Feykir - 10.04.2014, Blaðsíða 9

14/2014 Feykir 9
Botnaðu nú
Vísnakeppni Safnahúss Skagfirðinga
Vísnakeppni Safnahúss Skagfirðinga hefur átt
sinn fasta sess í aðdraganda Sæluviku
Skagfirðinga og notið mikilla vinsælda allt frá
árinu 1975 er hún var haldin í fyrsta sinn.
Var það að frumkvæði Magnúsar Bjarnasonar kennara og
minningarsjóðs hans sem keppnin komst á laggirnar.
Samkvæmt venju mun Safnahúsið standa fyrir vísnakeppni
þetta árið og verður hún með sama sniði og undanfarin ár.
Annars vegar eru hagyrðingar beðnir um að yrkja um
komandi sveitarstjórnarkosningar sem og að botna
eftirfarandi fyrriparta.
Skagafjörður skartar dýrð
og skaparans er prýði.
Í leik og gleði lífið er
léttast hverjum manni.
Enn mig tæla öll þau game
sem eru á Sæluviku.
Lifnar þor og léttast spor
er líður vor um bæinn.
Veitt verða verðlaun, annars vegar fyrir bestu
kosningavísuna og hins vegar fyrir besta botninn. Verðlaun
eru í boði Sparisjóðs Skagafjarðar, 15.000 fyrir bestu vísuna og
sama upphæð fyrir besta botninn. Ekki er skilyrði að allir
fyrripartar séu botnaðir og einnig má einungis senda
kosningavísu.
Vísur og botnar verða að hafa borist Safnahúsi Skagfirðinga,
Faxatorgi 550 Sauðárkróki í síðasta lagi miðvikudaginn 23.
apríl nk. Nauðsynlegt er að vísurnar séu merktar dulnefni, en
rétt nafn og símanúmer fylgi með í lokuðu umslagi. Einnig er
hægt að senda vísur og botna í tölvupósti á netfangið
skjalasafn@skagafjordur.is og verður þá viðkomandi höfundi
gefið dulnefni áður en vísunar fara til dómnefndar.
Úrslit verða tilkynnt sunnudaginn 27. apríl á Atvinnulífs-
sýningunni í íþróttahúsinu á Sauðárkróki en þar verður
Sæluvikan formlega sett./PF
( RABB-A-BABB ) oli@feykir.is
Birkir Þór
NAFN: Birkir Þór Þorbjörnsson
ÁRGANGUR: 1990
FJÖLSKYLDUHAGIR: TRÚLOFAÐUR ELÍSABETU EIR STEINBJÖRNSDÓTTUR.
BÚSETA: Eins og er bý ég á hótel mömmu meðan frúin er í Reykjavík fyrir sunnan í námi.
HVERRA MANNA ERTU: Sonur Þorbjörns Gíslasonar grunnskólakennara og Helgu Jónsdóttur,
bókara í Kaupfélagi Vestur Húnvetninga. Vel upp alinn á Hvammstanga.
STARF / NÁM: Lærði húsasmíði í FNV og gæti titlað mig húsasmið ef danskan væri ekki að
vefjast svolítið fyrir mig. En ég starfa í prjónastofunni Kidka á Hvammstanga. Þar sé ég
um að reyna að halda prjónavélum gangandi.
Hvernig nemandi varstu? Bara svona ágætur held
ég. Þurfti stundum svoldið mikið að spjalla.
Hvað er eftirminnilegast frá fermingardeginum?
Sennilega gjafirnar. Það var sérstaklega ánægjulegt
að fá rafmagnsgítarinn frá mömmu og pabba.
Hvað ætlaðir þú að verða þegar þú yrðir stór?
Einhverntíman ætlaði ég mér að verða smiður eða
bifvélavirki.
Hvað hræðistu mest? Mýs. Og loft – er mjög
lofthræddur.
Hvað varstu að hlusta á þegar þú fékkst bílprófið?
Það var ekki neinn einn tónlistarmaður í uppáhaldi
en á rúntinum var mikið hlustað lagið Canon eftir
Johann Pachelbel í rokkútgáfu manns sem mig
minnir að kalli sig Jerry C. Svo var lagið Lauslát
með hljómsveitinni Múgsefjun líka í uppáhaldi.
Hvaða lag er líklegast að þú takir í Kareókí?
Gamlárspartý með Baggalút.
Hverju missirðu helst ekki af í sjónvarpinu
(fyrir utan fréttir)? How I met your mother og
spurningabomban með Loga Bergmanni.
Besta bíómyndin (af hverju)? Shawshank
Redemption. Green Mile og Shawshank
Redemption því þær fá svo góða einkun á imdb.
com og eru mjög góðar myndir.
Hvað gerir þú betur en allir aðrir á þínu heimili?
Kjötsúpu.
Hættulegasta helgarnammið? Lakkrís. Það getur
endað illa að borða of mikið af honum.
Hvernig er eggið best? Spælt ofan á hamborgara.
Uppáhalds málsháttur? „Á meðan maður er með
nef á maður aldrei nóg af neftóbaki“ úr myndinni
Fiskar á þurru landi. Ólafía Hrönn lék svo fyndna
kellingu sem sagði þessa línu.
Hvaða teiknimyndapersóna höfðar mest til þín?
Við Hómer Simpson erum leiðinlega líkir.
Hver er uppáhalds bókin þín? The Curious
Incident of the Dog in the Night-Time. Þurfti að
lesa hana í ensku í FNV. Merkilega góð miðað við
skólabók.
Orð eða frasi sem þú notar of mikið? Ég tala
mikið um hvað mér leiðist Reykjavík. Sjálfsagt er
einhverjum sem finnst ég gera of mikið af því.
Ef þú gætir hoppað upp í flugvél og réðir hvert hún
færi, þá færirðu... Til Spánar eða Bandaríkjanna.
Hvað fer mest í taugarnar á þér í fari þínu? Hvað
ég er óþolinmóður.
Hvað fer mest í taugarnar á þér í fari
annarra? Þegar fólk er mjög neikvætt og tuðar
mikið.
Hvaða íþróttamanni hefurðu mestar mætur á?
Jón Páll var mjög flottur.
Hvaða fræga manneskja mundir þú helst vilja
vera og af hverju? Annar hvor Hraðfréttagaurinn
því þeir eru svo fyndnir.
Ef þú ættir að dvelja alein/n á eyðieyju, hvaða
þrjá hluti tækirðu með þér? Grill, hníf og einhverja
góða sósu.
Hver væri titillinn á ævisögu þinni? Að eilífu
rauðhærður. Eða dvergurinn Rauðgrani.
Smá í Feyki ::
Síminn er 455 7171
smá
AUGLÝSINGAR
Tamning og þjálfun
Tek í tamningu og þjálfun.
Upplýsingar í síma 862-6394
Drangeyjarfélagið
Heimild til að nytja
Drangey til þriggja
ára
Byggðarráð Svf. Skaga-
fjarðar samþykkti á fundi
sínum þann 3. apríl að
heimila Drangeyjarfélaginu
að nytja Drangey til þriggja
ára. Fram kemur í
fundargerð að félagið mun
kappkosta að viðhalda
veiðiaðferðum, veiðistöðum
og ganga um eyna í fullri
sátt við náttúruna eins og
gert hefur verið undanfarna
áratugi.
„Félagsmenn hafa haldið við
skála í Drangey og unnið
betrumbætur við lendingu og
uppgöngu í eyna á kostnað
félagsins. Ef nytjaleyfi fæst, þá
stefnir félagið á að setja upp
flotbryggju í sumar við eyna á
eigin kostnað,“ segir í
fundargerðinni. Byggðaráð
samþykkti beiðnina sem fyrr
segir, „enda verði almennt og
eðlilegt aðgengi í eyjuna
tryggt á samningstímanum.“
/BÞ