Morgunblaðið - 09.01.2018, Qupperneq 6

6 FRÉTTIRInnlent
MORGUNBLAÐIÐ ÞRIÐJUDAGUR 9. JANÚAR 2018
GÆÐI – ÞEKKING – ÞJÓNUSTA
Ertu klár fyrir
veturinn?
Við hreinsum úlpur, dúnúlpur,
kápur og frakka
Höskuldur Daði Magnússon
hdm@mbl.is
Tvö ár eru nú liðin frá því þáver-
andi fjármála- og efnahags-
ráðherra skipaði starfshóp um
endurskoðun skattlagningar öku-
tækja og eldsneytis. Stefnt var að
því að starfshópurinn skilaði til-
lögum að breytingum á núverandi
kerfi og drögum að lagafrumvarpi
sem leggja átti fram á Alþingi
haustið 2016. Skemmst er frá því
að segja að það hefur ekki staðist.
Samkvæmt upplýsingum frá fjár-
mála- og efnahagsráðuneytinu er
þess nú vænst að tillögur starfs-
hópsins muni líta dagsins ljós á
fyrri hluta ársins.
Morgunblaðið spurðist fyrir um
það hvað eigendur rafbíla greiði
til vegamála fyrst þeir borga ekki
kolefnisgjald, bensín- og olíugjald
eins og þeir sem aka á bensín- og
díselbílum, en þau gjöld eiga að
renna til vegagerðar. Í svari ráðu-
neytisins kemur fram að umrædd-
ur starfshópur eigi meðal annars
að setja fram tillögu að stefnu-
mörkun um hlutdeild eigenda vist-
vænna bifreiða í skatttekjum af
ökutækjum.
Segir í svarinu að eigendur raf-
magnsbifreiða greiði bifreiðagjald,
virðisaukaskatt af kaupverði raf-
magnsbifreiða yfir 6 milljónir
króna auk þess sem virðis-
aukaskattur sé greiddur af kaup-
verði rafmagns.
„Endanlegar upplýsingar um
fjárframlög til vegamála 2017
liggja ekki fyrir á þessari stundu
en árið 2016 námu þau rúmum 25
milljörðum kr. Ekki hefur verið
lagt mat á hve stór hluti framlag-
anna á rót sína að rekja til skatt-
tekna af eigendum rafmagns-
bifreiða,“ segir í svari fjármála- og
efnahagsráðuneytisins.
Rafbílum mun áfram fjölga
„Nýskráningar rafmagnsbifreiða
og tengiltvinnbifreiða hafa aukist
umtalsvert síðustu ár og ýmislegt
bendir til þess að sú þróun muni
halda áfram. Eins og skattkerfi
ökutækja og eldsneytis er upp-
byggt eykst þungi skattlagningar
eftir því sem bifreiðar eyða meira
eldsneyti og losa því meira af
koltvísýringi við notkun. Með
fjölgun rafmagnsbifreiða, annarra
hreinorkubifreiða og sparneytinna
bifreiða, sem ganga a.m.k. að
hluta til fyrir jarðefnaeldsneyti,
dragast skatttekjur af ökutækjum
og eldsneyti saman, a.m.k. ef tekið
er mið af skatttekjum á hverja
bifreið. Skuldbindingar Íslands í
loftslagsmálum og sjónarmið um
skilvirkni skattkerfisins og tekju-
þörf ríkissjóðs, m.a. vegna út-
gjalda til samgöngumála, kalla á
að horft sé til framtíðar,“ segir
þar ennfremur.
Marka stefnu um
skatt af rafbílum
 Hillir undir tillögur frá starfshópi
Morgunblaðið/Ófeigur
Rafbílar Hleðslustöðvar spretta nú
upp enda fjölgar rafbílum hratt.
Höskuldur Daði Magnússon
hdm@mbl.is
„Það er ekki hægt að svara því beint
hvernig svona skip getur orðið vélar-
vana. Það er nú þannig með allar vél-
ar að þær geta bilað og það er bara
það sem gerðist,“ segir Guðmundur
Þór Gunnarsson, framkvæmdastjóri
rekstrarsviðs Samskipa.
Flutningaskipið Hoffell varð vélar-
vana skammt fyrir utan Reyðarfjörð
á sunnudagskvöld þegar skipið var á
leið til Rotterdam. Því var siglt til
Eskifjarðar fyrir eigin vélarafli undir
miðnætti það kvöld eftir að skipverj-
um tókst að ræsa vélina að nýju.
„Það drapst tímabundið á aðalvél-
inni og síðan fór hún í gang aftur. Hún
var keyrð á litlu álagi til hafnar, það
var gert til öryggis áður en menn gátu
bilanagreint. Það er verið að vinna í
því núna,“ sagði Guðmundur í gær.
Ljósavélar skipsins héldu meðan á
þessu stóð og því fór ekki rafmagn af
frystigámum.
Atvikin tvö eru óskyld
Hann segir að vissulega sé það
áhyggjuefni að skip á borð við Hoffell
verði vélarvana, eins og alltaf í slíkum
tilvikum. Rifjað hefur verið upp í fjöl-
miðlum að Hoffell varð einnig vélar-
vana fyrir tveimur árum. Þá var skip-
ið suðvestur af Færeyjum og þurfti
aðstoð frá varðskipinu Þór. Í ljós kom
að sprunga hafði komið í þilfar skips-
ins í óveðri og sjór komst í eldsneyti.
„Þessi atvik eru að öllu leyti
óskyld,“ segir Guðmundur Þór.
„Skipið er í reglulegu viðhaldspró-
grammi eins og öll skip og flugvélar.
Það er búið að fara í yfirhalningu síð-
an atburðurinn átti sér stað árið
2016.“
Viðgerð stóð yfir á skipinu í gær og
vonast var eftir því að það gæti lagt úr
höfn frá Eskifirði. Það var bilun í
ventli vélar skipsins sem varð þess
valdandi að skipið varð vélarvana.
Varahlutir voru um borð
„Það þurfti ekki að kalla eftir vara-
hlutum, það voru til varahlutir um
borð. Það er stöðugt viðhald á þessum
skipum. Þess vegna erum við nú með
menn á vöktum að passa vélina allan
sólarhringinn,“ segir Guðmundur
Þór.
Mikill viðbúnaður var fyrir austan
þegar Hoffell varð vélarvana. Þyrla
Landhelgisgæslunnar flaug til Hafn-
ar í Hornafirði og þar var áhöfn þyrl-
unnar nokkurn tíma í viðbragðsstöðu.
Hafdís, björgunarskip Slysavarna-
félagsins Landsbjargar á Fáskrúðs-
firði, og dráttarbáturinn Vöttur
fylgdu Hoffelli síðasta spölinn til
hafnar.
Ventill bilaði í vél og
stöðvaði för Hoffells
Morgunblaðið/Eggert
Hoffell Flutningaskipið varð einnig vélarvana fyrir tveimur árum og er hér í togi hjá varðskipinu Þór 2016.
 Skipið varð vélarvana í annað sinn á tveimur árum
Sigurður Bogi Sævarsson
sbs@mbl.is
„Við höfum kvatt veðurlagið sem
verið hefur síðustu vikurnar og ein-
kenndist af hreinviðri og frosti.
Þetta eru afgerandi veðrabrigði, en
ekkert óvenjuleg,“ segir Einar
Sveinbjörnsson veðurfræðingur.
Alveg síðan í nóvember og fram að
áramótum var kuldatíð á landinu
og oft brunagaddur, en þó heið-
skírt. Í gærmorgun var hiti yfir
frostmarki á veðurathugunar-
stöðvum á landinu, gjarnan á bilinu
1 til 4 stig. Í dag og á morgun má
svo búast við 3 til 6 stiga hita víðast
hvar.
Núna snúa háloftavindarnir
þannig að lægðir með mildu lofti
sækja hér að, hver á fætur annarri.
„Í heild verður frekar milt og suð-
og suðaustlægar átti ríkjandi næstu
vikuna. Suma daga inn á milli mun
þó létta til og þá gæti myndast ísing
og hálka á vegum,“ segir Einar. Í
þessari úrkomutíð segir hann að
búast megi stundum við einhverri
snjókomu á fjallvegum sunnan-
lands. Á Vestfjörðum og Norður-
landi yfirleitt vægt frost og aðgerð-
arlítið veður. Norðanátt af
einhverju tagi verður að teljast af-
ar ólíkleg næstu 7 dagana eða svo.
Þrálátar norðanáttir
Einar Sveinbjörnsson segir það
sem að framan er lýst um margt
dæmigert janúarveður; það er bloti
þó frysti inn á milli. Veðrátta í jan-
úar og febrúar einkennist af hita-
sveiflum og umhleypingum, þó all-
ur gangur sé á því. Stundum komi
reyndar fyrir að útsynningur, élja-
hryðjur eða þrálát norðan- og norð-
austanátt hellist yfir snemma í
mars og frá síðustu árum séu ýmis
dæmi um óveðursskot á þeim tíma.
Morgunblaðið/Hanna
Lækjartorg Það var kaldur rigningarsuddi í borginni í gær og erlendir ferðamenn brugðu því yfir sig regnslám.
Afgerandi veðrabrigði
 Milt loft og hlýindi á landinu í stað hreinviðris og kulda
 Góð veðurspá fyrir næstu daga  Umhleypingar í mars
Vala Pálsdóttir, formaður Landssambands sjálfstæð-
iskvenna, íhugar að bjóða sig fram í leiðtogakjöri Sjálf-
stæðisflokksins í Reykjavík vegna sveitarstjórnarkosn-
inganna í vor. Hún er að vega og meta stöðuna, en
frestur til að skila inn framboði rennur út á morgun,
miðvikudag.
„Þetta er stór ákvörðun og ég held að það sé gott að
skoða allar hliðar á þessu máli. Svo er ég að ræða við
mitt nánasta fólk. Það er gott að heyra margar hliðar til
að geta tekið góða ákvörðun,“ segir Vala.
Jón Karl Ólafsson, framkvæmdastjóri flugvallarsviðs
Isavia, sem einnig var orðaður við þátttöku í prófkjörinu, hefur ákveðið að
taka ekki þátt í því. „Það kom mér ánægjulega á óvart hvað margir töldu
þetta góða hugmynd. Ég ákvað að taka helgina í þetta til að ákveða mig
endanlega og sú ákvörðun mín er endanleg,“ sagði Jón Karl í samtali við
Morgunblaðið í gær.
Vala Pálsdóttir íhugar framboð í prófkjöri
Vala Pálsdóttir