Málfríður - 15.10.2009, Blaðsíða 15

Starfsemi í Félagi þýskukennara hefur vaxið jafnt
og þétt. Þetta er þróun sem hinn almenni kennari
hefur fundið fyrir í sínu lífi og starfi þar sem rafræn
samskipti hafa haldið innreið sína. Kennarar þekkja
það að eyða stundum meiri tíma við tölvuna en í
kennslustofunni. Stjórn og félagsmenn eiga nánast
í daglegum rafrænum samskiptum og er það mikill
munur frá því áður fyrr en eykur þar með á starf og
umsjón stjórnarmanna.
Stjórn félagsins hittist minnst 3 – 4 sinnum á ári fyrir
utan samskipti á vefnum. Aðalfundir eru haldnir ár
hvert í mars og fulltrúafundir/deildarstjórafundir
eru haldnir í október. Félagið heldur námskeið eða
ráðstefnu á hverju ári, hér á landi eða í útlöndum.
Félagsmenn hafa einnig verið duglegir að sækja ráð­
stefnur og námskeið í útlöndum sem haldin eru á
vegum erlendra félaga. Við erum í góðu samstarfi við
Goethe stofnun en þar er boðið upp á fjölda námskeiða
sem bjóðast þýskukennurum og eru vel styrkt. Einnig
höfum við til margra ára sótt námskeið til Lübeck sem
haldin eru af Deutsche Auslandgesellschaft. Þangað
hefur stór hópur þýskukennara sótt í gegnum tíðina.
Stærsti viðburðurinnn á þessu ári var ferð á alheims­
ráðstefnu þýskukennara sem haldin var í ágúst í Jena/
Weimar í Þýskalandi. Þangað fór 17 manna hópur kenn­
ara á framhaldsskóla­ og háskólastigi. Þessi ráðstefna er
haldin fjórða hvert ár og stendur í viku. Þátttakendur
voru um 3000 talsins alls staðar að úr heiminum.
Félagið er einnig meðlimur Félags þýskukennarafélaga
(IDV – Internationaler Deutschlehrerverein) sem eru
regnhlífarsamtök fyrir öll þýskukennarafélög í heim­
inum. Þessi samtök héldu í framhaldi af ráðstefnunni
aðalfund sinn sem haldinn er á 2ja ára fresti og sótti
formaður fundinn. Fundinn sóttu 73 fulltrúar frá jafn­
mörgum félögum. Frásögn af alheimsráðstefnu þýsku­
kennara í Jena/Weimar má finna hér í blaðinu.
Póstlisti félagsmanna hefur verið í gangi alllengi
og er mikið notaður til að koma skilaboðum og
upplýsingum til félagsmanna. Einnig hefur félagið
opnað vefsíðu innan KÍ­vefsins og bindum við mikl­
ar vonar við hana. Vefslóðin er http://ki.is/daf.
Hugmyndin er einnig að koma fyrir innri vef þar
sem kennarar geta viðrað skoðanir sínar og talað um
námsefni, próf, námsmat og fl. og er hann í vinnslu.
Félagið hélt í vor samráðsfund fyrir félagsmenn
þar sem rætt var um námsbækur og skipst á skoð­
unum og reynslu. Margir skólar eru nú að skipta um
kennsluefni til samræmis við ný framhaldsskólalög
og nýjar viðmiðunarreglur í kennslu tungumála. Í
bígerð er að halda annan fund í haust og ræða þá
um annað efni, hraðlestrarbækur og fl.
Félag þýskukennara er í góðri samvinnu við
PASCH­skólann, Borgarholtsskóla.
Félagið hvetur félagsmenn til að sækja námskeið á
vegum PASCH­verkefnisins sem er skýrt frá í þessu
tölublaði og tekur félagið einnig þátt í samráðsfund­
um. Nokkur námskeið hafa þegar verið haldin með
góðri þátttöku. Þessir aðilar eru einnig í samvinnu
við þýskudeild Háskóla Íslands.
Sendiráð Þýska lýðveldisins, Deutsche Botschaft,
hefur verið í samstarfi við Þýskukennarafélagið til
margra ára. Fyrir hönd Þýska Lýðveldisins veitir
sendiráðið verðlaun í þýskukeppni framhaldsskól­
anna sem haldin er í febrúar á hverju ári. Sendiráðið
veitir einnig bókaverðlaun á stúdentsprófi í öllum
framhaldsskólum landsins.
Í tilefni af stórum atburðum í þýskri sögu, eins og
20 ára falli Berlínarmúrsins, nú 9. nóv. er ýmislegt
ráðgert á vegum þýska sendiráðsins, HÍ og Félags
þýskukennara. Haldin verða erindi og sýndar kvik­
myndir og fl. sem á eftir að koma í ljós síðar.
Félagið hefur miðlað upplýsingum til félags­
manna t.d. í gegnum póstlistann. Stjórnin vakti nú
síðast athygli félaga á samkeppni sem Goethe stofn­
um stendur fyrir um gerð stuttmyndar og eru þátt­
takendur frá öllum heiminum. Verðlaun eru vegleg
og íslenskir nemendur eru ágætlega tæknivæddir til
að takast á við svona verkefni.
Nokkuð hefur verið reynt að koma á Stammtisch
en þar hittast félagar og fá sér bjór og rabba að hætti
Þjóðverja. Stundum hefur þetta tekist eftir fundi og
þá heppnast vel og er þetta góður vettvangur til að
hittast og ræða málin óformlega.
MÁLFRÍÐUR 1
Starfsemi Félags þýskukennara á Íslandi
Ragna Kemp er formaður
Félags þýskukennara á
Islandi.