Bændablaðið - 17.10.2013, Blaðsíða 26

26 Bændablaðið | Fimmtudagur 17. október 2013
Fura ehf. málmendurvinnsla í Hafnarfirði gangsetur nýja viðarkurlverksmiðju í Hafnarfirði:
Ætlunin að framleiða um 4.000 tonn
af undirburði fyrir hross
Eigendur Furu ehf. málm-
endurvinnslu í Hafnarfirði hafa nú
gangsett endurvinnslu á timbri þar
sem framleitt verður timburkurl
undir nafninu Furuflís. Er það
einkum hugsað sem undirburður
fyrir hross, kjúklinga og annan
búfénað. Verksmiðjan, sem er í nýju
1.000 fermetra stálgrindarhúsi,
var formlega gangsett föstudaginn
4. október.
Úlfar Haraldsson er framkvæmda-
stjóri Furu ehf.. Hann segir að þarna
sé verið að útvíkka endurvinnslu-
starfsemi Furu ehf. sem fram til
þessa hafi að mestu verið að kurla
margvíslega málma sem seldir eru
til málmbræðslu í útlöndum. Þar á
meðal eru ónýtir bílar sem búið er
að afskrá.
Á þriðja hundrað milljóna króna
fjárfesting
„Ætli þetta sé ekki ein stærsta
endurvinnsluverksmiðja sem reist
hefur verið á Íslandi á síðustu árum.
Við erum búnir að vera að vinna
við að setja þetta upp síðastliðið
ár; reisa húsið og setja inn vélarnar,
sem koma að mestu frá Bretlandi, en
pökkunarvélin er frá Ítalíu. Það komu
menn að utan til að setja búnaðinn
upp. Þetta er fjárfesting upp á um 250
til 280 milljónir króna,“ segir Úlfar.
– Hvað reiknið þið með að geta tekið
mikið af hráefni hér í gegn?
„Við reiknum með að um fjögur
þúsund tonn fari hér í gegn á ári og
þá erum við að miða við að reka þetta
bara á einni vakt. Síðan er auðvitað
hægt að keyra þetta á tveim vöktum
en ætli við förum ekki varlega til að
byrja með. Fyrir hrossaræktina er í dag
verið að flytja inn um 10-12 þúsund
tonn á ári, þannig að í framleiðslu
okkar ætti að felast töluverður
gjaldeyrissparnaður, svo ekki sé talað
um þá innspýtingu í atvinnulífið sem
þetta fyrirtæki skapar. Við reiknum
með tveimur föstum starfsmönnum
í kringum framleiðsluna og síðan er
sölumennska og dreifing, en ég er
með Þorvald Gíslason með mér í því
verkefni.
Við stílum inn á að taka hér inn
hreint timbur, það er ómálað og ófúa-
varið.“
Úlfar segir að til að byrja með
verði ekki tekið á móti grisjunarviði
úr skógrækt en það verði skoðað í
samræmi við hvað markaðurinn
leyfi.
Mikil sjálfvirkni
Verksmiðjan er mjög fullkomin, en
inn í hana kemur timbrið grófkurlað
eftir ferli sem fer fram utanhúss á
lóð fyrirtækisins. Grófkurluðu
timbrinu er síðan mokað í síló
inni í verksmiðjunni og fer þaðan
eftir færibandi í fínkurlun og eru
naglar og aðrir málmhlutir teknir
úr hráefninu með sterkum seglum.
Síðan fer hreint efnið í gegnum ellefu
metra langan þurrkara sem kyntur er
með heitu vatni. Rakastigið í kurlinu
er eftir það um 7-8%. Síðan fer það
í gegnum blásara og sótthreinsandi
útfjólubláa ljósgeisla.
Áfram flyst hráefnið eftir
færiböndum og er síðan ýmist stýrt
í 400 kg stórsekki eða í gegnum
pökkunarvél sem pakkar kurlinu
inn í ferkantaða 33 kg plastbagga.
Allt gerist þetta sjálfvirkt og á enda
línunnar er þjarki sem tekur baggana
af færibandinu og staflar þeim á
bretti. Brettin fara síðan í gegnum
filmupökkun þannig að pakkarnir
hreyfist ekki í flutningi.
– Getið þið keppt í verði við innflutt
viðarkurl?
„Já, við ætlum að gera það og
koma sterkir inn á markaðinn með
gott verð. Við höfum verið að dreifa
þessu fyrir austan fjall og fyrir
norðan og leyfa hestamönnum að
prófa. Þeir hafa tekið vörunni mjög
vel. Útlitið er því bara gott og við
komum inn á markaðinn með þetta
á réttum tíma, þar sem hestamenn
eru að fara að taka hrossin í hús.“
/HKr.
Við grófkurlaðan viðarbing sem er að fara í frekari vinnslu í nýju verksmiðjunni. Úlfar Haraldsson (til vinstri), framkvæmdastjóri og einn af eigendum hinnar nýju viðarkurlverksmiðju Furu ehf.,
og Þorvaldur Gíslason, framleiðslustjóri verksmiðjunar og hestamaður með meiru. Myndir / HKr.
eða í 400 kg stórsekkjum.