðið - 03.10.2013, Blaðsíða 10

10 Bændablaðið | Fimmtudagur 3. október 2013
Fréttir
Fimmtudaginn 19. september sl.
útskrifuðust tíu nemendur frá
Asíu og Afríku úr sex mánaða
námi við Landgræðsluskóla
Háskóla Sameinuðu þjóðanna.
Athöfnin fór fram í húsnæði
Landbúnaðarháskóla Íslands að
Keldnaholti í Reykjavík þar sem
skólinn er til húsa og meginhluti
námsins fer fram, en auk
Landbúnaðarháskólans kemur
Landgræðsla ríkisins að rekstri
skólans, að því er fram kemur í
fréttatilkynningu.
Landgræðsluskólinn er hluti af
neti Háskóla Sameinuðu þjóðanna
sem finna má víðsvegar um heiminn
en höfuðstöðvar hans eru í Japan. Auk
Landgræðsluskólans starfa þrír aðrir
skólar undir hatti Háskóla Sameinuðu
þjóðanna á Íslandi; Jarðhitaskólinn,
Sjávarútvegs skólinn og Jafnréttis-
skólinn. Allir skólarnir bjóða árlega
upp á um 6 mánaða nám fyrir
sérfræðinga frá þróunarlöndum og
eru skólarnir fjármagnaðir af íslenska
ríkinu sem hluti af framlagi Íslands til
alþjóðlegrar þróunarsamvinnu.
Við útskriftarathöfnina flutti
utanríkisráðherra, Gunnar Bragi
Sveinsson, ræðu þar sem hann
undirstrikaði mikilvægi landgræðslu
og sjálfbærrar landnýtingar á
heimsvísu ásamt mikilvægu
hlutverki Landgræðsluskólans í að
taka á þeim áskorunum. Ráðherrann
fagnaði einnig nýrri jafnréttisstefnu
Landgræðsluskólans sem tók gildi
sl. sumar. Auk utanríkisráðherra tóku
til máls Hafdís Hanna Ægisdóttir,
forstöðumaður Landgræðsluskólans,
og Sveinn Runólfsson, formaður
stjórnar skólans, ásamt tveimur
útskriftarnemum: Enock Ssekuubwa
frá Úganda og Tserennadmid Bataa
frá Mongólíu. Aðrir nemar komu
frá Gana, Eþíópíu, Níger, Namibíu
og Kirgistan, fimm konur og fimm
karlar.
Grasrót – skapandi samfélag, við
Hjalteyrargötu 20 á Akureyri, þar sem
skrifstofur Slippsins voru til húsa á
árum áður, verður með opið hús og
matarmarkað í húsakynnum sínum
næstkomandi laugardag, 5. október,
frá kl. 11 til 17.
Yfir 30 einstaklingar eru með
vinnustofur hjá Grasrót og fást þeir
við margvíslega hluti, handverk af
ýmsum toga er áberandi, listmálun,
fatasaumur, eldsmíði og tréskurður
svo eitthvað sé nefnt. Sigurlaug
Leifsdóttir, verkefnastjóri Grasrótar,
segir að flestar vinnustofur verði
opnar og gefist gestum kostur á að
kynna sér þá fjölbreyttu starfsemi
sem fram fer í húsinu. Til viðbótar
verður svo matarmarkaður á efstu
hæð hússins þar sem hægt verður
að kaupa varning eins og nautakjöt,
harðfisk, kartöflur, geitakjöt, sauðaís,
býflugnahungang, hrökkbrauð,
konfekt, pestó, sultur og brauð, te
og fjallagrös.
„Nánast allur varningur sem boðin
verður til sölu á matarmarkaði okkar
er héðan úr héraðinu, Eyjafirði,“ segir
Sigurlaug. Flestir þeir sem bjóða
vörur til sölu eru innan samtakanna
Beint frá býli og munu framleiðend-
um kynna sínar vörur fyrir gestum
og gangandi.
Í boði góð aðstaða gegn vægu
gjaldi
Grasrót – skapandi samfélag hefur
starfað á Akureyri undanfarin ár með
því markmiði að vera vettvangur fyrir
áhugasamt fólk sem vill fá tækifæri til
að þróa hugmyndir sínar með litlum
tilkostnaði. „Miðstöðin er vettvangur
fyrir alla í líflegu umhverfi þar sem
fólk getur komið saman og unnið að
skapandi verkefnum á sviði iðnaðar,
þjónustu og menningar,“ segir
Sigurlaug.
Hjá Grasrót gefst fólki kostur á að
leiga ódýra aðstöðu fyrir þá starfsemi
sem það stundar. „Við höldum kostn-
aði í lágmarki þannig að fólk þarf ekki
að leggja út í mikinn stofnkostnað.
Stundum er mikill kostnaður því
fylgjandi að leigja aðstöðu og getur
verið þröskuldur fyrir þá sem eru að
þróa sig áfram í starfi,“ segir hún.
Í miðstöðinni er einnig aðstaða
fyrir félagasamtök og einstaklinga
sem þurfa aðstöðu til að starfrækja
áhugamál sín, svo lengi sem starf-
semin rímar við aðra starfsemi sem
þar fer fram og viðkomandi eru virkir
þátttakendur. Áhersla er lögð á endur-
nýtingu og gjörnýtingu. Starfsmaður
Grasrótar aðstoðar við söfnun efnis,
fræðslu og hugmyndavinnu.
„Það að geta gengið inn í skap-
andi samfélag og orðið hluti af því
er mikilvægt fyrir þá sem eru að þróa
og byggja upp sína eigin framleiðslu.
Reynslan, þekkingin og hugmynd-
irnar sem safnast saman á svona stað
er ómetanlegur fjársjóður sem marg-
faldast þegar honum er deilt og verður
sjálfkrafa mikilvægur stuðningur við
frumkvöðla,“ segir Sigurlaug.
Í fyrstu viðbrögð við
efnahagshruni
Grasrót var upphaflega stofnuð sem
viðbragð við efnahagshruninu og
miklu atvinnuleysi í kjölfar þess.
Strax fór af stað mikið samstarf við
Vinnumálastofnun og óhætt er að
segja að Grasrót hafi átt mikinn þátt
í því að viðbrögð stofnunarinnar á
Akureyri voru mjög öflug og höfð til
fyrirmyndar á landsvísu. Stór þáttur í
hugmyndafræðinni er að bjóða upp á
skapandi samfélag þar sem allir eru
jafnir og nýta styrkleika hvers annars.
Stefnt er að því að miðstöðin
verði til þess að auka fjölbreytnina
í afþreyingar- og verslunarflóru
bæjarins og að hún verði miðpunktur
hönnunar og framleiðslu úr héraði og
þannig mikilvægur hluti af upplifun
ferðamanna sem til bæjarins koma.
Matarmarkaður hjá Grasrót á Akureyri:
Sauðaís, fjallagrös, hrökkbrauð
og býflugnahunang í boði
Réttarstörfum er nú að mestu lokið
á landinu og eru allar fjárréttir
afstaðnar þrátt fyrir að veður og
veðurspá hafi riðlað réttarhaldi
víða. Enn eru þó eftir sex stóðréttir
í Skagafirði, Eyjafirði og Vestur-
Húnavatnssýslu og má sjá þær
hér að neðan. Enn sem fyrr brýnir
Bændablaðið fyrir fólki sem hefur
hug á því að halda í stóðréttir að
hafa samband við heimamenn til að
fá tímasetningar staðfestar.
Stóðréttir haustið 2013
Stóðréttir haustið 2013
Deildardalsrétt í Skagafirði laugardagur 5. október
Tungurétt í Svarfaðardal, Eyf. laugardagur 5. október
Flókadalsrétt, Fljótum, Skag. laugardagur 5. október
Víðidalstungurétt í Víðidal, V.-Hún. laugardagur 5. október kl. 10
Þverárrétt ytri, Eyjafjarðarsveit laugardagur 12. október kl. 10
Melgerðismelarétt í Eyjafjarðarsveit laugardagur 12. október kl. 13
Sauðfjárbændur í Grýtubakka-
hreppi fóru í seinni göngur
um þarsíðustu helgi, 21. og 22.
september síðastliðinn. Lagt var
af stað eftir að snjómoksturstæki
höfðu verið ræst en moka þurfti
Leirdalheiði áður en gangnamenn
héldu af stað í göngur.
Talið er að nú sé jafnvel meiri
snjór á heiðinni en í seinni göngum í
fyrra en menn frá björgunarsveitinni
á staðnum fóru á vélsleðum og
aðstoðuðu bændur við leitina.
Afleitt færi
„Þetta gekk bara vel,“ segir
Þórarinn Ingi Pétursson, bóndi í
Grýtubakkahreppi og formaður
Félags sauðfjárbænda. Hann segir
að menn hafi ýmist farið gangandi,
á hestbaki eða á snjósleðum til leitar.
„Og færið var afleitt, hvernig svo
sem ferðamátinn var,“ segir hann.
„Fé var rekið óvenjuseint á
afrétt í sumar, komið var fram undir
mánaða mót júní-júlí þegar loks var
hægt að komast í Fjörður vegna
snjóa. Spurður um hvort bændur í
héraði séu ekki orðnir leiðir á miklum
snjóþyngslum svarar Þórarinn: „Nei,
aldrei. Þetta er bara svona og við því
er ekki neitt að gera. Það verður bara
að spila úr þeim aðstæðum sem í boði
eru hverju sinni.“
Um Fjörður
Fyrir þá sem ekki þekkja til
staðhátta er það sem nefnt er Fjörður
samheiti yfir fleiri en einn fjörð
austan Kaldbaks við austanverðan
Eyjafjörð. Það er eitt af mörgum
tilkomumiklum fjöllum á skaganum
milli Eyjafjarðar og Skjálfandaflóa.
Á milli þeirra eru gróskumiklir dalir,
sem voru byggðir á fyrri öldum, en
eru allir komnir í eyði.
Úti fyrir mynnum dalanna eru
víkur fyrir opnu hafi, Keflavík
vestast og síðan Þorgeirsfjörður og
Hvalvatnsfjörður. Með undirlendinu
sem fylgir þeim kallast þeir í einu
lagi Fjörður.
Til að komast út að sjó í
Hvalvatnsfirði þarf að fara um jeppa-
veg yfir Leirdalsheiði og Hávörður,
samtals um 27 kílómetra leið frá
Höfðahverfi við Eyjafjörð. /MÞÞ
Gengið í Fjörður:
Ryðja þurfti leiðina fyrir gangnamenn
Hestarnir voru sannarlega þarfasti þjónninn þegar farið var í göngur í Fjörður, enda illfært öðrum fararskjótum.
Mynd / Þórarinn Ingi Pétursson
Mikill snjór var á heiðinni þrátt fyrir að enn væri nokkuð eftir af
september mánuði. Mynd / Guðni Sigþórsson
Landgræðsluskóli Háskóla Sameinuðu þjóðanna á Íslandi:
Tíu nemendur frá Asíu og Afríku útskrifaðir
Sigurlaug Leifsdóttir, verkefnastjóri
Grasrótar.