Feykir - 10.04.2014, Side 10

10 Feykir 14/2014
Uppskeruhátíð strengjadeildar
Tónlistarskóli Skagafjarðar
Laugardaginn 29. mars voru
haldnir lokatónleikar
samspils- og hljómsveita-
hópa Skagfirskra strengja.
Voru tónleikarnir haldnir í
Kakalaskála að loknum
æfingadögum föstudag og
laugardag. Á tónleikunum
komu nemendur fram í
hópum og var allt frá
byrjendum og upp í
nemendur á framhaldsstigi.
Samhliða einkatímum í
tónlistarnámi á strengjahljóð-
færi eru starfandi hljómsveitir
og samspilshópar sem æfa
reglulega allan veturinn.
„Nemendur stóðu sig vel í vetur
á samspilsæfingum og var þetta
einskonar uppskeruhátíð okkar
í strengjadeildinni hjá Tón-
listarskóla Skagafjarðar,“ segir
Kristín Halla Bergsdóttir
tónlistarkennari. Eldri nem-
endur voru svo einnig með
tónleika 2. apríl þar sem nær
eingöngu var spiluð tónlist frá
barokktímabilinu. Þeir tón-
leikar voru haldnir í Sauð-
árkrókskirkju og var
tilgangurinn m.a. að kynna
nemendur fyrir þessari tegund
tónlistar og njóta tónlistar
tónskálda á við Bach, Corelli,
Vivaldi og fleiri. /BÞ
Blúndur og blásýra
Frábær kvöldstund í Hofsósi
Eftir annasaman vinnudag
settist undirrituð upp í bíl og
ók í góðum félagsskap austur
yfir Héraðsvötn til að eiga
kvöldstund í leikhúsi. Það er
alltaf sérstök tilfinning að
fara á leiksýningu, ekki síst
eftir að hafa kynnst innviðum
áhugaleikhúss af eigin raun.
Það verður þó að
viðurkennast að í þetta
skiptið var óvíst hvaða
væntingar maður ætti að
hafa. Gamlar konur sem eitra
fyrir eldri mönnum – gat það
nú verið fyndið og
skemmtilegt?
Stutta svarið er já. Það var mikið
hlegið og ekki spillti notaleg
kaffihúsauppröðunin fyrir
stemningunni. Um leið og
gengið var í salinn vakti athygli
vel heppnuð og sannfærandi
sviðsmynd sem augljóst er að
mikið hefur verið lagt í. Brátt var
amstur dagsins lönd og leið og
hugurinn kominn inn á heimili
þeirra Brewster systra sem
reynast ekki allar þær sem þær
eru séðar. Leikritið ku
upphaflega hafa átt að vera
ádeila en hin kolsvarta kómedía
sem höfundurinn, Joseph
Kesselring, var talinn inn á að
gera að gamanleik, minnir um
margt á gamanmyndina Saving
Grace sem var vinsæl um síðustu
aldamót.
Þær Ingibjörg Sólveig
Halldórsdóttir og Fríða Eyjólfs-
dóttir, í velheppnuðum gervum
Brewster systra, áttu virkilega
skemmtilegan leik. Þá er ekki
hægt annað en að deila
áhyggjum leiklistargagnrýn-
andans Mortimer Brewster,
frænda þeirra systra, en í hans
hlut kemur að reyna að bjarga
öllu fyrir horn og það er nú
ekkert einfalt. Fyrir nú utan allar
flækjurnar í söguþræðinum þá
er varla auðvelt að standa einn á
sviði og halda karakter, en það
leysti Haukur Freyr Reynisson
snilldarlega af hendi og
skemmtileg svipbrigði sann-
færðu mann um að maðurinn
væri virkilega að fara á taugum.
Að öðrum ólöstuðum er ekki
hægt annað en að nefna tvíeykið
Sigmund Jóhannesson og Helga
Þór Thorarensen í hlutverkum
Jónatans Brewster og Doktors
Einstein. Ljúflingnum Sigmundi
tekst að skapa afar óhugnanlegan
Frankenstein og Helgi er
óborganlega fyndinn sem hinn
málhalti en hláturmildi skottu-
læknir. Það sama er raunar að
segja um alla sem stigu á stokk
þetta kvöld, skemmtilegar og
skýrmæltar persónur og góð
gervi. Í sumum þeirra reynir á
góða förðum en gervin, sem og
önnur umgjörð verksins, er
óaðfinnanlegt.
Í leikskrá kemur fram að um
sé að ræða reynslubolta, bæði
frá Hofsósi og öðrum leik-
félögum, svo og nýliða. Leik-
stjóra og leikurum tekst vel upp
að skapa skemmtilegar og vel
æfðar persónur, þrátt fyrir að
æfingatími hafi verið í knappara
lagi og fríin ekki mikil á milli
æfinga. Það ber að þakka
fórnfúsu fólki í Leikfélagi
Hofsóss fyrir að gefa sér allan
þennan tíma til að skemmta
okkur hinum og ég vil hvetja
fólk til að gera sér ferð á þessa
sýningu.
Allt að gerast á heimili Brewster systra
Mortimer ásamt Brewster systrum
Mortimer ásamt Brewster systrum og herra Gibbs
Mortimer ásamt Elínu heitkonu sinni og Brewster systrum
Dr. Einstein og Frankenstein handsama Mortimer
GAGNRÝNI
Kristín S. Einarsdóttir